Lukas 22 - NTSHOB NSI

Nkùnkù num Yésu

¹ Lé'njù jùa bàn keko', ze bo ke ntsiaṅ ndù Pasa là ghebte.

² Ghale'te Nsi tse ndùbndùb mba ghalèn ṅwa'ni Nsi nke ndiag kua' mba bo zwi Yésu yi là, nummbe bo lo ke mbwôg benntùn.

Mba Yuda ghù ndàm num Yésu là

³ Satan tsho ntù Yuda ze bo ke ntsiaṅ i ndù Iskariot, mo' mèn netèt tse ntshob bàa gham nà.

⁴ Yuda nèn ntèt ghale'te Nsi tse ndùbndùb mba kam ba soyé bo à bo nabte mat mb'a nsi fà Yésu bo là.

⁵ Tshen ben ni tsiaṅte, nabte nefà nkàb yi.

⁶ A bam, nke ndiag manze mebwô z'a nsi tshùa bwe kà fà i bo, bwoṅ benntùn ke lèn nà.

Jujù Pasa. Jujù nelàne

⁷ Lé'njù bàn keko' z'a bwô ndù bo zwi bon njùmbwe Pasa num ju nele'te Nsi là se'.

⁸ Yésu tum Pétro mba Yohané, ntshob ndù: Bin nèn nabte jujù Pasa, ndù bag bin jù.

⁹ Bo tshob yi ndù: O kô ndù bag nabt'é à yà?

¹⁰ A bùnte bo ndù: Bin nsi be tsho ntùm ngô, bumte bin à mén mandum ndù a ket tshaṅ ntse, bin tam njam i, nèn nkum ndà z'a tsho bwe là, ntshob tà yen ndà là ndù:

¹¹ Ngatswite tshob wù ndù: To'ndà ze me jù Pasa bwe bag à ghazi'te nu àm nà b'a yà?

¹² Tu wul i nsi la'te to'ndà ndùb bin mfe tù, ndù a nabte kua' mebwô; a b'a bwe là ze bin nsi nabte njoṅ tshu fa là.

¹³ Bo nèn, njen ju ze Yésu tshob bo là be ndaṅndaṅ; mbèn nabte jujù Pasa.

¹⁴ Ngelaṅ ku', Yésu tswe téblé boa ghantum tse.

¹⁵ A tshob bo ndù: Ntùm nekù ntù, me kô kua' nejù Pasa li bag à bin, kà njôg njen nge'.

¹⁶ Nummbe me tshob bin ndù: Me ke nsi bèn jù i, tà nkum ngelaṅ z'a nsi bèn bumte ntùm nufen Nsi là.

¹⁷ A lo' ntu' ndu', nde'te Nsi ntshob ndù: Bin ko là ngabte netèt bin.

¹⁸ Nummbe me tshob bin ndù: Me ke bèn nu ndu' mi a fe ntùm nkùa là, tà nkum ngelaṅ ze nufen Nsi se' là.

¹⁹ A bèn ndo' bàn, nde'te Nsi, mbe'te mfà bo, ntshob ndù: Yen ni b'a wul àm ze bo fà num bin nà, [bin ke ngù yen ni, nke nkwimt'àm yi.

²⁰ Jujù be mi, a fà ntu' ndu' bo be ndaṅndaṅ ntshob ndù: Yen ntu' li b'a kàn nswe ntùm lem tshàm tse bo fètte num tu bin nà.]

²¹ Tshù, bag ngaswèn àm tshwèt ntshag mbu num téblé.

²² Mén mèn ke nèn à mba Nsi tshob là; là, nge' tu mèn yen nà ze bo nsi tshùa num i kà swèn i là.

²³ Ghazi'te nu i to' nebètte netèt bo, mèn z'a be a ghù yen nu là là.

Mèn ndùb b'a we

²⁴ Bo soṅte ntshob netèt bo nelèn mèn ze be bo lo' i mba mèn ndùb là.

²⁵ Yésu tshob bo ndù: Fenfen ngô num ntô i, ben tse bo ghù ngù' num i là, bo nke ntsiaṅ yub ben ndùbndùb.

²⁶ Là mba bin nà, kà bin ghù be ndaṅndaṅ, a bwô ndù mèn ndùb netèt bin lo' wul i mba metsit mèn nà, mèn z'a tshwèt ntô là be mba mèn z'a tshwèt mfa' là!

²⁷ A zit mèn be mèn ndùb à, mèn z'a be num téblé, ke mèn z'a tshwèt mfa' l'à? Ke mèn z'a be téblé là ké? Là me be netèt bin à mba mèn z'a tshwèt mfa' là!

²⁸ Bin lo ghô me, bag à bin fènte ntùm tshàm laṅte.

²⁹ Me lé' nufen Nsi bin, mba Tàa na' ndé' me yàm nà.

³⁰ Bin nsi jù bèn nu num téblé sàm, ntùm nufen sàm; bin nsi tswe num ndiaṅfen, ke tsho'te ntsha tunndà ba Israél ntshob bàa gham.

Mba Pétro nsi gha Yésu là

³¹ Simon, Simon, Satan lo lon zin num neke'te zin mba bo be nke'te ngefet là;

³² là m'a le'te Nsi num tu o ndù kà bamntù o bot. Ngelaṅ ze tu wul o nsi kaṅ ntù o là, o ghù fèt tsho ghù tànntù.

³³ Simon tshob yi ndù: Tshùaben, me b'a manze nenèn ndàtsha mba nekwù bag wù.

³⁴ Yésu tshob ndù: Me tshob wù, Pétro ndù: Kù'ngab ke nsi tô sènni ke be ndù o gha àm yoṅ tat ndù o ke' lèn àm.

³⁵ A tshob ghazi'te nu i ndù: Ngelaṅ ze me tum zin ke mfe', ke bàm, ke nketo' là, bin lo bwoṅ ju ké? Bo tshob ndù: Nga.

³⁶ A bèn ntshob bo ndù: Là ndonni, mèn z'a ghù mfe' là lo'o, be ndaṅndaṅ mba mèn z'a ghù bàm nà. A bwô ndù mèn z'a ke' ghù ṅwi là swèn kummbaṅ se, ndo' njun ṅwi yi.

³⁷ Nummbe me tshob bin ndù a bwô men ntshob mi bo na' nkite ndù: Bo yab i netèt ba fimntshu là bumte num àm. Nummbe njoṅ nu fa ts'a tshwèt nse' num àm nà, tù' nebumte.

³⁸ Bo tshob yi ndù: Tshùaben, tshù ṅwi li bàa. A bùnte bo ndù: A ku'u.

Gétsémané

³⁹ Yésu tum nèn num mbat nten mb'a be ze matnu là. Mba ghazi'te nu i tam njam i.

⁴⁰ A kum num yen dù' là, ntshob bo ndù: Bin le'te Nsi ndù kà bin tsho ntùm laṅte.

⁴¹ Tu wul i kù'te mbaṅ bo, nèn nguan ma' loṅ, nkwim ntunkekwi' mi nsi, nde'te Nsi,

⁴² ntshob ndù: Tà, a be z'o bam nà, o lo' yen ntu' li nèn yi ngùanesà mbaṅ àm. Là kà bam ndù yàm nekô bumte, là yu nekô. [

⁴³ Mo' Angél fe kamànyam, ṅwage, mfà neta yi.

⁴⁴ Yésu to' nema' ntsho bo vù, nde'te Nsi neta; ze'ni a ke ntum num i là, tswe mba lem nà, nke ntshùmte nsi.]

⁴⁵ A be miagte nele'te Nsi, ndo mbèn njam mbaṅ ghazi'te nu i, njen yub ndù bo tshwèt nzi ntùm nenywine.

⁴⁶ A tshob bo ndù: Numke bin nke nzi à? Bin lo nsi, mbèn nde'te Nsi ndù kà bin tsho ntùm laṅte.

⁴⁷ Ngelaṅ z'a ke nke' ntshob là, mo' bwoṅ benntùn ṅwag ndù mèn ze bo ke ntsiaṅ i ndù Yuda, mo' mèn netèt tse ntshob bàa gham nà kwé mbwe bo, nkù'te nse' mbaṅ Yésu nyô nge' mi.

⁴⁸ Yésu tshob yi ndù: Yuda, o lo' à nenyô nge' kà swèn Mén mèn yi ké?

⁴⁹ Benntùn tse boa Yésu na' mbe là be yen nu z'a nsi se' là, ntshob yi ndù: Tshùaben, bag wat yub ké?

⁵⁰ Mo' mèn netèt bo lab ngafa' nkam ngale'te Nsi, nkeb toṅ i ze zwim.

⁵¹ Yésu bùnte ntshob ndù: Bin tsine! Nkwag toṅ i, njat'é.

⁵² Ntshob ghale'te Nsi tse ndùbndùb, kam ghabéb Ndà Nsi mba ghakwé mbwe tse bo se' nelo' i là ndù: Numke bin ntum ndo' ṅwi mba nzwit mba me b'a fimntshu l'à?

⁵³ Njoṅ lé'njù fa, bag à bin lo ke mbe ntùm Ndà Nsi, bin ke nyit mbu num àm, là, a zin nyam ni, mba neta njame.

Yésu mbwe Kaïfa. Mba Pétro gha Yésu là

⁵⁴ Bo tshùb Yésu ndo' i nèn yi ntùm ndà ngale'te Nsi ze ndùb. Là Pétro nke mbwe Yésu tà ngùanesà.

⁵⁵ Bo kwé'te mbwôg tètla', ntswe mbaṅ bwe, mba Pétro tswe netèt bo.

⁵⁶ Mo' ngafa' ze mènnzwi yen mba Pétro tswe nsi mbaṅ mbwôg là, ndôt'é kua' mebwô, ntshob ndù: Mba yen mèn ni lo be bo yi.

⁵⁷ Là Pétro gha Yésu, ntshob ndù: Mènnzwi, me ke' lèn i tshàm.

⁵⁸ A be ghubte, mo' bèn njen Pétro, ntshob yi ndù: Mba wù yu b'a mo' mèn yub. Pétro tshob ndù: Mandum, a ke tse me.

⁵⁹ A be tshùa nguan ta' nyam, mo' bèn nse' ntshob ndù: Kua' nenùne, mba yen mèn ni lo be bo yi, nummbe a b'a ze Galiléa.

⁶⁰ Pétro bùnte ndù: Mandum, me ke' lèn ju z'o tshwèt ntshob là. Be ngelaṅ mbile, a ke yoṅ miagte netshobe, kù'ngab tô.

⁶¹ Tshùaben kaṅ wul i njam ndôte Pétro. Pétro kwimte ntshob mi Tshùaben tshob yi ndù: Kù'ngab nsi be tô sènni ndù o à gha àm yoṅ tat là,

⁶² ntum njù, nkua' neshu.

⁶³ Benntùn tse bo ke mbéb Yésu là, tshabt'é, ndab i,

⁶⁴ nkut miag mi kam nzwe, nke mbètt'é ndù: Tshobe, we z'a lab o à?

⁶⁵ Bo tshabt'é kua' mà yàme.

⁶⁶ Njù be làne, ghakwé mbwe ntùm ngô, ghale'te Nsi tse ndùbndùb mba ghalèn ṅwa'ni Nsi tse'te, ngù bo lo' Yésu, nse' yi ntùm yub ndàntsha,

⁶⁷ ntshob yi ndù: A be z'o b'a Kristô là, o tshob bag! A bùnte bo ndù: A be ze me tshob bin nà, mba bin ke nsi bame.

⁶⁸ A be ze me bètte zin nu là, mba bin ke nsi bùnte.

⁶⁹ Fe ndonni, Mén mèn nsi tswe num bag bu neta Nsi ze zwim.

⁷⁰ Bo tshob njoṅ yub fa ndù: Ndùlala o b'a Mén Nsi ké? A bùnte bo ndù: A bin bèn ntshob ndù me b'a yi.

⁷¹ Là bo tshob ndù: Be bèn ndiag kwénta numke? Nummbe mba be ze be ju' à be kua' ntshu i.