Lukas 24 - NTSHOB NSI

Mba Yésu lo num vù là

¹ A be num mbwe lé'njù ntùm ngabnjù, bènnzwi tum kua' mà nkebnjù, ndo' mfèt labinda ze bo nabte là nèn yi mà ntshufi.

² Bo yen ndù bo bwoṅte loṅ nèn yi ngùanesà mbaṅ fi.

³ Bo tsho ntùm fi ke yen fe Tshùaben Yésu.

⁴ Nu tshùa yube, bo to' netshàme; tshù, tsemo' ben bàa se' ndù bo ma' nzwe ṅwa'ṅwa' num bo.

⁵ Bwôg tshùb tshen bènnzwi là, bo ben se tshob nsi. Tshen ben bàa là tshob bo ndù: Numke bin nke ndiag mèn z'a be ntùn nà netèt fe ben à?

⁶ A ke' b'a nsen ni, a bam num vù, bin kwimte ju z'a na' ntshob bin ngelaṅ z'a ke' Galiléa,

⁷ nke ntshob ndù: A bwô ndù bo fà Mén mèn mbu ben kebwô, bo kwimt'é num fanta'tù, a bam num vù mbatte lé'njù tat là.

⁸ Ndùlala bo kwimte men ntshob Yésu là.

⁹ Ngelaṅ bo lo ntshufi mbèn njam nà, bo soṅ njoṅ tshen nu là fa tse ntshob ntshù' gham mba tsemo' ben.

¹⁰ A na' mb'a Marta ze Magdala, Yohanà, Maria mà Yakobo mba tsemo' bènnzwi tse bo à bo be là. Bo na' mbèn nsoṅ ghantum yen nu là.

¹¹ Là men ntshob là tswe bo à mba njem nà, bo ke bam tshobe.

¹² Pétro lo nsi, nkù nde nèn ntshufi mben wul i, ndôte ntùm fi, njen nda' ba nzwe ntùm fi; a bèn njam la' i, nke ntshàm num nu z'a tshùa là.

Ghazi'te nu num manze Emmaus

¹³ Tshù, be mum lé'njù mbile, ben bàa netèt bo nke nèn ntùm mo' ngô lén se Emmaus, z'a b'a mfi' ṅam ntôg nelo ndaṅ mbu'nze Yérusalém nà.

¹⁴ Bo nke ntshobte netèt bo num njoṅ nu fa ts'a na' ntshùa là.

¹⁵ Ngelaṅ bo ke ntshobte, mbèn nke nsoṅte ntshob netèt bo là, tu wut Yésu kù'te nse' mbaṅ bo, bo à bo nke nène.

¹⁶ Là miag mub fam kà bo ke lèn i.

¹⁷ A tshob bo ndù: A nu ke tse bin tshwèt nsoṅte netèt bin num manz'à? Bo tsin ntùm nenywine.

¹⁸ Mo' mèn netèt bo, lén se Kléopas bùnte ntshob yi ndù: O b'a nda' ze Yérusalém tù' wù z'o ke' lèn nu z'a tôg be ntùm tshen lé'njù li là ké? A tshob bo ndù: Mba kua' nu ke?

¹⁹ Bo bùnte yi ndù: Nu z'a tshùa num Yésu ze Nazarèt z'a na' mbe neta ngatshob ntshob Nsi ntùm mfa' mi mba ntshob mi mbwe njoṅ benntùn fa là.

²⁰ Tshag ghale'te Nsi tse ndùbndùb mba tshag ghakeb ntsha lo tsho't'é, nkeb ntsha ndù bo zwi i, nkwimt'é num fanta'tù.

²¹ Bag lo ke nywinte ndù a b'a yi z'a nsi tshu' ba Israél là; tshù, a b'a mbatte lé'njù tat li mba tshen nu là tshùa là.

²² A b'a nenùn ndù tsemo' bènnzwi netèt bag nèn ntshufi, mbèn njam, ntshob mo' nu bag, a kuni yage, ntshob ndù bo nèn ntshufi kua' mà nkebnjù ke yen fe i bwe.

²³ Mbèn njam ntshob ndù bo yen ba Angél bo tshob bo ndù a b'a ntùn.

²⁴ Tsemo' ben netèt bag nèn ntshufi, njen njoṅ tshu fa mba bènnzwi tshob là, là ke yen Yésu.

²⁵ A tshob bo ndù: Kagni, benntùn tse ntù tshob lèt nebam njoṅ nu fa ghatshob ntshob Nsi tshob là.

²⁶ A lo ke bwô ndù Kristô yen nge' kà ntsho ntùm nkuni mi ké?

²⁷ A to' num Mosé nèn nkum num ghatshob ntshob Nsi fa, ntote njoṅ nu fa tse bo kite mfà num i là bo.

²⁸ Ngelaṅ bo ke ngebte mbaṅ ngô bo ke nèn bwe là, Yésu ghù mb'a nèn à tà ngùanesà là.

²⁹ Là bo nànt'é, ntshob ndù: Bag à bin tswe, a tù' b'a mfetnjù, njù à sène. A tsho ndà, ntswe bo à bo.

³⁰ Ngelaṅ bo à bo tswe num téblé là, a lo' bàn nde'te Nsi, mbe'te, mbèn mfà bo.

³¹ Miag mub ké', bo bèn ndèn i, là, a bi netèt bo.

³² Bo tshob bo bo ndù: Ntù be lo ke kù ntùm bwe, ngelaṅ z'a lo nke ntshob be num manze, ngelaṅ z'a lo nke ntote ṅwa'ni Nsi be là ké?

³³ Bo lo be num yen ngelaṅ nà, mbèn njam Yérusalém, ntèt tse ntshob ntshù' gham, ndù bo tse'te boa ben tse bo à bo ke mbe là.

³⁴ Bo tshob ndù: Tshùaben lo num vù kua' nenùne, a la'te wul i Simon.

³⁵ Bo bèn nsoṅ yub nu z'a lo ntshùa bo num manze, bo mba bo lèn i ngelaṅ z'a be'te bàn mfà bo là.

Mba Yésu ṅwag tse ntshob ntshù' gham nà

³⁶ Ngelaṅ ze bo ke ntshobte netèt bo là, tu wut Yésu ṅwag ntsin netèt bo.

³⁷ Bo vèt, mbwôge, nke nkwate ndù bo yen ywèle.

³⁸ A tshob bo ndù: Numke bin mvètt'à? Numke magte nko' ntùm ntù tsin à?

³⁹ Bin yen mbu màm bo nku màm njene; a b'a kua' me. Bin kwag àm, njen ndù ywèt ke' be ghù mbàb bo mvôge, mba bin yen ndù me ghù là.

⁴⁰ A tshob ndùlala, nda'te mbu mi mba nku mi bo.

⁴¹ Mba bo ke ntsiaṅte ke yoṅ mbam tshobe, mbèn nke ntshàm nà, a tshob bo ndù: Bin ghù ju nejù nsen ni ké?

⁴² Bo fà kam ngontse neton yi,

⁴³ a kwé mfèt mbwe bo,

⁴⁴ ntshob bo ndù: Tshù men ni b'a ntshob mi me na' ntshob bin ngelaṅ ze me ke' netèt bin nà ndù: A bwô ndù njoṅ tshu fa tse bo na' nkite num àm ntùm ntshù' Mosé, ntùm ṅwa'ni ghatshob ntshob Nsi mba ntùm ṅwa'ni Yobkwi là bumte.

⁴⁵ A gha' zenu yub num neju' ṅwa'ni Nsi,

⁴⁶ ntshob bo ndù: Ndùlala bo lo kite ndù Kristô a' yen nge', mbam num vù mbatte lé'njù tat;

⁴⁷ bo nsi tshob nu nekaṅ ntù num lén se, ndù Nsi lagte nukebwô benntùn, ntùm ngô fa, nto' à Yérusalém.

⁴⁸ Bin b'a ghakwénta tshen nu là.

⁴⁹ Tshù, me nsi tum ju ze Tàa na' nka' là bin. Mba bin nà, bin tswe ntùm ngô, tà nkum ngelaṅ bo nsi ma' neta mfe tù num bin nà.

Mba Yésu ko' nèn kamànyam nà

⁵⁰ A lo' yub nèn yi tà nze Bètania, mbù' mbu mi, naṅ mbotni num bo.

⁵¹ Ngelaṅ z'a ke naṅ mbotni num bo là, a fagte bo à bo, nko' mfe kamànyam.

⁵² Bo be miagte neghamt'é, ndo mbèn njam Yérusalém, ndù bo dun tsiaṅte.

⁵³ Bo nke mbe njoṅ ngelaṅ fa ntùm Ndà Nsi, nke ngamte Nsi.