Lévitiko 27 - NTSHOB NSI

Njoṅ tshu

¹ Tshùaben tshob Mosé ndù:

² Tshob bon Israél ndù: A be ze mèn tshwèt ndiag nelèn njoṅ ntshu ntàn ta' mènntùn z'a ka' nefà Tshùaben nà, mb'a bwô ndù o tàmte njoṅ i ndù.

³ Neto' num mèn z'a ghù ngu' ṅam mbàa nkum ngu' ṅam ntôg là b'a nkàb ṅam ntàn num mandum, mba nkàb ndà Nsi;

⁴ a be z'a b'a mènnzwi là mb'a b'a nkàb ṅam ntat.

⁵ Neto' num ngu' tàn nkum ngu' ṅam mbàa b'a nkàb ṅam mbàa num mén mandum, mén mènnzwi be nkàb gham.

⁶ Neto' num ta' maṅwù nkum ngu' tàn, mén mandum b'a nkàb tàn, mén mènnzwi be nkàb tat.

⁷ Neto' num ngu' ṅam ntôg mandum b'a nkàb ntshob tàn gham, mènnzwi nkàb gham.

⁸ A be ze mèn z'a ghù nka'ni b'a kua' mbwoṅ tà num nefà tshen ntshu ntàn nà là, mb'a bo a' nèn ntèt mèn z'a ka' Tshùaben nà mbwe ngale'te, a bèn nkeb njoṅ ntshu ntàne, njé't'a num mb'a yen nga ghù nka'ni be yi là.

⁹ A be z'a b'a nyàm z'a be bo fà Tshùaben nà, mba mba zit nyàm no bo nsi fà Tshùaben nà tù' à ze nelàne.

¹⁰ Bo ke nsi bat'é, ke lo' ze mebwô mbate ze kebwô yi. A be ze bo lo' ta' nyàm mbate mo' yi là, mba tshen nyàm bàa là tù' tse nelàne.

¹¹ A be z'a b'a nyàm tse nesagte, ts'a be bo ke fà jule'te yi Tshùaben nà, mb'a bwô nelo' i nèn yi mbwe ngale'te,

¹² a fà ntshu ntàne, mfà mba nyàm bwô yi ke mb'a bag lo là. Yen ngelaṅ nà bo nsi tsin à num ntshu ntàn ngale'te.

¹³ A be ze bo kô netshu' i là, mb'a bwô nekwi'te ta' bag ju ntshù' num tse tàn.

¹⁴ A be ze mèn fà ndà i fa Tshùaben nà, mba ngale'te a' fà ntshu ntàne, mfà à mb'a yen ndà yi, a be ndà mebwô ke ndà kebwô lo là. Yen ngelaṅ nà, bo nsi tsin à num ntshu ntàn ngale'te.

¹⁵ A be ze mèn z'a fà ndà i Tshùaben njun ndà i là, mb'a' fà ntshu ntàn yi, nkwi'te ta' bag ju ntshù' num tse tàn, ndà bèn mbe ze.

¹⁶ A be ze mèn fà mo' bag tsha' tse Tshùaben nà, mb'o nsi fà ntshu ntàn à num njoṅ tshu ts'a be bo ywit bwe là, nke nkwé nkàb silba ṅam ntàn num dù' z'a be bo tsho' ngefet bwe nguan nkesoṅ gham nà.

¹⁷ A be z'a fà tsha' ts'a num ngu'njù tsiaṅte là, mba bo a' kwé à nda' ntshu ntàn z'o bètte là;

¹⁸ a be ze ngu'njù tsiaṅte tôg k'a mfà tsha' tse Tshùaben nà, mba ngale'te nsi fà ntshu ntàn à num njoṅ ngu'njù ts'a tù' kà kum num mo' ngu'njù tsiaṅte là. Nda' ndù a bwô nesô ju num ntshu ntàn z'o bètte là.

¹⁹ A be ze nga tsha' kô nebèn njun tsha' tse là, mb'a nsi kwi'te ta' bag ju ntshù' num tse tàn num ntshu ntàn z'o bètte là, tsha' bèn ntù' tse.

²⁰ A be z'a ke' jun tsha' kà bo swèn mo' mèn nà, mb'a b'a ke bèn njune.

²¹ A be ze nga tsha' kag tsha' k'a kum ngu'njù tsiaṅte là, mba tshen tsha' là ghô tse Tshùaben matmat. Tshen tsha' là tù' b'a tse ngale'te.

²² A be ze mèn fà tsha' Tshùaben z'a b'a tsha' nejune, ke bèn mb'a tsha' tse mèn bèn ngù a be ju ntsi' là,

²³ mba ngale'te nsi siaṅ nu bwe, fà ntshu ntàn tà nèn nkum num ngu'njù tsiaṅte, yen mèn nà fà ntshu ntàn ndùse, nummb'a b'a ju ze bo fà Tshùaben nà.

²⁴ A nsi be num ngu'njù tsiaṅte tsha' bèn mbèn mèn ze bo na' njun yi là.

²⁵ O nsi ke fà ntshu ntàn à num nkàb ndà Nsi. Nkàb ke mb'a guéras ṅam mbàa.

²⁶ Sàm mèn ke nsi fà mbwe mén nyàm i Tshùaben, nummb'a to' mb'a ze ju Tshùaben, mbe tuswe ju; k'a b'a nyàmna' k'a b'a njùmbwe lo, mb'a b'a ze Tshùaben.

²⁷ A be z'a b'a nyàm nesagte là, mba bo nsi jun i num njoṅ ntshu ntàn i kwi'te ta' bag ju ntshù' num tse tàn num bwe; a be ng'é ke' jun i là, mba bo a' swèn i num ntshu ntàn i.

²⁸ A be ze mèn fà ju Tshùaben kà ntam bu' bwe là mb'a be bo ke swèn, mèn ke jun, k'a b'a mènntùn, nyàm, ke ta' tsha' lo; mba ke lo bo fa Tshùaben ntam bu' bwe là, mb'a ghô Tshùaben matmat.

²⁹ Bo ke' ghù nejun sàm mèn ze bo fà i Tshùaben ntam bu' num i là. Bo nsi zwi i à nezwi.

³⁰ Njoṅ tshu fa ts'a fe ntùm tsha'a, ke tshu bo tsho' mum tsha'a, ntàm ntù, ngabte nze gham mfà nze ntshù' Tshùaben nà, mb'a b'a ze ju; a kua' ze ju Tshùaben ze bo fà yi là.

³¹ Mèn nèn num yen nze ju ntshù' num tse nze gham nà nke ndiag nejun ze, mb'a bwô ndù a kwi'te ta' bag ju ntshù' num ntshu ntàne.

³² A be ze yen ju là b'a nyàm ndùbndùb ke tse nke'nke'e, ke tse bo num ndo' shua' ntshagte yub yi lo là, mb'a b'a kua' ju Tshùaben ze bo fà yi là.

³³ Bo ke nsi tsha' yen nyàm nà lèn mbe z'a be mebwô lo là, ke bèn mbat'é; a be ze bo lo' ta' nyàm mbate mo' yi là, mba njoṅ yub bàa fa tù' b'a ju nelàne, mbe ndù be bo ke bèn njun yube.

³⁴ Men ni b'a ntshù' mi Tshùaben na' mfà Mosé num mbat Sinaï, ndù a fà bon Israél là.