Lukas 1 - NTSHOB NSI

Netsho ntùm tshô

¹ Benntùn yàm lo to' nekite tshô nu ts'a na' mbumte netèt bag là,

² ndaṅndaṅ mba ben tse bo na' njen yen nu là fe mbwe, mbèn ntù' mba ghatshob ntshob Nsi na' nsoṅ yag là,

³ mba me yàm, me lo lôte njoṅ nu fa kua' mebwô ndaṅndaṅ mb'a na' nto'te là, k'a mbwô ndù me kit'é wù, me Téofilo ze tanjoṅ,

⁴ ndù o bèn ndèn ndù ju z'o na' nzi'te là, ta neshu.

Mba Angél tshob ndù bo nsi bwe Yohané là

⁵ A lo be ngelaṅ Hèrodé mfen Yudéa, mo' ngale'te Nsi be bwe, lén se Sakaria, num ntshufa' Abia: Nzwi i tum ntùm nzwit ngonngon Aron, lén se Elisabèt.

⁶ Ntu tshob bàa fa na' mb'a ben netsin mbwe Nsi, mbèn nke nze ntshù' mba ntag Tshùaben ke fànte.

⁷ Bo lo ke ghù mén, nummbe Elisabèt na' mb'a kebwe, ntu tshob bàa fa bèn njwène.

⁸ A lo be num mo' lé'njù, Sakaria nke mfa' fa' nele'te Nsi, nummbe a lo kum num ze ntshufa',

⁹ mb'a na' mbe matnu ntùm fa' le'te Nsi là, tô jù i netsho Ndà Nsi nton labinda.

¹⁰ Njoṅ bwoṅ benntùn fa tswe njù nke nde'te Nsi, ngelaṅ labinda ke nkù là.

¹¹ Mo' Angél Tshùaben ṅwag yi, ntsin num bag tômbwôg ze zwim.

¹² Sakaria be yen i mvèle, bwôg tshùb i.

¹³ Là Angél tshob yi ndù: Kà bwôg me Sakaria, nummbe Nsi ju' le't'o, nzwi o Elisabèt nsi bwe mén mandum wù, o tswi lén se ndù Yohané.

¹⁴ O nsi tsiaṅte, bèn ṅwate, mba benntùn yàm nsi tsiaṅte num ze nebwe.

¹⁵ Nummbe a nsi se' b'a mèn ndùb mbwe Tshùaben, ke nu ndu' bo nka, Ywèt Nelàn nsi dun num i fe bam màab.

¹⁶ A nsi bèn ghù tsemo' bon Israél yàm bèn njam ntèt Tshùaben Nsi yub.

¹⁷ Tu wul i nsi bwôgmbwe zin mbwe Tshùaben, ntùm Ywèt mba neta Elia, ndù a ghù ntù ba tà bèn njam ntùm zenu ben netsine, ndù a nabte nzwit mènntùn z'a ku'ni là njab Tshùaben.

¹⁸ Sakaria tshob Angél ndù: Me nsi lèn yen nu li à ndùke, nummbe me ywèn nzwi àm bèn njwèn à?

¹⁹ Angél bùnte, ntshob yi ndù: Me b'a Gabrièl ze me num ntsin mbwe Nsi là, a bèn ntum àm ndù me se' ntshob wù, mbèn nsoṅ o yen nkùn mebwô li.

²⁰ Tshù, o nsi vù ketshob; o ke bèn nku' netshobe, tà nkum lé'njù ze tshen nu là nsi se' là, nummbe o ke' bam ntshob màm mi a nsi bumte num ngelaṅ i là.

²¹ Bwoṅ benntùn lo ke mbéb Sakaria, nke ntshàm mb'a tswe ntùm Ndà Nsi neshu là.

²² A be tum ke bèn ndèn netshob nu benntùn; bo lèn ndù a yen mo' ju ntùm Ndà Nsi; tu wul i ma'te mbu bo, ntswe ketshob.

²³ Tse lé'njù fa' nele'te Nsi lo be mi, a nèn la' i,

²⁴ tshen lé'njù li be tôge, nzwi i Elisabèt be jùm, ndem wul i ṅwù tàn, nke ntshob ndù:

²⁵ Tshù ju ze Tshùaben ghù num àm nà, ntùm tshen lé'njù li a lôt'àm nsô tuswe z'a na' mbe tu àm netèt benntùn nà.

Mba Angél tshob ndù bo nsi bwe Yésu là

²⁶ A lo be kum maṅwù ntôge, Nsi tum Angél Gabrièl ntùm mo' ngô Galiléa, lén se Nazarèt,

²⁷ mbaṅ mo' ménngon ze mo' mèn ntùm tunndà David, lén se Yosèf na' nka i là. Lén ménngon nà be Maria.

²⁸ Angél be kum mbaṅ i ntshob ndù: Me tsha't'o, wù ze Nsi fà kondèn i wù là; bin Tshùaben bèn mbe.

²⁹ A vèt num men ntshob là, mbètte ntùm ntù i ndù: Ke lèn ntsha'te li à?

³⁰ Angél tshob yi ndù: Kà bwôg me Maria, o b'a mènfen ntùm kondèn Nsi.

³¹ Tshù, o nsi be jùm, bwe mén mandum z'o nsi tswi lén se ndù Yésu là.

³² A nsi be mèn ndùb, bo nsi ke ntsiaṅ i ndù Mén Nsi mfe tù. Tshùaben Nsi nsi fà diaṅ tàab David yi.

³³ A nsi tô nzwit Yakob yoṅ ntshù', nufen se ke nsi mi.

³⁴ Là Maria tshob Angél ndù: Yen nu li nsi bumt'a ndùke, mba me ke' yoṅ ndèn mandum n'à?

³⁵ Angél bùnte, ntshob yi ndù: Ywèt Nelàn nsi se' num o, neta mfe tù kabt'o netshaṅ i. A nsi tshùa ndùlala, kà bo tsiaṅ mén nelàn nà z'o nsi bwe là ndù Mén Nsi.

³⁶ Tshù Elisabèt mèn ntùm tunndà o z'a b'a mba njwèn mènnzwi là, jùm mén mandum; a ndonni ṅwù ntôge, yi ze bo ke ntsiaṅ i kebwe là.

³⁷ Nummbe sàm nu mba ntshù' ke' be tshùa Nsi.

³⁸ Maria tshob ndù: Me b'a nkuan Tshùaben, a ghù num àm mb'o tshob là, Angél lo mbaṅ i nène.

³⁹ Be num tshen lé'njù li, Maria lo ndende, nèn ntùm ngô mbale, ntùm mo' ngô Yudéa;

⁴⁰ ntsho ndà Sakaria, ntsha'te Elisabèt.

⁴¹ Tshù, ngelaṅ Elisabèt ju' tsha'te Maria là, mén nyi'te ntùm bam se, Ywèt Nelàn dun mba num Elisabèt.

⁴² A kua' mfà nz'é tù ntshob ndù: O b'a ngambotni netèt bènnzwi, ntàm bam so b'a ntàm mbotni.

⁴³ Yen nu li fe m'a yà, kà mà Tshùaben àm nse' nelôt'àm à?

⁴⁴ Nummbe fe ngelaṅ nze ntshob tsha't'o lo njoṅ ntam ntùm ntoṅ màm nà, mén nyi'te, ntsiaṅte ntùm bam sàm.

⁴⁵ Ngafen b'a mènnzwi z'a bam ndù tshu tse Tshùaben tshob yi nsi bumte là.

⁴⁶ Maria tshob ndù: Ntù àm tshwèt ngamte Tshùaben,

⁴⁷ Ywèt tshàm tsiaṅte num Nsi ngayôg àm.

⁴⁸ Nummbe a te miag mi num mbwoṅ nkuan i ze mènnzwi. Tshù, lo sènni njoṅ nzwit benntùn fa nsi ke tsiaṅ àm ndù mènfen.

⁴⁹ Nummbe a ghù tshu ndùbndùb num àm, yi Nsi nganeta, lén se b'a nelàne,

⁵⁰ kondèn i bèn nke ntswe ngu'ngu' num ben tse bo num mbwôg i là.

⁵¹ A la'te neta bu i, nsate benntùn tse bo ke nkote wut ntùm nkwatenu ntù tshob là,

⁵² ntèn fenfen num ndiaṅ mub ma'te nsi, mbù' ghafà wut nsi tù,

⁵³ mfà tshu mebwô ghanziku'u, nta' ghankàb bo nèn mbu mbu,

⁵⁴ nse' neywimte Israél ngafa' i ntshùa njam kondèn i,

⁵⁵ ndaṅndaṅ mb'a na' ntshob ba tà be Abraham mba nzwil i yoṅ ntshù' là.

⁵⁶ Maria tswe bo Elisabèt nguan ṅwù tat, mbèn mbèn njam ndà i.

Mba bo bwe Yohané là

⁵⁷ Ngelaṅ nebwe ku' Elisabèt, a bwe mén mandum.

⁵⁸ Ba ndùla' i boa ba tunndà i be ju' ndù Tshùaben ghù kondèn ze ndùb num i, ntsiaṅte bo à bo.

⁵⁹ A be kum lé'njù fome, bo se' nesi ket mén nà, nke ntsiaṅ i Sakaria num lén tàab.

⁶⁰ Là màab bùnte, ntshob ndù: Nga, bo nsi ke ntsiaṅ i à ndù Yohané.

⁶¹ Bo tshob yi ndù: Sàm mèn ke ntùm tunndà o ndù a ghù sen lén nà.

⁶² Bo ma'te bu Sakaria, mbètt'é mb'a kô ndù bo tsiaṅ mén nà,

⁶³ Sakaria bètte tafèt nkite bwe ndù: Yohané b'a lén se. Njoṅ yub fa tshàm.

⁶⁴ Be ngelaṅ mbile, ntshu i gha', lém se ké'te, a bèn nto' netshobe, nke ngamte Nsi.

⁶⁵ Bwôg tshùb njoṅ ba ndùla' i fa, benntùn soṅ tshen nu là ntùm njoṅ ngô mbat Yudéa fa.

⁶⁶ Njoṅ benntùn fa tse bo ke nju' tshen nu li là, yab ntùm ntù tshobe, nke ntshob ndù: Yen mèn ni nsi b'a ndùke? Nummbe bu Tshùaben lo be bo yi.

Yobkwi Sakaria

⁶⁷ Tàab Sakaria dun Ywèt Nelàne, ntshob mba ngatshob ntshob Nsi là, ntshob ndù:

⁶⁸ Ghamte be Tshùaben Nsi ba Israél, mb'a se' ndôte mbèn ntshu' ben tse,

⁶⁹ ngù ngayôg be ze neta tum ntùm tunndà David ngafa' i,

⁷⁰ mb'a na' ntshob num ntshu ghatshob ntshob Nsi tse tse nelàn fe mbwe là.

⁷¹ A kwé be mbu ghakeban be, mba mbu ben tse bo num mbàn be là.

⁷² A ghù kondèn i num ba tà be, mbèn nkwimte kàn se se nelàne,

⁷³ ntshùa njam nka'ni mi a na' mbam Abraham tà be ndù:

⁷⁴ A nsi kwé be mbu ghakeban be ndù be ke mfa' yi kebwôg,

⁷⁵ ntùm nelàne mba netsine, mbwe i, ntùm njoṅ yôg be fa là.

⁷⁶ Wù ménfi, bo nsi ke tsiaṅ o ndù ngatshob ntshob Nsi mfe tù, nummbe o nsi ke nzin mbwe Tshùaben, num nenabte manze tse;

⁷⁷ ndù a ghù ben tse lèn yôg ntshùa njam nelagte nukebwô.

⁷⁸ Yen nà b'a kua' kondèn Nsi, a se' nelôte be mba lagnyam nkebnjù z'a tum mfe tù là;

⁷⁹ ndù a ké' num ben tse bo tswe ntùm njam mba netshaṅ vù là, mbèn ntshagte nku be ntùm manze fite.

⁸⁰ Mén nà nke nku'u, nke nta ntùm Ywèle, nke ntswe mà kônga tà nkum lé'njù s'a bwô ndù a la'te wul i ba Israél là.