Lukas 17 - NTSHOB NSI

Ntag nzenze

¹ Yésu tshob ghazi'te nu i ndù: A be nu nefa'te ke tag ke be, là nge' tu mèn z'a nsi tshùa njam i là.

² A lo mbwô ndù bo kut loṅ bàn tô i ma' i ntùm dibantse, ntshùa mb'a be a ghù mo' metsit mén netèt tshen ni vù ntùm ywi' là.

³ Bin bam nà num tu wut tsine. A be ze mfèl o ghù nukebwô là, o tshobt'é, a be z'a kaṅ ntù i là, o lagte yi.

⁴ A be z'a ghù nukebwô wù yoṅ sammbàa num ta' lé'njù, mbèn nse' ntèl o yoṅ sammbàa ntshob ndù: Me kaṅ ntù àm nà, o lagte yi.

⁵ Ghantum tshob Tshùaben ndù: Kwi'te bamntù bag.

⁶ Là Tshùaben tshob ndù: A lo mbe ndù bin ghù bamntù mba lag metsit nzwit tù là, mba bin tshob sen tù li ndù: Tsho' nsen nà, nèn njwit wul o ntùm dibantse, mb'a ju' bin.

⁷ A be ze mo' mèn netèt bin ghù nkuan i, a be ngadù' nà, ke ngabéb mbwe lo, mb'a be a tshob yi à ndù a se' ndende ntswe téblé ngelaṅ a fe tshwèt là ké?

⁸ Mb'a ke tshob yi à ndù: Nabte jujù me, taṅ kob su, fa' me tà nkum ngelaṅ me miagte nejù, mbèn nu là, k'o njôg njù mbèn nu yu ké?

⁹ A nsi labte nkuan i mb'a ghù ju z'a tshob yi là ké?

¹⁰ Mba bin zin, ngelaṅ bin ghù ju ze bo tshob ndù bin ghù là, bin tshob ndù: Bag b'a ghafa' tse bo ke' ywimte là; bag ghù nda' ju z'a bwô ndù bag ghù là.

Ghankin gham

¹¹ Yésu be nèn Yérusalém, ntshùa netèt ngô Galiléa mba Samaria.

¹² A be kum ntshu mo' ngô, tsemo' ghankin gham nke nse' bo à bo bumte, ndù bo tsin ngùanesà.

¹³ Bo kua' ntshob ndù: Tà Yésu, nyin yage.

¹⁴ Yésu be yen yub ntshob bo ndù: Bin nèn nda'te wut tsin ghale'te Nsi. Ngelaṅ ze bo ke nèn nà, bo kaṅ ndàne.

¹⁵ Mo' mèn netèt bo be yen ndù a yate, mbèn njam, nke ngamte Nsi kua' neta,

¹⁶ ngwù nsi num nku Yésu kabkab, nke ndabt'é; yen mèn nà na' mb'a ze Samaria.

¹⁷ Yésu bùnte ntshob ndù: Njoṅ zin gham fa ke' yate ké?

¹⁸ Sàm mèn netèt bo ke' bèn njam nse' mfà ghamte Nsi ké? K'a ke nda' yen ngùn ni!

¹⁹ Ndùlala a tshob yi ndù: Lo tù, nène, bamntù o yôg o.

Mba nufen Nsi nsi se' là

²⁰ Ba Férésia bètte Yésu ngelaṅ ze nufen Nsi nsi se' là, a bùnte bo ndù: Nufen Nsi ke nsi be se' benntùn ke njen miag.

²¹ Bo ke nsi tshob ndù: Tshù, a li nsen ni, ke ndù a là nsen nà lo; nummbe, tshù, nufen Nsi b'a netèt bin.

²² A tshob ghazi'te nu i ndù: A nsi be mo' ngelaṅ bin kô neyen mo' ta' lé'njù Mén mèn, bin ke yen.

²³ Bo nsi tshob bin ndù: Tshù, a b'a nsen nà, a b'a nsen ni; kà bin nèn bwe, kà bin diag i.

²⁴ Ndaṅndaṅ mba beba'mbaṅ num nké' num mo' bag kamànyam, nèn nkum num mo' là, a b'a mba Mén mèn nsi be mum lé'njù se là.

²⁵ Là, a bwô ndù a bwôgmbwe njen nge' yàme, yen zwiaṅ benntùn ni bèn ngua' i.

²⁶ A nsi be num tse lé'njù Mén mèn ndaṅndaṅ mb'a na' mbe num tse lé'njù Noa là.

²⁷ Benntùn lo ke njù, nu, nso bènnzwi, mfà ngonngon tshob ntùm nandà, tà nèn nkum lé'njù ze Noa tsho ntùm kenu, dibambaṅ se' ngwù bo bite là.

²⁸ A nsi bèn be ndaṅndaṅ mb'a na' mbe num tse lé'njù Lot là, benntùn lo ke njù, nu, njune, nzwite, njwile, nkule;

²⁹ là lé'njù ze Lot tum Sodom nà, mbaṅ mbwôg mba njôg swe' kamànyam, ngwù, ngù bo bite fafa.

³⁰ A nsi b'a be ndaṅndaṅ mum lé'njù ze Mén mèn nsi tswite wul i là.

³¹ Mum sen lé'njù là, mèn z'a nsi be num tuba', tshu tse be ntùm ndà là, k'a swe' ntsho bwe num nelo' ju; be ndaṅndaṅ, mèn z'a nsi be mà tshwèt là, ke nsi bèn njam.

³² Bin kwimte nzwi Lot.

³³ Mèn z'a diag nelem yôg se là, mb'a neghua' i, mèn z'a ghua' yôg là, mb'a neyôg yôg i.

³⁴ Me tshob bin ndù: Be num yen tèttswe' là, benntùn bàa nsi nô num kunndà ntshù', bo lo' mo', mfaṅ mo'.

³⁵ Bènnzwi bàa nsi ke gho' bàn, bo lo' mo', mfaṅ mo'. [

³⁶ Ben bàa nsi be mà tshwèt, bo lo' mo', mfaṅ mo'.]

³⁷ Ghazi'te nu Yésu bùnte ntshob yi ndù: Yen nu là nsi b'a yà Tshùaben? A tshob bo ndù: Dù' ze fe ben be bwe là, mba ghammàtat nsi bumte bwe.