Lukas 21 - NTSHOB NSI

Jule'te Nsi mfôg mènnzwi

¹ Yésu bù' miag mi njen ghankàb tse bo ke ma' tshob tshu nele'te Nsi yi ntùm koṅ nkàb là.

² A yen mba mo' mbwoṅ mfôg mènnzwi z'a ma' nkeba mbàa là.

³ A tshob ndù: Kua' nenùne, me tshob bin ndù yen mbwoṅ mfôg mènnzwi li ma' ntshùa njoṅ benntùn fa.

⁴ Nummbe njoṅ yub fa sô bag ju à num z'a kwi'te num nkàb yub là kà ma' ntùm koṅ tshu nele'te Nsi yi, là yen mfôg mènnzwi li, sô ntùm bwoṅ i, njoṅ tshu fa ts'a na' ngù num nelo' njôg yi là, kà ma' ntùm koṅ.

Nesate Ndà Nsi. Miagte ngelaṅ

⁵ Tsemo' ben tshob mfà num ndoṅ boa tshu neghamte tse bo na' ndo' nabte Ndà Nsi yi là. Yésu tshob bo ndù:

⁶ Ju ze bin tshwèt njen nà, tsemo' lé'njù nsi se'e, tse bo ke nsi faṅ loṅ num loṅ ke sate là.

⁷ Bo bètt'é ndù: Ngatswite, tshen tshu là nsi se' à zit ngelaṅ à? Lèn z'a nsi la'te ndù tshen tshu là tù' nebumte là nsi b'a ke?

⁸ A tshob ndù: Bin bam nà ndù kà bo fùte zine, nummbe benntùn yàm nsi se' lo' lén sàm tshob ndù: A b'a me bèn mbe Kristô, mba ndù ngelaṅ tshwèt ngebte, kà bin bwe yube!

⁹ Ngelaṅ bin nsi ju' nu ntsho mba nu totetu là, kà bin vètte, nummbe a bwô ndù tshen tshu là bwôgmbwe nse'e, a ke' yoṅ mb'a kua' miagte nu.

¹⁰ A bèn ntshob ndù: Mo' ngô nsi lo, ma' mo' ngô ntsho; mo' nufen nsi lo, ma' mo' nufen ntsho;

¹¹ tsha' nsi nyi'te kua' mà yàme, ngokèt mba nziku' be ntùm dù' nzenze; tshu nefét wut mba nsà ndùbndùb tum mfe kamànyam.

¹² Là tshen nu li nsi be se' ndù bo à tshùb zine, ntsho' nku min kebàn, bo nsi fà zin ntùm ba sinagogue, bo nsi ma' zin ntùm ndàtsha, bo nsi nèn bin mbwe fenfen mba ngomna num lén sàm.

¹³ Tshen nu là nsi se' bin ndù bin kwé nta.

¹⁴ Bin yab ntùm ntù tsin ndù bin ke bwôgmbwe nabte nu bin tshob là.

¹⁵ Me nsi bèn fà ntshob mi a dun zenu là bin, mi ghakeban tsin ke' ku'ni nebèn ntshùa zin nà.

¹⁶ Tà tsin mba mà tsine, fèt tsine, tunndà zine, mba shun tsin nsi ghù ndàm num bin. Bo nsi ghù tsemo' netèt bin kwù.

¹⁷ Njoṅ benntùn fa nsi bàn zin num lén sàm.

¹⁸ Là mba ntàn nyiaṅtu zin ntshù' ke nsi bi.

¹⁹ A nsi tshùa num zin nefènte kà bin kwé yôg sine.

²⁰ Ngelaṅ bin nsi yen ntshu ntsho diaṅ Yérusalém mbum nà, bin lèn ndù ze nebagte ghebte.

²¹ A bwô ndù ben tse bo be Yudéa là kù nèn num mbale, ben tse bo nsi be mà tshwèt là, kà bo bèn njam ntùm ngô.

²² Nummbe tshen lé'njù là b'a lé'njù yagte mba'a, lé'njù tse njoṅ tshu fa bo na' nkite là bumte là.

²³ Bènnzwi tse bo nsi be jùm nà mba tse bo tshwèt nyô bon nà, nsi b'a ntùm nge' num tshen lé'njù là. Nummbe nge' ze ndùb nsi be num tsha'a, mà yantù ndùb be num njoṅ benntùn fa.

²⁴ Bo nsi vù num ntshùag ṅwi, bo lo' yub ngù kuan yi netèt ngôngô. Ghakelèn Nsi nsi nyiaṅte Yérusalém nku tà kum num ngelaṅ yub nemiagte nsi bumte là.

²⁵ Ba lèn nsi tum num lagnyam, maṅwù mba nsa. Bwôg nsi tshùb ngôngô num nsitsha'a, tu tshob tshu' ngelaṅ dibantse tshu' boa fetntse là.

²⁶ Benntùn nsi kwù bwôg ntùm nebéb tshu ts'a nsi se' mum njù là, nummbe neta mfe kamànyam nsi nyi'te.

²⁷ Bo nsi yen Mén mèn se' ntùm ndot boa neta mba nkuni mi yàme.

²⁸ Ngelaṅ tshen nu là nsi to' nese' là, bin tsiagte wut tsine, mbù' tu tsine, nummbe netshu' zin ghebte.

²⁹ A tshob mo' tànkùt bo ndù: Bin lôte nga'lone, boa memo' ntù fa.

³⁰ Ngelaṅ nkaṅ mi num ntob là, bin be yene, ndèn ndù dum ghebte.

³¹ Be ndaṅndaṅ, mba bin zin, ngelaṅ bin nsi yen tshen tshu là se' là, bin lèn ndù nufen Nsi ghebte.

³² Kua' nenùne, me tshob bin ndù yen zwiaṅ benntùn ni ke nsi tôge, ke be ndù njoṅ tshen tshu là fa se'e.

³³ Kamànyam mba tsha' nsi tôge, là ntshob màm ke nsi tôge.

³⁴ Là bin bam nà num tu wut tsine, mbwôg ndù kà ntù tsin bot ntùm nejù yàme, ntùm nebum ndu', ntùm nelab wut num yôg sin ntùm yen njù li, mba ndù kà sen lé'njù là be ṅwag num bin, bin ke lèn.

³⁵ Nummbe a nsi se' à mba fot là, ghom njoṅ benntùn fa num nsitsha'a.

³⁶ Bin zi tshùalo, nde'te Nsi njoṅ ngelaṅ fa, ndù bin ku'ni nekù tshen tshu là ts'a nsi se' là, mbèn nse' njôg mbwe Mén mèn.

³⁷ Yésu lo ke ntswite nu njoṅ mbwôgtshù fa ntùm Ndà Nsi, là, a be mfetnjù, a tum nèn nzi à num mbat ze bo ke ntsiaṅ mbat nten nà.

³⁸ Njoṅ benntùn fa lo ke nse' Ndà Nsi kua' mà nkebnjù, ntèt Yésu bwe, num neju' i.