Lukas 9 - NTSHOB NSI

Mba Yésu tum bônke' tse ntshob bàa gham nà

¹ Yésu tsiaṅ tse ntshob bàa gham, mfà neta mba ngù' netô njoṅ ywètkebwô fa bo, mba neyate ngokèt;

² ntum yub ndù bo nèn ntshob nufen Nsi, mbèn nke njate ngokèt.

³ Yésu tshob bo ndù: Kà bin lo' sàm ju num katte, ke kôg, ke bàm, ke bàn, ke nkàb lo; a ke' bwô ta' mèn lo' nzwe bàa.

⁴ Ngelaṅ bin tsho mba ntùm zit ndà lo là, bin tswe bwe tà nkum ngelaṅ ze bin nèn nà.

⁵ Ben tse bo gha nelo' zin nà, bin tum ntùm ngô yube, mbé'te mbab num nku mine; a nsi be ju nekwé nta num bo.

⁶ Ghazi'te nu i nèn, nzin ntùm ngôngô, nke nsoṅ nkùn mebwô, mbèn nke njate ngokèt njoṅ dù' fa.

Netshàm Hèrodé num nu Yésu

⁷ Là mfen Hèrodé ju' njoṅ nu fa ts'a tshùa là, ke bèn ndèn ju z'a bwô a kwate là, nummbe tsemo' benntùn lo ke ntshob ndù: Yohané bam num vù.

⁸ Tsemo' bèn ntshob ndù: Elia ṅwage, tsemo' bèn ntshob ndù: Mo' mèn netèt ghatshob ntshob Nsi tse mbwe bèn mbam num vù.

⁹ Là Hèrodé tshob ndù: Me lo ghù bo keb tu Yohané. A kua' we ze me tshwèt nju' bo ntshob tshen nu li num i à? Ndùlala a nke ndiag neyen i.

Mba Yésu kém benntùn ntsha' tàn nà

¹⁰ Ngelaṅ ghantum bèn njam nà, bo soṅ Yésu njoṅ tshu fa tse bo ghù là. A lo' yub bo à bo tum nèn nze mbaṅ ngô ze lén se be Bètsaida là.

¹¹ Là bwoṅ benntùn be lèn dù' z'a be là, ntam njam i. A lo' yub kua' mebwô, ntshob nu bo mfà num nufen Nsi, mbèn njate ben tse bo na' nkô a yate yub là.

¹² Njù be to' nesène, tse ntshob bàa gham kù'te nse' mbaṅ i, ntshob yi ndù: Lé'te bwoṅ benntùn ndù bo nèn ntùm ngô mba ntùm ntaṅla' mi a ghebte là, nzi bwe, mbèn njen ju ze bo jù là. Be b'a num kônkwa nsen ni.

¹³ Là Yésu tshob bo ndù: A bin bèn fà ju ze bo jù là bo. Bo tshob yi ndù: Bag ghù nda' ntu' bàn ntàn bo ngontse ndô bàa. A be ndùlala mba bag a' nèn yag tu njun jujù kà nkém yen njoṅ benntùn ni fa yi.

¹⁴ Benntùn lo be bwe nguan ntsha' tàn, Yésu tshob ghazi'te nu i ndù: Bin ghù bo tswe nsi nka, ta' nka ke ngù ben ṅam ntàn.

¹⁵ Bo ju' ntshu, ngù njoṅ yub fa tswe nsi.

¹⁶ Yésu lo' ntu' bàn ntàn mba ngontse ndô bàa, mbù' miag mi mfe kamànyam, nde'te Nsi, mbe'te, mbèn mfà ghazi'te nu i ndù bo ghabte bwoṅ benntùn.

¹⁷ Njoṅ yub fa jù njwèle. Bo lo' mbe'te mi mi a tù' là nkag ntshob bàa gham.

Bamntù Pétro

¹⁸ A be num mo' lé'njù Yésu nke nde'te Nsi tù' i, ghazi'te nu i tse'te mbaṅ i: A bètte yub ndù: Bwoṅ benntùn num nke ntshob ndù me b'a we?

¹⁹ Bo bùnte ntshob ndù: Yohané nganyu' benntùn ntse, tsemo' tshob ndù Elia, tsemo' bèn ntshob ndù: Mo' mèn netèt ghatshob ntshob Nsi tse mbwe bèn mbam num vù.

²⁰ A tshob bo ndù: Là bin num ntshob zin ndù me b'a we? Pétro bùnte ntshob ndù: O b'a Kristô z'a fe Nsi là.

²¹ Yésu tshobte yube, ntshob ndù kà bo soṅ yen nu là sàm mèn mba ntshù'.

²² Ntshob ndù: A bwô ndù Mén mèn yen nge' yàme, ghakwé mbwe, ghale'te Nsi tse ndùbndùb mba ghalèn ṅwa'ni Nsi ghua' i, nzwi i; a be mbatte lé'njù tat, a lo num vù.

²³ A lo ke ntshob njoṅ benntùn fa ndù: A be ze mèn kô nezin num yàm manze là, a gha tu wul i, nket ze fanta'tù njoṅ lé'njù fa, mbèn ntam njam àm.

²⁴ Nummbe mèn z'a kô nelem yôg se là, mb'a neghua' i, là mèn z'a ghua' yôg se num tu àm nà, mba yen mèn nà ke nelem yôg se.

²⁵ Nummbe a be ze mèn ghù njoṅ ngô njù li fa, njôg mbagte tu wul i, mbi yôg se là, mb'a' ywimt'é ke?

²⁶ Nummbe mèn z'a nsi ko tuswe num àm mba num ntshob màm nà, mba mba Mén mèn nsi ko ze tuswe num i ngelaṅ z'a nsi se' ntùm nkuni mi mba mi Tà mba mi ba Angél nelàn nà.

²⁷ Me tshob bin kua' nenùn ndù: Tsemo' benntùn netèt tse bo be nsen ni là ke nsi kwù tà nkum ngelaṅ bo yen nufen Nsi là.

Mba Yésu kaṅ ntshù mi là

²⁸ Yen tshô li lo be tôg nguan lé'njù fome, Yésu lo' Pétro, Yohané mba Yakobo, nko' nèn num mbat num nele'te Nsi.

²⁹ Ngelaṅ a ke nde'te Nsi là, se i kaṅ, nzwe tse kaṅ, nke ṅwa' neṅwa'ni.

³⁰ Tshù, Yésu nke ntshobte boa ben bàa; tshen nà na' mb'a Mosé bo Elia;

³¹ tse bo na' ṅwag ntùm nekuni, nke ntshob nu mfà num nu nenèn z'a nsi bumte num Yésu mà Yérusalém nà.

³² Mo' miaglo kebwô tshùb Pétro boa shun tse, là ngelaṅ bo lo num miaglo là, bo yen nkuni Yésu mba benntùn bàa tse bo à bo be là.

³³ Ngelaṅ tshen ben ni ke mfagte boa Yésu là, Pétro tshob yi ndù: Tà, a lo mbwô ndù be ghô nsen ni; be kut ntàb tat, mo' be yu, mo' be ze Mosé, mo' bèn mbe ze Elia. A ke lèn ju z'a tshwèt ntshob là.

³⁴ Mb'a ke ntshob tshen nu là là, mo' ndot se' ndam yub mbume. Ghazi'te nu Yésu bwôg neshu ngelaṅ tshen ben nà ke ntsho ntùm ndot là;

³⁵ ntùm ndot nze mèn tshob ndù: Yen mèn ni b'a Mén àm ze me tsho' i là, bin ke nju' i.

³⁶ Ngelaṅ yen nze là ke nke' ntshob là, Yésu tù' b'a tù' i. Ghazi'te nu i mi ntswe, ke soṅ sàm mèn ntùm tshen lé'njù là, sàm nu netèt tshu tse bo yen nà.

Mba Yésu yate mo' ngaghù ywètkebwô là

³⁷ Njù be làne, bo swe' num mbat là, mo' mà bwoṅ benntùn se' mbwe i.

³⁸ Tshù, mo' mèn netèt bwoṅ benntùn kua' neta ntshob ndù: Ngatswite, me le't'o, bù' miag mu ndôte mén àm, nummbe a b'a nda' mén ntshù' ze me ghù là.

³⁹ Mo' ywèt num ntshùb i, a kua' neta, ywèt là nyi't'é, ma' i nsi, ngù nendù nke ntum ntshu i, mbe't'é kà njôg ntum num i.

⁴⁰ Me lo nde'te mba ghazi'te nu o ndù bo ta' i, là bo ke ku'ni.

⁴¹ Yésu bùnte ntshob ndù: Zwiaṅ ba ke ghù bamntù mba ben neṅu'te, me nsi tswe bag à bin, fènte zin tà kum ngelaṅ ndùke? Lo' mén o nse' yi nsen ni.

⁴² Ngelaṅ a ke nkù'te mbaṅ Yésu là, ywètkebwô nyi't'é neta, ma' i nsi num tsha'a. Yésu tshobte ywètkebwô, mbèn njate mén nà, mfà i tàab.

Mba Yésu bèn nsoṅ vù se là

⁴³ Njoṅ benntùn fa tshàm, mfà num ze neghu' Nsi. Mba njoṅ benntùn fa ke nyàmte njoṅ tshu fa Yésu ke ngù là, a tshob ghazi'te nu i ndù:

⁴⁴ Mba bin nà, bin ju' men ntshob li kua' mebwô, njab ntù bin: Bo nsi fà Mén mèn mum mbu benntùn.

⁴⁵ Là bo ke ju' men ntshob là; men ntshob là lem ndù kà bo tshùb; bo bwôg nebètt'é nu mfà num men ntshob là.

Mèn ndùb ntùm nufen Nsi

⁴⁶ Bo to' nesoṅte netèt bo nelèn mèn z'a be mèn ndùb netèt bo là.

⁴⁷ Là Yésu lèn nkwatenu mi a be ntù bo là, ndo' metsit ménfi, nte mbaṅ i, ntshob bo ndù:

⁴⁸ Mèn z'a nsi lo' yen metsit ménfi li num lén sàm nà, mba ng'é lo' à me. Mèn z'a nsi lo' àm nà, mb'a ke ndo' à mèn z'a na' ntum àm nà. Metsit mèn z'a be netèt njoṅ zin fa là bèn mbe mèn ndùb.

⁴⁹ Yohané bùnte ntshob ndù: Tà, bag lo yen mo' mèn, a nke nta' ba ywètkebwô num lén su; bag tshèl i, nummbe bag à bo ke bèn mbe njam o.

⁵⁰ Yésu tshob yi ndù: Kà bin tshèl i, nummbe mèn z'a ke' b'a ngakeban zin nà b'a zin mèn.

Yésu mà Samaria

⁵¹ Mba ngelaṅ neko' nèn kamànyam ke ngebte Yésu là, tu wul i yen ndù a bwô a nèn Yérusalém.

⁵² A tum ghantum mbwe i, bo tam manze, nzin ntsho ntùm mo' ngô ba Samaria num nenabte dù' nezi bwe.

⁵³ Là ba Samaria ke kô nelo' Yésu, nummbe a lo ke nèn à nze Yérusalém.

⁵⁴ Ghazi'te nu Yésu, Yakobo mba Yohané be yen ndùlala, ntshob ndù: Tshùaben, o bam ndù bag tshob mbwôg swe' mfe kamànyam, nkù yub ké?

⁵⁵ Là, a kaṅ wul i njam ntshobte yube, ntshob ndù: Bin ke' lèn lèn ywèt ts'a tshwèt ntshagte zin nà.

⁵⁶ Nummbe Mén mèn lo se'e, ke b'a ndù a ghù ntù benntùn bi, là ndù a yôg yube. Bo bèn nèn ntùm mo' ngô ghua.

Mb'a bwô mèn tam njam Yésu là

⁵⁷ Ngelaṅ bo be num manze là, mo' mèn tshob Yésu ndù: M'a' ke mbwe o ntùm njoṅ dù' fa ts'o nsi ke nèn nà.

⁵⁸ Yésu tshob yi ndù: Ba mbàbndun ghù ntô mube, bon nsaṅ bèn ngù nkàn tshobe, là Mén mèn ke' ghù dù' neyab tu i bwe mfite.

⁵⁹ Yésu tshob mo' ndù: Tam njam àm. Yen ni tshob ndù: Bam me ndù me bwôgmbwe nèn ntshoṅ tàa.

⁶⁰ A tshob yi ndù: Faṅ fe ben tshoṅ tshob fe ben; là tu wul o, nèn ntshob yu à nufen Nsi.

⁶¹ Mo' mèn bèn ntshob ze yi ndù: M'a tam njam o, Tshùaben, bam me nèn ndé'te ben tse bo be ndà àm nà.

⁶² Là Yésu tshob yi ndù: Mèn z'a yab bu i num nkebsofa', mbèn ndôte mànjam nà ke' ku'ni ntùm nufen Nsi.