Lévitiko 26 - NTSHOB NSI

¹ Bin ke nsi nabte ba neto, bin ke ghù nekome, ke ze nebom bom no, ke bèn nte nesà loṅ ntùm ngô, se bo tshebte ba netshaṅ bon tshu bwe, nke ngwù nsi mbwe i là; nummbe me b'a Tshùaben Nsi zin.

² Bin nsi ze Sabbat tshàm, ke lo' dù'ntswe àm kua' ntùm nku'ni. Me b'a Tshùaben.

Ntshob kondèn

³ A be ze bin ze ntshù' màm, a be ze bin tshùb nkàn màm, nke nze njoṅ i fa là,

⁴ mba me nsi ke tum mbaṅ bin ngelaṅ i, tsha' fà tshu, ntù mi a num njam ntàm nà yam ntàm mube.

⁵ Bin nsi tsham nsa tà nèn kum ngelaṅ nekeb nsa, lo num ngelaṅ nekeb nsa nèn kum ngelaṅ neywit tshu. Bin jù bàn zin kà njwèle, tswe ntùm zin ngô kua' ntùm fite.

⁶ Me nsi ghù fite tsho ntùm ngô, bin zi mèn ke kamte zin num miaglo; me nsi biagte tshùagkèt nyàm ntùm ngô, ṅwi be ke tshùa ntùm zin ngô.

⁷ Bin nsi yab njam ghakeban tsine, ta' yub kà wat yub be kua' mbwe bin.

⁸ Ben tàn netèt bin nsi yab njam tse nkù, ben nkù yab njam tse ntsha' gham, bin watte yub be kua' mbwe bin.

⁹ Me nsi kaṅ wul àm lôte zine, me nsi ghù bin sine, ghù bin yàme, me bèn nke mbéb kàn sàm se bag bin wat là.

¹⁰ Bin nsi jù njwèn tshu, sô njwèn tshu kà tse nswe fon dù' netsho bwe.

¹¹ Me nsi te dù'ntswe àm netèt bin, ntù àm be ke ke mbag num bin.

¹² Me nsi zin netèt bin, be Nsi zin, bin be yàm nzwit mèn.

¹³ Me b'a Tshùaben Nsi zin, me na' nsô zin Egipto, nsô zin ndà kuan; me lo keb nkù kele' sine, ngù bin be zin nke ntshag tu zin tù.

Ntshob ndon

¹⁴ Là, a be ze bin ke' ju' ntshu àm, ke ke nze nkàn màm fa,

¹⁵ a be ze bin wag ntshù' màm, ntù zin nke mbag be nebag num ntag màm, kà bin ke ke nze tsin nkàn màm, ntam kàn sàm ku là,

¹⁶ mba tshù ju ze me nsi ghù bin ni. Mba me nsi tum nge' kebwô num bin: Mbwôge, nejume, saṅte wut, bo sènte miag mine, ntù zin yen nge'; bin nsi ywit tsin tshu à banban, nummbe ghakeban tsin nsi bèn tsho' i fa.

¹⁷ Me nsi tsho' lag sàm num bin, ghakeban tsin kab mbu num bin be kua' num miag mine; ghakeban tsin nsi tô zine, bin ke nkù ke be ndù mèn ta' zine.

¹⁸ A be ze mba tà ndùlala bin ke' ju' ntshu àm nà, mba me nsi yab nu num bin num nukebwô tsin yoṅ sammbàa.

¹⁹ Me nsi be' ju z'a be mfà neta bin, nke ngù bin nka'te là. Me nsi ghù sin kamànyam ta mba tùn nà, tsha' tsin ta mba tùn meba là.

²⁰ Neta zin nsi yub à banban, tsha' tsin ke nsi bèn fà tshu, ntù neyam be ke bèn njam ntàm mi.

²¹ A be ze bin tùn tu me, ke kô neju' ntshu àm nà, mba me nsi lab zin yoṅ sammbàa tshùa mba nukebwô tsin be yi là.

²² Me nsi tshag ba nyàm tshwèt num bin, tse bo nsi ghom bon tsine, ghom nyàm tsine, ghom kua' mbe' yàm benntùn netèt bin; tsin manze nsi b'a fam, sàm mèn be ke bèn nke ntshùa bwe.

²³ A be tshen nge' là ke' tagte zine, bin nke nke' ntùn be tu me,

²⁴ mba tu wul àm yàm nsi tùn tu bin, lab zin yoṅ sammbàa tshùa mba nukebwô tsin be yi là.

²⁵ Me nsi ghù ṅwi se' num bin, njagte mba' num kàn sàm; me nsi tum keya' netèt bin ndùse bin nsi kùmte ntùm ntusô min nà, swèn zin ntùm mbu ngakeban.

²⁶ Ndùse me nsi be' nkô bàn zin nà, bènnzwi gham nsi na bàn num ta' tômbwôg ntshù'; bo nsi fà yen bàn nà bin, bin jù ke ywèt.

²⁷ A be ze mba tà ndùlala bin ke' ju' ntshu àm, nke nke' ntùn tu me là,

²⁸ mba me nsi tùn tu bin yab nge' num bin ntùm tshùagntù àm yoṅ sammbàa tshùa mba nukebwô tsin be yi là.

²⁹ Bin nsi fèt mbàb nshumnshum tsin mba ze ngonngon tsine.

³⁰ Me nsi sate tsin mbwe', tsham neto tse bin te tù num lén lagnyam nà, yab fe tsin num fe nka neto tsine, ntù àm tsho' num bin, nu tsin bag àm.

³¹ Me nsi lo' ntusô min kaṅ kônkwa yi, biagte tsin dù' ghamte, ke bèn nke mfit njwèt tsin labinda ts'a be ndamte kua' mebwô là.

³² Me nsi sate ngô. Ghakeban tsin tse bo nsi tswe bwe là nsi tshàme, bwôge.

³³ Me nsi sate zin tshag ntùm ngôngô, tsho' ṅwi njam bin. Ntusô min nsi tù' kônkwa, ndù bo sate ngô zine.

³⁴ Ndùlala ngô nsi tsiaṅte num tse Sabbat, num njoṅ ngelaṅ fa tse bo sat'é, bin ke' ntùm ngô ghakeban tsin nà; yen ngelaṅ nà la' nsi be ntùm fite ke tsiaṅte num tse Sabbat.

³⁵ La' nsi tswe ntùm fite ndùs'a nsi tù' tù' i là, tsiaṅte num Sabbat tse tshùa mb'a na' mbe ndùse bin ke ntswe ntùm ngô là.

³⁶ Me nsi ghù bwôg dun ntù ben tse bo nsi ke' ntùn nà ntùm ngô ghakeban tshobe. Futù nsi nyi'te bo tsho' nkùù; bo nsi kù kua' mba bo num nkù mbwe ṅwi là, vù nsi, ke be ndù mèn tshwèt nta' yube.

³⁷ Mèn nsi vù num mfèl i, bo ke ngwù nsi mèn num mo' mba bo b'a mbwe ṅwi là, ke be ndù mèn tshwèt nta' yube. Bin ke nsi tum ntshu ghakeban tsine.

³⁸ Bin nsi bite netèt ngôngô, ntùm ngô ghakeban tsine, bo biagte zine.

³⁹ Ben tse bo nsi ke' ntùn nà nsi yub ntùm ngô ghakeban tshob num mfànnu mube; bo nsi yub mba num mi mfànnu tà tshobe.

Nsi a' kwimte kàn se

⁴⁰ Bo nsi bam nukebwô tshob boa tse tà tshobe, bam mfànnu mi bo ghù num àm nà, bo tùn tu ze bo ghù mbwe àm nà;

⁴¹ nukebwô ze mba tu wul àm nsi tshùa njam bwe tùn tu bo, lo' yub nèn yi ntùm ngô ghakeban tshob là. Ntù yub z'a sag là nsi fà wut nsi, bo bèn mfènte lèt nukebwô yub.

⁴² Me nsi kwimte kàn sàm se bag Yakob wat là, kàn se bag Isak wat là, kwimte kàn se bag Abraham wat là, kwimte mba ngô.

⁴³ Bo nsi ghua' ngô, ngô ke ntsiaṅte num tse Sabbat ndùs'a nsi tù' tù' i, bo b'a ngùanesà mbaṅ i là; bo nsi tô njo mfànnu mube, nummbe bo wag ntshù' màm, nu ntshù' màm nke mbag yub ntù bo neshu.

⁴⁴ Là, ndùse bo nsi be ntùm ngô ghakeban tshob là, me ke yoṅ ngua' yub kua' neghua'a, nu tshob ke yoṅ mbag àm kà me biagte yub kà nkeb kàn se bag à bo wat là; nummbe me b'a Tshùaben Nsi yub.

⁴⁵ Me nsi bèn kwimte njwèn kàn àm num yub tu. Njam sen kàn nà, me lo sô yub Egipto, num miag ngôngô, ndù me be Nsi yub. Me b'a Tshùaben.

⁴⁶ Men ni b'a nkàn, ntag boa ntshù' mi Tshùaben tshùa njam Mosé nte netèt tu wul i boa bon Israél num mbat Sinaï là.