Lévitiko 4 - NTSHOB NSI

Tshule'te num nukebwô, ngafà tshule'te Nsi ze ndùb

¹ Tshùaben tshob Mosé ndù: Tshob bon Israél ndù:

² Ndùse mèn fàn ta' ntshù' ke lèn, netèt ntshù' Tshùaben, ngù tshu ts'a lo mbe ke bwô ndù a ghù là;

³ a be ze ng'é b'a ta' ngafà tshule'te ze bo yo' i, k'a mfàn nu, ntshùa njam bwe ngù ngô fàn nu là, mb'a nsi fà ta' metshab fot mfô Tshùaben num nukebwô z'a ghù là. Metshab fot mfô là nsi b'a ke lo'. A nsi b'a jule'te ze netamte fa yi.

⁴ A nsi lo' fot mfô nèn yi ntshundà ndà mbumte mbwe Tshùaben. A nsi yab bu i tu fot mfô s'a wat mbwe Tshùaben nà.

⁵ Ngafà tshule'te ze bo yo' i là nsi lo' lem fot mfô nèn yi ntùm ndà mbumte;

⁶ a nsi tshù' ntu bu i ntùm lem miagte mbwe Tshùaben yoṅ sammbàa, mbwe nzwe dù' nelàne.

⁷ Ngafà tshule'te nsi yab lem num ba ndô labinda nelamte tômbwôg s'a be mbwe Tshùaben ntùm ndà mbumte là; a nsi naṅ lem fot mfô fa num nku tômbwôg neton nyàm s'a be ntshundà ndà mbumte là.

⁸ A nsi lo' njoṅ nzit fot mfô fafa, nzit mi a be mbe num tshu bam tse là, mi a be ntaṅte bwe là,

⁹ mba zwe' mi mbàa boa nzit mi a be mbe num bwe là, mi mbat mi boa mi nkal i, mi a nsi kiagte tà mbaṅ mba zwe' mi là.

¹⁰ Ngafà tshule'te nsi sote dù' wut fot mfô à mba bo num ngù num fot mfô jule'te z'a tshwèt nda'te ndù mèn tamte bo Tshùaben nà. A nsi ton num tômbwôg neton nyàm yi.

¹¹ Là, ngub fot mfô, njoṅ mbàb i fa, boa tu i, mbu tun mi, tshu bam tse boa mbèt mi,

¹² fot mfô fafa, a nsi lo' tum yi njam mbàn, num ta' dù' nelàne, dù' bo num ma' ba bwembwôg là, ton i num ntshwèn z'a be mbwôg là; bo nsi ton i num fèt bwembwôge.

¹³ A be ze njoṅ mbumte bon Israél fa bèn mfàn nu ke lèn, ke yen, ngù tshu ts'a lo mbe ke bwô ndù bo ghù là num mo' ta' ntshù' Tshùaben nà, ntshùa njam bwe mfàn nu,

¹⁴ bo tum mànjam ndèn nu mbit là, mba mbumte bon Israél fa nsi fà ta' metshab fot mfô num jule'te ze netamte fa yi; bo nsi lo' i nèn yi mbwe ndà mbumte.

¹⁵ Ghakwé mbwe bon Israél nsi yab mbu mub num tu fot mfô mbwe Tshùaben, bo wat fot mfô mbwe Tshùaben.

¹⁶ Ngafà tshule'te ze bo yo' i là nsi lo' lem fot mfô nèn yi ntùm ndà mbumte;

¹⁷ a nsi tshù' ntu bu i ntùm lem miagte mbwe Tshùaben yoṅ sammbàa, mbwe nzwe dù' nelàne.

¹⁸ A nsi yab lem num ba ndô tômbwôg s'a be mbwe Tshùaben ntùm ndà mbumte là.

¹⁹ A nsi lo' njoṅ nzit fot mfô fa ton num tômbwôge.

²⁰ A nsi ghù num sen fot mfô l'a mba bo num ngù num fot mfô se netamte fa yi là. A nsi ghù a be kua' ndaṅndaṅ. Tshù mba ngafà tshule'te nsi tamte fa num bo là, kà bo lagte bo là.

²¹ A nsi lo' fot mfô tum yi njam mbàn, ton i mba mbwe fot mfô là. Yen nà b'a ta' jule'te ze netamte fa yi num njoṅ mbumte bon Israél fa.

Tshule'te num mfànnu mfen

²² A be ze ta' mfen bèn mfàn nu ke lèn, mfàn ta' nu ze mo' ntshù' Tshùaben Nsi i tshù'ù, ntù' ngafànnu là,

²³ mb'a nsi fà ta' fot mbwe s'a ke' ghù lo' là ndùse ntù i bèn njam, a lèn nu z'a fàn nà.

²⁴ A nsi yab bu i tu fot mbwe, wal i dù' ze bo num ngwat ba nyàm tse bo ton mbwe Tshùaben nà. Yen nà b'a ta' jule'te ze netamte fa yi.

²⁵ Ngafà tshule'te nsi lo' ntu bu i lo' lem nyàm bo zwi num netamte fa yi là yab num ba ndô tômbwôg ba nyàm netone, naṅ tshé' lem num nku tômbwôg ba nyàm netone.

²⁶ A nsi ton njoṅ nzit fa num tômbwôg mba nzit jule'te z'a tshwèt nda'te ndù mèn tamte bo Tshùaben nà. Tshù mba ngafà tshule'te nsi tamte fa num yen mfen nà num nukebwô i là. A nsi tshùa ndùlala kà bo lagte yi.

Tshule'te num mfànnu mba we lo

²⁷ A be z'a b'a mo' mèn ntùm ngô bèn mfàn nu ke lèn, mfàn ta' nu ze mo' ntshù' Tshùaben ntshù'ù, ntù' ngafànnu là,

²⁸ mb'a nsi fà ta' ngon mbwe z'a ke' ghù lo' là num ze jule'te num nukebwô z'a ghù là ndùse ntù i bèn njam, a lèn nu z'a fàn nà.

²⁹ A nsi yab bu i num tu nyàm bo zwi netamte fa yi là, wal i dù' ze bo be ngwat ba nyàm neton nà.

³⁰ Ngafà tshule'te nsi lo' ntu bu i lo' lem nyàm bo wat là yi, yab num ba ndô tômbwôg ba nyàm netone, naṅ tshé' njoṅ lem fa num nku tômbwôge.

³¹ A nsi lo' njoṅ nzit fa, mba bo num ndo' nzit jule'te z'a tshwèt nda'te ndù mèn tamte bo Tshùaben nà, ton num tômbwôge, njwèt mi lamte Tshùaben kua' mebwô. Tshù mba ngafà tshule'te nsi tamte fa num yen mèn nà là. A nsi tshùa ndùlala kà bo lagte yi.

³² A be z'a fà à mén njùmbwe mba jule'te ze netamte fa yi là, mb'a nsi fà à nzwi i, z'a ke' ghù lo' là.

³³ A nsi yab bu i num tu nyàm z'a zwi, wal i num jule'te ze netamte fa yi là. Yen nà nsi tôg à num dù' ze bo num ngwat nyàm tse bo ton bwe là.

³⁴ Ngafà tshule'te nsi lo' ntu bu i lo' lem nyàm z'a zwi là yi yab num ba ndô tômbwôg ba nyàm netone, naṅ tshé' lem fa num nku tômbwôge.

³⁵ A nsi lo' njoṅ nzit fa, mba bo num ndo' nzit mén njùmbwe jule'te z'a tshwèt nda'te ndù mèn tamte bo Tshùaben nà, ton num tômbwôge, mba jule'te ze bo ton mbwe Tshùaben nà. Tshù mba ngafà tshule'te nsi tamte fa num yen mèn nà num nu z'a fàn nà. A nsi tshùa ndùlala kà bo lagte yi.