Lévitiko 3 - NTSHOB NSI

Tshule'te tse fite

¹ Ndùse mèn tshwèt mfà ta' jule'te z'a tshwèt nda'te ndù mèn tamte bo Tshùaben nà, a be z'a b'a nyàm ndùb, ndu i ke nzwi i lo là, mb'a bwô ndù a fà à nyàm ke lo' mbwe Tshùaben.

² A nsi yab bu i num tu nyàm nà, wal i ntshundà ndà mbumte. Ghafà tshule'te tse nshum Aron nsi naṅ lem tse num tômbwôg diaṅ bume.

³ Num yen jule'te z'a tshwèt nda'te ndù mèn tamte bo Tshùaben nà, ju z'a nsi lo' bwe ton mbwe Tshùaben mba jule'te là, b'a nzit mi a num nkut tshu bam tse là, mba mi a ntaṅte num tshu bam tse là;

⁴ mba zwe' mi mbàa boa nzit mi a be mbe num mbat mi là, nzit nkal i, mi bo nsi kiagte num mba zwe' mi là.

⁵ Tse nshum Aron nsi ton tshen nà fa num tômbwôge, yab à num nyàm z'a tshwèt nkù num ntshwèn ze bo yab mbwôg là. A b'a jule'te ze bo ton mbwôge, njwèt mi nke ndamte Tshùaben kua' mebwô là.

⁶ A be z'a ke mfà à nyàm nke'e, ndu i ke nzwi i lo num jule'te z'a tshwèt nda'te ndù mèn tamte bo Tshùaben nà, mb'a bwô ndù a b'a nyàm z'a ke' ghù lo' là.

⁷ A be ze jule'te b'a ta' mén njùmbwe là, mb'a' nèn yi mbwe Tshùaben.

⁸ A nsi yab bu i num tu nyàm nà, wal i mbwe ntshundà ndà mbumte. Tse nshum Aron nsi naṅ lem tse num tômbwôg diaṅ bume.

⁹ Num yen jule'te z'a tshwèt nda'te ndù mèn tamte bo Tshùaben nà, ju z'a nsi lo' bwe ton mbwe Tshùaben mba jule'te là b'a nzile, nkun i fa, z'a nsi keb tà num tun i là, nzit mi a be mbe num tshu bam tse là boa nzit mi a be mbe num mbat mi là.

¹⁰ Mba zwe' mi mbàa, nzit mi a be nkabt'é là; nzit nkal i, mi bo nsi kiagte num mba zwe' mi là.

¹¹ Ngafà tshule'te nsi ton tshen tshu là num tômbwôge. A b'a jujù jule'te ze bo ton mbwe Tshùaben nà.

¹² A be ze ju bwôntù i b'a ta' mbwe là, mb'a nsi fà i mbwe Tshùaben.

¹³ A nsi yab bu i num tu nyàm nà, wal i mbwe ndà mbumte. Tse nshum Aron nsi naṅ lem tse num tômbwôg diaṅ bume.

¹⁴ Num nyàm z'a wat là, ju z'a nsi lo' bwe ton mbwe Tshùaben mba jule'te là, nzit mi a be mbe num tshu bam tse là, boa mi nzit mi a be mbe num bwe là,

¹⁵ mba zwe' mi mbàa boa nzit mi a be nkabt'é là, mi a be num mbat mi là, nzit nkal i, mi bo nsi kiagte num mba zwe' mi là.

¹⁶ Ngafà tshule'te nsi ton tshen tshu là num tômbwôge. Njoṅ nzit fa b'a jujù, ta' jule'te ze bo tone, njwèt mi nke ndamte Tshùaben kua' mebwô là.

¹⁷ A b'a ta' ntshù' num njoṅ bon tsin fa, mba yà lo dù' ze bin nsi tswe là, ndù bin ke nsi fèt nzit ke lem no.