Lévitiko 6 - NTSHOB NSI

Ntshù' ze ghafà tshule'te ghù nze là

¹ Tshùaben tshob Mosé ndù:

² Tshob men ntshob li Aron boa tse nshum, ntshob bo ndù: Tshù ntshù' nyàm neton ni. Nyàm neton nsi ghô num ntshwèn tômbwôg njoṅ tèttswe' fa kà nkum nkebnjù, mbwôg ke nkù tômbwôge.

³ Ngafà tshule'te nsi ma' nesà kum nzwe mebwô num i, ma' ba ntshe'nku num wul i; a nsi sô bwembwôg ts'a lo num mbwôg nyàm neton tômbwôg là, te mbaṅ tômbwôge.

⁴ Yen nà nsi be tôg a sô nzwe tse, ma' tsemo'o, kà nsô bwembwôg tum yi njam mbàn, num dù' nelàne.

⁵ Mbwôg nsi ke kù tômbwôge, be ke bi. Ngafà tshule'te nsi ke ton ntshwèn bwe mba zit nkebnjù lo, nabte nyàm neton yab bwe, ton nzit tshule'te ts'a tshwèt nda'te ndù mèn tamte bo Tshùaben nà.

⁶ Mbwôg nsi ke kù tômbwôge, be ke bi.

Tshu bwôntù

⁷ Tshù ntshù' ju bwôntù li: Tse nshum Aron nsi ke fà ju bwôntù mbwe Tshùaben, mbwe tômbwôge.

⁸ Ngafà tshule'te nsi lo' bu mbab bàn bo mfèt mba tshu nelamte kwi'te num ju bwôntù, ton tshen tshu là num tômbwôge, num neke nkwimte yi, a be ju bwôntù ze njwèt mi lamte Tshùaben kua' mebwô là.

⁹ Aron boa tse nshum nsi jù z'a tù' num ju bwôntù là; bo a' jù i à ke ntsha', num ta' dù' nelàne, bam ntshundà ndà mbumte.

¹⁰ Bo ke nsi na i à bo ntsha'. A yub ju ze me fà bo num tshu bwôntù tse bo nsi ton me là. A b'a ju z'a làn neshu là, mb'a mba jule'te ze netamte fa là, mb'a mba jule'te ze mfànnu là.

¹¹ Mba zit mén Aron ze mandum no nsi jù ze bwe. A b'a ta' ntshù' z'a ghô matmat netèt bon tsin nà. Yen nà lôt'a tshu bwôntù tse bo ton mbwe Tshùaben nà: Mba zit mèn no z'a kwag là mb'a làn.

¹² Tshùaben tshob Mosé ndù:

¹³ Tshù ju bwôntù ze Aron boa nshumnshum tse nsi fà Tshùaben lé'njù se bo nsi yo' yub li: Ta' bag kesoṅ mbab bàn ntshù' num bag tse gham mba ju bwôntù z'a tswe matmat là, mfà ta' kam i nkebnjù, mfà mo' kam i mfetnjù.

¹⁴ Bo nsi lo' à mfèt nabt'é yi ntùm kab neka ju yi, kate kà lo' nèn yi; o nsi fà mba ze bo na là nkam nkam, a be mba ju bwôntù ze njwèt mi lamte Tshùaben kua' mebwô là.

¹⁵ Ngafà tshule'te z'a tum netèt tse nshum Aron bo yo' i a jù ndà là, nsi fà lèn yen ju bwôntù là ze tu wut ze. A b'a ta' ntshù' z'a tswe matmat là mbwe Tshùaben. Bo nsi ton yen ju bwôntù là mbwôg à fafa.

¹⁶ Bo nsi ton ze ju bwôntù ta' ngafà tshule'te mbwôg à fafa; bo ke nsi jù lèn i bwe.

Tshule'te num mfànnu

¹⁷ Tshùaben tshob Mosé ndù: Tshob Aron boa nshumnshum tse ndù:

¹⁸ Tshù ntshù' jule'te ze netamte fa li. Bo nsi wat nyàm jule'te ze netamte fa à mbwe Tshùaben, dù' ze bo num ngwat nyàm jule'te ze neton bwe là. A b'a ju z'a làn neshu là.

¹⁹ Ngafà tshule'te z'a nsi fà jule'te ze netamte fa là nsi jù ze bwe, jù à ntùm dù' nelàne: Bam ntshundà ndà mbumte.

²⁰ Mba zit mèn no z'a nsi kwag i là nsi làne. A be ze lem tum bwe naṅ num ta' nzwe là, mba bo nsi sôg yen dù' nzwe ze lem naṅ bwe là num dù' nelàne.

²¹ Bo nsi tsit kab ze bo na jule'te ze netamte fa ntùm bwe là. A be ze bo na i à ntùm kab tùn nà, mb'a bwô ndù bo tshwitt'é, nsôg i ntùm ntse.

²² Mba zit mandum no netèt ghafà tshule'te nsi jù ze bwe: a b'a ju z'a làn neshu là.

²³ Là, bo ke nsi fèt nyàm netamte fa ze bo nèn lem tse ntùm ndà mbumte, num nelo' ntamte fa yi ntùm dù' nelàn nà. Bo nsi ton yen nyàm n'a mbwôge.