Lukas 2 - NTSHOB NSI

Mba bo bwe Yésu là

¹ A lo be num yen ngelaṅ nà, Kàsà Augusto fà ntshù' ndù bo siaṅ njoṅ benntùn fa ntùm njù.

² Yen mbwe nesiaṅ benntùn nà na' mb'a ngelaṅ Kirinia na' mbe ngomna mà Siria là.

³ Njoṅ benntùn fa nèn ndù bo kite lén sube, mba we lo ntùm ko' ngô i.

⁴ Mba Yosèf lo ze Galiléa ntùm ngô Nazarèt, nko' nèn Yudéa ntùm ngô David ze lén se be Bétléhém nà; nummbe a na' mb'a mèn ntùm tunndà David.

⁵ A nèn ndù bo kite lén se bo se Maria nzwi i z'a be jùm nà.

⁶ Ngelaṅ bo be Bétléhém nà, lé'njù nebwe ku' Maria.

⁷ A bwe tuswe i ze mandum, ndam i kam nzwe njab i ntùm let jujù ba nyàm, nummbe dù' lo ke be bo ntùm ndà ba ghùn.

⁸ Tsemo' ghakwé mbwe lo be yen dù' là, nke ntswe tshwèt, mbéb mbwe tshob tèttswe'.

⁹ Tshù, mo' Angél Tshùaben ṅwag ntsin mbaṅ bo, nkuni Tshùaben ziag num miag mube, bo bwôg kua' neshu.

¹⁰ Angél tshob bo ndù: Kà bin bwôg, nummbe me se' soṅ zin à nkùn mebwô ze tsiaṅte ndùb z'a nsi be ze njoṅ benntùn fa là.

¹¹ Tshô là b'a ndù: Bo bwe ngayôg benntùn sènni ntùm ngô David mfà bin; a b'a Kristô, mbe Tshùaben.

¹² Lèn ze bin nsi lo' lèn i yi là b'a ndù: Bin nsi yen ménfi ndù bo lam i kam nzwe, njab ntùm let jujù ba nyàm.

¹³ Be ngelaṅ mbile, mo' bwoṅ Angél fe kamànyam ntamte num yen Angél là, nyàmte Nsi, ntshob ndù:

¹⁴ Ghamte be Nsi tà mfe kamànyam, fite bèn mbe num nsitsha' netèt ben tse bo bwô Nsi là.

¹⁵ Ngelaṅ ba Angél faṅ yub mbèn njam kamànyam nà, ghabéb mbwe tshob bo bo ndù: Bin ghù be nèn tà nkum Bétléhém, neyen ju z'a tume, Tshùaben soṅ be là.

¹⁶ Bo nànte nèn bwe; njen Maria, Yosèf mba ménfi ndù a nô ntùm let jujù ba nyàm.

¹⁷ Bo be yen i, nsoṅ nu ze bo tshob bo mfà num yen mén nà là.

¹⁸ Njoṅ benntùn fa bo ju' tshô ghabéb mbwe là, tshàm neshu num nu ze bo ke ntshob bo là.

¹⁹ Maria lé' njoṅ tshen nu là fa ntùm ntù i nke nkwimte.

²⁰ Ghabéb mbwe be bèn njam, nke ngamte Nsi, nyàmt'é num njoṅ nu fa bo ju' mbèn njen be ndaṅndaṅ mba bo lo nsoṅ yub là.

²¹ A lo be kum lé'njù fome, z'a bwô ndù bo si ket mén nà, bo tswi lén se ndù Yésu, lén se Angél na' mfà kà màab ndél i là.

Mba bo la'te Yésu Tshùaben nà

²² Lé'njù nelànte wut tshob mb'a be ntùm ntshù' Mosé là lo be bumte, bo lo' mén nèn yi Yérusalém num nela't'é Tshùaben,

²³ mba bo kite ntùm ntshù' Tshùaben nà ndù: Bo nsi ke mfà mbwe bon bandum fa Tshùaben.

²⁴ A bwô ndù bo bèn mfà bon mbwoṅsaṅ ke fôgtab ngab bàa lo mba ju nele'te Nsi là, mba bo tshob ntùm ntshù' Tshùaben nà.

Yobkwi Siméon

²⁵ Tshù, mo' mèn lo be Yérusalém, lén se Siméon z'a na' mbe mèn netsine, nke mbwôg Nsi, nke mbéb ngafite ntù ba Israél, Ywèt Nelàn be num i là.

²⁶ Ywèt Nelàn lo bwôgmbwe nsoṅ i ndù a ke nsi yoṅ kwù, ke be ndù a yen ngayo' mfèt Tshùaben.

²⁷ Ywèt lo tènt'é ndù a nèn nkum Ndà Nsi ngelaṅ tà Yésu mba màab lo' i nse' yi neghù ndù ju ze ntshù' ke ntshob là bumte num i là;

²⁸ Siméon kwé i mum mbu mi, ngamte Nsi ntshob ndù:

²⁹ Ndonni mba ntshob mu bumte là me Tshùaben, faṅ nkuan o ndù a nèn ntùm fite mb'o na' ntshob là.

³⁰ Nummbe miag màm yen ngayôg benntùn z'a fe wù là,

³¹ z'o nabte mbwe njoṅ ngô fa là.

³² A b'a nka' z'a nsi lànte miag ghakelèn Nsi, mbe nkuni ben tsho ba Israél là.

³³ Tà Yésu mba màab tshàm neshu num nu tse bo ke ntshob num i là.

³⁴ Siméon naṅ mbotni num bo, ntshob Maria ndù: Tshù, bo yab yen mén ni a ndù benntùn yàm netèt ba Israél tshùa num i ngwù nsi, tsemo' bèn ndo tù. A bèn mb'a lèn ze bo nsi tshabte là.

³⁵ Bi nsi sob ntù o, ndùlala ndù nkwate nu benntùn tum dù' tàyage.

Ngatshob ntshob Nsi Ana

³⁶ Mba mo' ngatshob ntshob Nsi ze mènnzwi lo be bwe lén se Ana, ngon Fanuèl ntùm tunndà Aser. A lo ywèn neshu, ngu'njù tse bèn njàme. A lo be tswe ntùm ze nandà ngon ngu'njù sammbàa,

³⁷ ntù' mfôg mènnzwi, nèn nkum num ngu' ntshob kuà ṅam fome, ke be tum Ndà Nsi, nke mfa' Nsi tèttswe' mba mbwôgtshù, ntswe nziku'u, nke nde'te Nsi.

³⁸ Mba yi lo se' num yen ngelaṅ nà, ngamte Nsi, ntshob nu njoṅ benntùn fa tse bo ke mbéb netshu' Yérusalém nà, mfà num i.

³⁹ Bo lo be miagte neghù njoṅ tshu fa mb'a be ntùm ntshù' Tshùaben nà, mbèn njam Galiléa, mà Nazarèt ngô yube;

⁴⁰ mén nà nke nku'u, nta, ndun zenu, kondèn Nsi be num i.

Yésu ngu' ntshob bàa gham ntùm Ndà Nsi

⁴¹ Tàab mba màab lo ke nèn Yérusalém njoṅ ngu'ngu' fa mum lé' jùa Pasa.

⁴² Ngelaṅ Yésu kum ngu' ntshob bàa gham nà, bo ko' nèn mfe Yérusalém mb'a be matnu mum lé'njù jùa là.

⁴³ Lé'njù jùa lo be mi, bo bèn njam, metsit Yésu tù' Yérusalém bo ke lèn.

⁴⁴ Bo nke nkwate ndù a b'a netèt ben tse bo à bo se' là, nzin ta' lé'njù nke ndiag i netèt nzwit yub boa ben tse bo à bo lènte là.

⁴⁵ Mba bo be ke yen i là, bo bèn njam Yérusalém ndiag i.

⁴⁶ A be tshùa lé'njù tat, bo yen i ntùm Ndà Nsi ndù a tswe nsi netèt ghatswite, nke nju' yube, mbèn nke mbètte yub ba nu.

⁴⁷ Njoṅ benntùn fa tse bo ke nju' nu ts'a tshwèt ntshob là, tshàm zenu i boa mi mbùnte nu neshu.

⁴⁸ Tàab mba màab be yen i, nu tshùa yube, màab tshob yi ndù: Mén àm, o ghù ndùlala num bag numke? Tàan mba me, bag yen nge' neshu nediag o.

⁴⁹ A tshob bo ndù: Bin lo nke ndiag àm numke? Bin ke' lèn ndù a bwô me be be num nu Tàa ké?

⁵⁰ Là bo ke ju' ju z'a tshob bo là.

⁵¹ A swe' bo à bo nkum Nazarèt, nke nju'ni yube, màab lé' njoṅ tshen nu là fa ntù i.

⁵² Yésu nke nku' ntùm zenu, ntùm ntsemèn, ntùm kondèn mbwe Nsi mba mbwe benntùn.