Lévitiko 5 - NTSHOB NSI

Ba mfi'

¹ A be ze bo tsiaṅ mèn mba nkwénta num ta' nu, a kum dù' i, mbe ju' njoṅ nga nebam nu z'a yene, ndèn nà, mba ng'é nsi fènte lèt nukebwô i be kua' ze tu.

² A be mèn kwag ju z'a sagte ke lèn, ndaṅndaṅ mba ta' nyàm nesagte, fe ta' nyàm tshwèt ke ze ta' nyàm z'a be nsoṅ bam se nsi, mbe ze nesagte là, mba mba tu wut ng'é sagte, ntù' ngafànnu.

³ A be be z'a kwag be mènntùn z'a sagte ke lèn nà, ke yen nesagte là b'a ke lèn i lo, a be z'a tum mànjam ndèn nà, mb'a tù' kua' ngafànnu.

⁴ A be ze mèn be fùag mèn, ntshob ke kwate, nkàn mfe neghù mebwô lo, là njen mànjam ndù a ke' zwiagte yen nu là là, mb'a tshùa njam bwe ngù nukebwô.

⁵ Ndùlala mèn z'a nsi fàn mo' ju netèt tshen nà là nsi bam mfànnu mi, lèn nukebwô z'a ghù là.

⁶ A nsi fà ta' nyàm nke' Tshùaben, tamte fa yi num nukebwô z'a ghù là. Yen nyàm nà b'a ngon i, ta' mén mbwe ke mbwe lo. Ngafà tshule'te nsi tamte fa yi num nukebwô ng'é.

⁷ A be z'a ke' ku'ni neghù mén mbwe ke ta' mbwe lo là, mb'a nsi fà bwoṅ saṅ mbàa ke bon tshab bwoṅtambia' bàa lo Tshùaben num mfànnu mi. Mo' be ze netamte fa yi num nukebwô, mo' bèn mbe ze netone.

⁸ A nsi lo' tshen tshu là nèn fà ngafà tshule'te, a bwôgmbwe mfà jule'te ze netamte fa yi. Ngafà tshule'te nsi lo' nkib i to tu i yi njam tô i,

⁹ a nsi lo' lem saṅ netamte fa yi miagte num mo' bag tômbwôge, naṅ tshé' lem tse num ku tômbwôge. Yen nà b'a jule'te ze netamte fa yi.

¹⁰ A nsi ton semo' saṅ netone, mb'a be ntùm nte mi là. Tshù mba ngafà tshule'te nsi tamte fa num yen mèn nà, num mfànnu mi là. A nsi tshùa ndùlala kà bo lagte yi.

¹¹ A be z'a ke' ku'ni neghù bwoṅ saṅ mbàa ke bon tshab bwoṅtambia' bàa là, mb'a nsi ghabte kesoṅ mbab bàn nze gham fà ta' bag i ntshù' mba jule'te ze netamte fa yi là. A ke nsi tshùm mfèt bwe, ke ma' tshu nelamte bwe, nummb'a b'a jule'te ze netamte fa yi.

¹² A nsi lo' nèn fà ngafà tshule'te, a lo' ta' bu i bwe mba ju nekwimte yi là ton num tômbwôg mbwe Tshùaben, a kù num mbwôg mba tshule'te tse neton nà. Yen nà b'a jule'te ze netamte fa yi.

¹³ Tshù mba ngafà tshule'te nsi tamte fa num yen mèn nà là. A nsi b'a num mfànnu mi a ghù num mo' ta' ju netèt tshen tshu là là. A nsi tshùa ndùlala kà bo lagte yi. Ju z'a nsi tù' num jule'te là b'a ze ngafà tshule'te, mb'a be mbe num jule'te z'a b'a nda' là.

Mat nefà tshule'te num mfànnu

¹⁴ Tshùaben tshob Mosé ndù:

¹⁵ Ndùse mèn ta tu ngù nukebwô ke lèn, num tshu tse bo yab Tshùaben nà, mb'a bwô ndù a fà jule'te mfànnu Tshùaben num nukebwô i; yen jule'te là nsi b'a ta' komnjù s'a ke' ghù lo' là, komnjù s'a lo' netèt nyàm tse, ndèn njoṅ ntshu ntàn i num nkàb silba là. Njoṅ yen nkàb silba là nsi b'a ze bo num mfà ntùm dù' nelàn nà.

¹⁶ A nsi fà ju z'a lo nta tu bwe là, kwi'te ta' bag i ntshù' num tse tàn bwe fà num mbu ngafà tshule'te. Tshen tshu li b'a ts'a lo nke ndiag neyi dù' nelàn nà. Ngafà tshule'te nsi lo' komnjù là tamte fa yi num tu i, mba jule'te mfànnu mi là. A nsi tshùa ndùlala kà bo lagte yi.

¹⁷ Ndùse mèn ghù nukebwô ke lèn num mo' ntshù' Tshùaben, ngù tshu ts'a ke' bwô neghù là, mb'a tù' ngafànnu, mbèn nket lèt mfànnu mi.

¹⁸ A bwô ndù a fà jule'te ze mfànnu ngafà tshule'te. Yen jule'te là nsi b'a komnjù s'a ke' ghù lo' là, komnjù s'a lo' netèt nyàm tse, ndèn ntshu ntàn i là. Ngafà tshule'te nsi tamte fa yi num tu i, num nu z'a fàn ke lèn nà; a tshùa ndùlala kà bo lagte yi.

¹⁹ A b'a jule'te ze mfànnu. Yen mèn nà lo tù' ngafànnu num miag Tshùaben.

²⁰ Tshùaben tshob Mosé ndù:

²¹ Ndùse mèn ghù nukebwô, ke be mèn nenùn mbwe Tshùaben, ntatte mfèl i num ju z'a lem yi, ju z'a fà ndù a lé' yi, ke ju z'a yi, ke nefùte ndo'o,

²² nga ndù a yen ju z'a bi là, ke nenu ngu num mba ke lo z'a b'a nukebwô là;

²³ ndùs'a nsi ghù nukebwô ndùlala tù' ngafànnu là, mb'a bwô ndù a fà ju z'a yi ke z'a lo' fùte ndo' yi là, ju ze bo na' ndem yi là, ju z'a na' mbi a fon nà,

²⁴ ke ju z'a na' nu ngu bwe là lo. A bwô ndù a ba' yen ju là njam fa, mbe ba' nkwi'te ta' nz'é ntshù' num tse nze tàn kà mfà ngaju. Yen nà tôg à be num lé'njù s'a fà jule'te ze mfànnu là.

²⁵ A nsi fà komnjù s'a ke' ghù lo' là Tshùaben num mfànnu mi. A nsi fà yen jule'te l'a mum mbu ngafà tshule'te. Sen komnjù là nsi tum à netèt nyàm tse, a lèn ntshu ntàn i.

²⁶ Ngafà tshule'te nsi tamte fa yi num tu i mbwe Tshùaben, a tshùa ndùlala kà bo lagte yi, a be ze nu z'a fàn b'a mba ke lèn ni lo là.