Lévitiko 9 - NTSHOB NSI

Aron boa bon tse lo' fa'

¹ A be kum mbatte lé'njù fom Mosé tsiaṅ Aron boa nshumnshum tse mba tse ghakwé mbwe ba Israél.

² Mosé tshob Aron ndù: Lo' metshab fot mfô num jule'te ze netamte fa yi, bo ta' komnjù num nyàm netone. A bwô ndù kà bo ghù lo' num bo. Fà yub num jule'te mbwe Tshùaben.

³ Tshob bon Israél ndù bo lo' ta' fot mbwe num yub jule'te ze netamte fa yi, ta' fot mfô bo mén njùmbwe, tse bo ghù tamngu', ke ghù lo' là num nyàm netone;

⁴ ndo' ta' nyàmna' bo ta' komnjù num jule'te z'a tshwèt nda'te ndù mèn tamte bo Tshùaben nà, ndùlala ndù bo fà yub num jule'te mbwe Tshùaben, ndo' ta' ju bwôntù ze bo tébte mfèt là. Nummbe Tshùaben nsi se' netèt bin sènni.

⁵ Bo lo' njoṅ tshu fa tse Mosé tshob bo là nse' yi mbwe ntshundà ndà mbumte; njoṅ mbumte bon Israél fa ghebte, ntsin mbwe Tshùaben.

⁶ Mosé tshob ndù: Bin ghù ju ze Tshùaben bètte là, ndù nkuni Tshùaben se' netèt bin.

⁷ Mosé tshob Aron ndù: Ghebte num tômbwôge; fà yu jule'te ze netamte fa yi, mbèn nton yu nyàm, tamte fa num yu tu mba num tu ngô; fà mba jule'te ngô, ntamte fa yi mum ngô mba Tshùaben na' ntshob là.

⁸ Aron ghebte tômbwôge, ngwat fot mfô num ze jule'te ze netamte fa yi.

⁹ Tse nshum lo' lem nse' mfà yi; a tshù' ntu bu i ntùm lem njab num ba ndô tômbwôge, naṅ lem num ku tômbwôge.

¹⁰ A ton nzile, mba zwe' mi bo nkat nyàm netamte fa yi kua' mba Tshùaben na' ntshob Mosé là. A ton à num tômbwôge.

¹¹ Là, a ton mbàb i bo ngub i mbwôg njam mbàn.

¹² A wat nyàm netone. Tse nshum lo' lem nse' mfà yi, a naṅ num tômbwôg ndiaṅ mbume.

¹³ Bo lo' nyàm bo ton nà ndù bo kebte nkam nkam boa tu i nse' mfà yi, a ton njoṅ i fa num tômbwôge.

¹⁴ A sôg tshu bam tse boa mbwe tun mi, nton njoṅ i fa num tômbwôge, num nyàm bo ton nà.

¹⁵ Yen nà be tôg a fà ze jule'te ngô. A lo' fot mbwe num jule'te ze netamte fa yi num ngô, ngwal i, mfà ndo' ntamte fa yi, a be mbwe nyàm ze bo wal i là.

¹⁶ A fà nyàm netone, mfà i mba jule'te là, ngù ndaṅndaṅ mba bo te nu tse yi nsi là.

¹⁷ A fà ju bwôntù, ndo' ta' bu i, nton num tômbwôge, ndù a yà ton nyàm ze bo be nton nkebnjù là.

¹⁸ A wat nyàmna' bo komnjù num jule'te z'a tshwèt nda'te ndù mèn tamte bo Tshùaben nà num tu ngô. Tse nshum Aron lo' lem nse' mfà yi, a naṅ num tômbwôg ndiaṅ mbume.

¹⁹ Bo lo' nzit nyàmna' boa mi komnjù, nkun, nzit mi a num mbe num tshu bam tse là, mba zwe' mi, nkal i, nse' mfà yi;

²⁰ bo yab ba nzit num ba nônsi nyàm, nton ba nzit num tômbwôge.

²¹ Aron shùte ba nônsi nyàm bo bu i ze zwim bag bag nyi'te mbwe Tshùaben mba Mosé na' ntshob là.

²² Aron bù' mbu mi ntshag num ngô, naṅ mbotni num bo. Ndùs'a miagte nefà jule'te ze netamte fa, nyàm netone bo jule'te z'a tshwèt nda'te ndù mèn tamte bo Tshùaben nà, a swe'.

²³ Mosé bo Aron tsho ntùm ndà mbumte. Ndùse bo tum bwe là, bo naṅ mbotni num ngô. Ndùlala nkuni Tshùaben se' netèt ngô fa.

²⁴ Mbwôg tum mbwe Tshùaben nkù nyàm neton boa nzile. Ngô fa yen i, mbu' ngoṅ ntùm tsiaṅte, ntum ngwù nsi kabkab num tsha'a.