Lukas 4 - NTSHOB NSI

Mba Satan laṅte Yésu là

¹ Yésu dun Ywèt Nelàne, nke mfe Yordan; Ywèt Nelàn tshag i num kônkwa.

² Satan laṅt'é lé'njù ṅam nkuà. A ke jù sàm ju num tshen lé'njù là. Tshen lé'njù là be tshùa, nziku' ya i.

³ Ndùlala Satan tshob yi ndù: A be z'o b'a Mén Nsi là, o tshob sen loṅ ni kaṅ ntù' bàn.

⁴ Yésu bùnte yi ndù: Bo lo kite ndù: A ke nda' bàn bèn ghù mènntùn yôge.

⁵ Satan lo' i nèn yi nda'te nufen njù fa yi num mo' metsit ngelaṅ.

⁶ Satan tshob yi ndù: Me nsi fà yen njoṅ ngù' fa li wù boa nkuni tshen nufen nà, nummbe bo lo fà me, me ghù neta nefà mèn ze me kô là.

⁷ A be z'o vù nsi mbwe àm, ngamt'àm nà, mba njoṅ tshen tshu là fa nsi tù' tsho.

⁸ Yésu bùnte ntshob yi ndù: Bo lo kite ndù: O nsi ke vù nsi ghamte Tshùaben Nsi o, ke fa' be nda' yi tù' i.

⁹ Satan lo' i nèn yi Yérusalém, nte i num tu Ndà Nsi, ntshob yi ndù: A be z'o b'a Mén Nsi là, o tsho' nsen ni ngwù mànsi.

¹⁰ Nummbe bo lo kite ndù: A nsi tshob ba Angél tse ndù bo ke mbéb o.

¹¹ Bo nsi kel o mum mbu mube, ndù k'o tsho' ku o num loṅ.

¹² Yésu bùnte ntshob yi ndù: Bo lo tshob ndù: Kà laṅte Tshùaben Nsi o.

¹³ Satan be miagte njoṅ manze laṅte fa, ndo mbaṅ i, tà nèn nkum num mo' ngelaṅ.

Fa' Yésu mà Nazarèt

¹⁴ Ntùm neta Ywèt Nelàne, Yésu bèn njam Galiléa. Lén se ju'ni ntùm njoṅ ngô fa.

¹⁵ A nke ntswite ntùm sinagogue tshobe, njoṅ benntùn fa nke ngamt'é.

¹⁶ A nèn Nazarèt dù' z'a ku' bwe là, ntsho sinagogue lé'njù Sabbat, mb'a be ze matnu là, a lo nsi num nesiaṅe.

¹⁷ Bo fà ṅwa'ni ngatshob ntshob Nsi Esaya yi. A be ké'te ṅwa'ni nkum dù' ze bo na' nkite bwe ndù:

¹⁸ Ywèt Tshùaben num num àm, nummbe a lo yo' àm ndù me tshob nkùn mebwô bwoṅbwoṅ. A lo tum àm ndù me ghù ntù benntùn ts'a be'te là yate, ndù me tshob ba kuan ndù bo tswe yub tu, ndù ba mfùmiag yene, ndù benntùn tse bo tshwèt ngùtni yub là nèn tsiaṅte.

¹⁹ Mbèn ntshob ngu'njù mbotni z'a fe Tshùaben nà.

²⁰ A be bote ṅwa'ni, mfà ngafa', ntswe nsi; miag njoṅ benntùn fa ntùm sinagogue te num i.

²¹ A to' netshob bo ndù: Ju ze bo na' nkite là bumte sènni ntùm ntoṅ mine.

²² Njoṅ benntùn fa nke nkwé nta mi, mbèn nyàmte ntshob mi a ke ntum ntshu i ndù a dun kondèn nà. Bo nke ntshob ndù: Yen ni ke b'a mén Yosèf ké?

²³ A tshob bo ndù: Me lèn ndù bin nsi tshob yen tànkùt li me ndù: Ngaghù fu, yate tu wul o yu tu. Njoṅ nu fa bag ju' ndù o ghù Kapernaum nà, bèn ngù be ndaṅndaṅ nsen ni ntùm yu ngô.

²⁴ A bèn ntshob bo ndù: Kua' nenùne, me tshob bin ndù: Sàm ngatshob ntshob Nsi ke bwe ze bo num ndo' i mebwô ntùm ngô i là.

²⁵ Me tshob bin ndù a ne mb'a kua' nenùn ndù fôg bènnzwi lo yàm ntùm ngô Israél ntùm tse lé'njù Elia, ngelaṅ kamànyam fùn ngu' tat ṅwù ntôge, nziku' ndùb be ntùm njoṅ ngô fa là.

²⁶ Bo lo ke tum Elia mbaṅ mba ze ntshù'; là k'a ke nda' ju mo' mfôg mènnzwi Sarepta, ntùm ngô Sidon.

²⁷ Be ndaṅndaṅ ghankin lo yàm Israél ngelaṅ Elisa ngatshob ntshob Nsi. Sàm ta' i lo ke yate, là mb'a nda' Naaman, mén Siria.

²⁸ Bo be ju' men ntshob là, njoṅ yub fa bo be sinagogue là dun yantù.

²⁹ Bo lo nsi ntèn Yésu, ntum yi ntùm ngô, nèn tà nkum ntshùa mbat ze bo kut ngô yub bwe là, num netèn i ma' mànsi.

³⁰ Là Yésu tôg netèt bo, nèn tse.

Mba Yésu yate ngaghù ywètkebwô là

³¹ A swe' nèn Kapernaum, mo' ngô ntùm Galiléa, ntswite ntùm bwe lé'njù Sabbat.

³² Bo nyàmte nu z'a tswite là neshu, nummbe ntshob mi lo dun ngù'.

³³ Mo' mèn lo be ntùm sinagogue ndù a ghù ywètkebwô, a kua' nze neta ntshob ndù:

³⁴ E! Ke z'o ghù ntùm yag nu Yésu ze Nazarèt? O se' a nebagte yag ké? Me lèn mèn z'o be yi là, o b'a mèn nelàn z'a fe Nsi là.

³⁵ Yésu tshobt'é ntshob ndù: Mi ntswe, tum num i. Ywètkebwô ma' i nsi netèt benntùn, ntum num i, ke ghù sàm nukebwô yi.

³⁶ Njoṅ benntùn fa tshàm, nke ntshob bo bo ndù: A ke lèn ntshob li à? Nummbe a num ndo' ngù' mba neta, ntô ba ywètkebwô yi, bo tum.

³⁷ Lén se be neju'ni ntùm njoṅ dù' fa ts'a ghebte mbaṅ bwe là.

Mba Yésu yate màntse Pétro là

³⁸ Là Yésu be tum sinagogue, nèn ntsho ndà Simon; màntse Simon lo ghù kua' saṅtewut ndùb num i, bo bètte Yésu ndù a yat'é.

³⁹ Yésu ben wul i num i, ntshobte saṅtewut là, a tum num i. A be lo nsi be ngelaṅ mbile, nto' nefa' bo.

Neyate nzenze

⁴⁰ Ngelaṅ lagnyam ke mbi là, njoṅ benntùn fa bo ghù ghangokèt tse ngokèt nzenze tshùb yub là, lo' yub nse' yi mbaṅ Yésu. A yab mbu mba num we lo kà nke njate yube.

⁴¹ Ba ywètkebwô nke ntum num tse yàme, nkua' ntshob ndù: O b'a Mén Nsi. A tshobte yube, ke bam ndù ywètkebwô tshob nu, nummbe bo lèn ndù a b'a Kristô.

⁴² Là njù be làne, a tum nèn mo' dù' banban; bwoṅ benntùn diag i, nèn nkum num i, ntswe bo à bo ke kô ndù a bèn nèn mfaṅ yube.

⁴³ Là, a tshob bo ndù: A bwô ndù me soṅ nkùn mebwô nufen Nsi mba tsemo' ngô yub, nummbe a ju ze bo na' ntum àm num bwe là.

⁴⁴ A nke ntshob ntshob Nsi ntùm ba sinagogue ba Yuda.