Marko 1 - NTSHOB NSI

Yohané nganyu' benntùn ntse

¹ Neto' nkùn mebwô Yésu Kristô, Mén Nsi,

² ndaṅndaṅ mba bo na' nkite ntùm ṅwa'ni ngatshob ntshob Nsi Esaya là ndù: Tshù, me tum Angél àm mbwe o, ndù a nabte manz'o.

³ Nze mèn kua' mà kônkwa ndù: Bin nabte manze Tshùaben, ndate bon manze tse, ngù a tsine.

⁴ Yohané nganyu' benntùn ntse ṅwag mà kônkwa, nke ntshob nu nekwéntse ze nekaṅ ntù ndù Nsi lagte nukebwô benntùn.

⁵ Njoṅ ngô Yudéa fa mba njoṅ ba Yérusalém fa tum, nèn ntèl i, mbam nukebwô tshobe, a nyu' yub ntùm ntse Yordan.

⁶ Yohané lo ke ma' nzwe ze bo nabt'a nyiaṅ kamél là num i, nke mfèt ngamntàn mba ṅwa'a.

⁷ A nke ntshob ntshob Nsi benntùn, ntshob ndù: Mo' mèn tshwèt nse' njam àm ndù a ta ntshùa àm, me ke' ku'ni neben wul àm nsi, nké'te nketo' mi.

⁸ Mba me là, me ke nyu' zin à ntse, là yen mèn nà nsi nyu' zin à Ywèt Nelàne.

Mba Yésu kwé ntse, Satan laṅt'é là

⁹ A lo be num tshen lé'njù là, Yésu lo Nazarèt mà Galiléa, nèn ntèt Yohané ndù a nyu' i ntse Yordan.

¹⁰ Be ndùse, a be tum ntse, njen kamànyam gha' nte nge mba Ywèt Nelàn ts'a tshwèt nswe' nse' num i ndù a fute bwoṅsaṅ nà.

¹¹ Nze mèn tshob mfe kamànyam ndù: O b'a mén àm ze me num nkô o, mbèn njab ntù àm fa num o là.

¹² Be ndùse, Ywèt Nsi lo' i nèn yi mà kônkwa. Yésu tswe mà kônkwa lé'njù ṅam nkuà, Satan laṅt'é.

¹³ A nke ntswe boa ba nyàm tshwèt, ba Angél nke mfa' yi.

Mba Yésu to' fa' ntsiaṅ mbwe ghazi'te nu i là

¹⁴ Ngelaṅ bo na' ma' Yohané ndàtsha là, Yésu nèn mà Galiléa, nke ntshob nkùn mebwô Nsi bwe,

¹⁵ ntshob ndù: Ngelaṅ à ku'u, nufen Nsi bèn ngebte, bin kaṅ ntù tsine, mbam nkùn mebwô.

¹⁶ Mb'a na' nke ntshùa kaṅ dibantse Galiléa là, a yen Simon mba Andréa, mfèt Simon, bo nke ma' mbunjà ntùm ntse, nummbe bo na' mb'a ghaghom ngontse.

¹⁷ Yésu tshob bo ndù: Bin tam njam àm, me nsi ghù bin tù' ghaghom benntùn.

¹⁸ Be ndùse, bo faṅ mbunjà, ntam njam i.

¹⁹ A bèn mbe zin mén nda'nda', njen Yakobo, mén Zèbèdéo, mba Yohané mfèl i, bo nke nkwitte mbunjà ntùm kenu. Be ndùse, a tsiaṅ yube.

²⁰ Bo faṅ tà yub Zèbèdéo ntùm kenu boa ghafa' tse, ntam njam i.

Mba Yésu yate mèn ze ywètkebwô ke ntô i là

²¹ Bo nèn nkum Kapernaum; a be lé' Sabbat, be ndùse Yésu tsho sinagogue, ntswite benntùn ntshob Nsi.

²² Bo nyàmte nu z'a tswite là neshu, nummbe a ke ntswite yub à mba mèn z'a ghù ngù' là, ke tswite yub à mba ghalèn ṅwa'ni Nsi là.

²³ Tshù, mo' mèn lo be ntùm sinagogue yub ndù ywètkebwô tshwèt ntô i, nkua' neta,

²⁴ ntshob ndù: Ke z'o ghù ntùm yag nu, Yésu ze Nazarèt? O se' à nebagte yag ké? Me lèn mèn z'o be yi là: O b'a mèn nelàn z'a fe Nsi là.

²⁵ Yésu tshobt'é, ntshob ndù: Mi ntswe, tum num i.

²⁶ Ywètkebwô nyi't'é kua' neta, ntum num i.

²⁷ Njoṅ benntùn fa tshàm neshu, nke mbètte bo bo ndù: A ke lèn nu li à? Tshù mo' netswite ze nswe z'a dun ngù' là li! A num ntô mba ba ywètkebwô, bo bèn nju' i.

²⁸ Be ndùse, lén se be neju'ni ntùm njoṅ ngô fa ts'a na' mbe mbaṅ Galiléa là.

Mba Yésu yate màntse Pétro là

²⁹ Be ndùse, bo be tum sinagogue, Yésu, Yakobo mba Yohané nèn ndà Simon mba Andréa.

³⁰ Màntse Simon nô ndà ndù a ghù saṅtewut, be ndùse bo soṅ Yésu nu mfà num i.

³¹ Yésu se' mbaṅ i, ntshùb bu i, mbù' i, saṅtewut tum num i, a to' nefa' bo.

Mba Yésu yate ngokèt nzenze ntùm ngô Galiléa là

³² Njù be sène, ngelaṅ lagnyam na' mbi là, bo lo' njoṅ benntùn fa tse bo na' ntswe kebwô mba ben tse ywètkebwô ke ntô yub là, nse' yi mbwe i.

³³ Njoṅ ngô fa se', ntse'te nzendà.

³⁴ A yate benntùn yàm tse bo na' ntswe kebwô ndù ngokèt nzenze tshùb yub là, nta' ywètkebwô yàme, là ke bam ywètkebwô tshob nu, nummbe bo lèn i.

³⁵ Kua' mà nkebnjù, ngelaṅ njù ke' yoṅ nké'te là, a lo, ntum nèn mo' dù' banban, ntswe bwe tù' i, nke nde'te Nsi.

³⁶ Simon mba ben tse bo à bo be là, to' netshaṅ i.

³⁷ Bo lo be yen i, ntshob yi ndù: Njoṅ benntùn fa tshwèt ndiag o.

³⁸ A tshob bo ndù: Be nèn mo' dù' ghua ntùm tshen ngô ts'a ghebte mbaṅ yen ni là, ndù mba bwe me tshob ntshob Nsi, nummbe a b'a ju ze me se' num bwe là.

³⁹ A nèn ntshob ntshob Nsi ntùm sinagogue tshobe, ntùm njoṅ ngô fa, mbèn nke nta' ba ywètkebwô.

Mba Yésu yate ngankin nà

⁴⁰ Mo' ngankin se' ntèl i, nkwim ntunkekwi' mi nsi, mbu' mbu yi, ntshob ndù: A be z'o kô là, mb'o ku'ni neghù me làn.

⁴¹ Ndèn mi ko Yésu, a nyit bu i, nkwag i, ntshob yi ndù: Me kô, làne!

⁴² Be ndùse, nkin mi num i, a làn.

⁴³ Yésu tshobt'é, nsô i be ndùse ndù a nène,

⁴⁴ ntshob yi ndù: Bam nà, kà soṅ sàm mèn, là nèn nda'te wul o ngale'te Nsi mbèn mfà ju nelànte wut ze Mosé na' ntshob là, ndù a be ju nekwé nta bo.

⁴⁵ Là, a nèn nto' nesoṅ mbèn nsa nu Yésu ntùm njoṅ dù' fa, kà Yésu ke bèn nku' netsho ntùm mo' ngô mba ntshù' ndaṅndaṅ, là, a tswe njamnjam dù' banban; mba ndùlala benntùn nke mfe bag bag, nse' ntèl i.