Lévitiko 22 - NTSHOB NSI

Nefèt mbàb tshule'te

¹ Tshùaben tshob Mosé ndù: Tshob Aron mba tse nshum,

² ndù kà bo jù tshu nelàn tse bon Israél fà me là, ke bèn ndo' lén sàm se nelàn mba ju banban nà. Me b'a Tshùaben. Tshob bo kua' ndùlala.

³ Mba we lo netèt nzwit zin z'a ghebte num tshu nelàn tse bon Israél fà me Tshùaben, ndù ng'é ghù mo' nesagte num i là, mba bo nsi sô yen mèn nà, lo' i lo yi num miag màm. Me b'a Tshùaben.

⁴ Mba we lo ntùm nzwit Aron z'a ghù nkin ke satnswe lo là ke nsi jù tshu nelàne, tà nkum ndùs'a bèn ndàn nà. A b'a be ndaṅndaṅ num mèn z'a kwag mèn z'a sagte wul i num ta' fe mèn, mèn z'a bagte dù' là,

⁵ mèn z'a kwag nyàm z'a num nsoṅ bam se nsi nsagte wul i là, ke mèn ze mo' ju nesagte ghom i, a tshùa njam bwe nsagte wul i lo.

⁶ Mèn z'a kwag tshen tshu là là nsi sagte tà kum mfetnjù; a nsi jù tshu nelàne, là a nsi sôg wul i ntùm ntse;

⁷ ndùse lagnyam nsi bi là, a nsi be nelàne, bèn jù tshu nelàne, nummb'a b'a jujù i.

⁸ A ke nsi fèt nyàm z'a kwù là, ke ze ju bèn nsé't'é lo, ndùlala ndù k'a sagte wul i num bwe. Me b'a Tshùaben.

⁹ Bo nsi ze ntshù' màm, mbwôg ndù kà bo ket lèt nukebwô yub, mba ndù kà bo kwù, mba bo lo' tshu nelàn mba tshu banban nà. Me b'a Tshùaben, mbe ndù me bèn nke ndànte tshen tshu là.

¹⁰ Sàm ngùn ke nsi jù tshu nelàne; mèn z'a tshwèt ntswe ndà ngale'te bo ngafa' là ke nsi jù tshu nelàne.

¹¹ Là, ta' nkuan ze ngale'te lo' nkàb njun i yi là ghù nejù tshu nelàne, mba mèn ze bo bwe i ntùm ndà i là; bo nsi jù jujù i.

¹² Ngon ta' ngale'te z'a na ndà bo mèn z'a ke' be ngale'te Nsi là ke nsi jù tshu nelàn tse bo be fà Tshùaben mbù' tù là.

¹³ Là, ngon ta' ngale'te z'a nsi tù' mfôge, ke ze ndu i ta' i, ke be ndù a ghù mén, a bèn ndà tàab mbe bwe mb'a na' mbe ndùs'a ke' ngon nà, ghù nejù jujù tàab. Sàm mo' mèn ghua ke' ghù nejù ju bwe.

¹⁴ A be ze mèn jù ju nelàn ke lèn nà, mb'a' fà njoṅ ntshu ntàn i ngale'te, mbèn nkwi'te ju bwe, z'a be njoṅ ta' bag yen ju là, a be ze bo ghabt'é nze tàn nà.

¹⁵ Ghale'te ke nsi bam ben banban jù tshu nelàn tse bon Israél nabte njab nefà Tshùaben nà.

¹⁶ A be ndùlala mba bo a' ghù bo ket lèt nukebwô yub, mba bo jù tshu nelàn nà. Nummbe me b'a Tshùaben, ndù me bèn nke ndànte tshen tshu là.

Mat lo' ndiag tshule'te

¹⁷ Tshùaben tshob Mosé ndù:

¹⁸ Tshob Aron, tse nshum boa njoṅ bon Israél fa ju ze me nsi tshob wù là: Mba zit ze Israél lo, ke mba zit ngùn no ntùm ngô Israél z'a tshwèt mfà ju bwôntù, z'a be nyàm netone, Tshùaben num nezwiagte nka'ni yi, ke z'a kô mfà lo là,

¹⁹ mb'a bwô ndù a fà ndu nyàm ze kelo', fot mfô, komnjù, ke mén mbwe lo, a be z'a kô ndù ze nu tshùa là.

²⁰ Kà bin fà sàm nyàm z'a ghù lo' là, nummbe mba yen nu là ke nsi tshùa.

²¹ Ndùse mèn ke mfà jule'te z'a tshwèt nda'te ndù mèn tamte bo Tshùaben nà mb'a bwô ndù nyàm nà b'a ke lo', k'a nyàmna' ke mbwe lo, k'a b'a nezwiagte nka'ni yi, k'a b'a nekô mfà lo, ntag ndùlala mba yen nu là ke nsi tshùa.

²² Bin ke nsi fà nyàm z'a vù fù, mbe nke'kèt, ku i ke bu i lo be', mbàn ghom i, kôglag ke mbàn nzin no tshùb i là Tshùaben. Bin ke nsi ton lèn yen nyàm nà Tshùaben num tômbwôg se.

²³ A be z'o ke mfà ju bwôntù mb'o kô là, mb'o ghù nefà nyàmna' ke njùmbwe lo ze nku mi boa mbu mi ke' be ndaṅndaṅ, mo' sag ntshùa mo'o, mo' bèn mvôg ntshùa mo' là, là, bo ke' bam lèn yen nyàm nà num nezwiagte nka'ni.

²⁴ Bin ke nsi fà nyàm ze bo nyu' mba tse, ntsit mba tse ke ne nsô mba tse là lo Tshùaben. Kà bin se nyàm ntùm zin ngô.

²⁵ Kà bin bam nekwé lèn tshen nyàm nà bu ngùn mfà jujù yi zin Nsi; Nummbe bo b'a nke'kèt, ndù bo ghù lo'. Be tshen nyàm nà ke tshùa num nu bo tum ndà num bwe là.

²⁶ Tshùaben tshob Mosé ndù:

²⁷ A bwô ndù nyàmna', mén njùmbwe ke mén mbwe lo tswe mbaṅ màab lé'njù sammbàa ndùse bo bwe i là; a be z'a kum mbatte lé'njù fom nà, mb'a be bo ton i Tshùaben num jule'te.

²⁸ A ke' bwô ndù bin zwi nyàm bo mén i num lé'njù ntshù', k'a b'a nyàmna' ke njùmbwe lo.

²⁹ Bin ke nkagtùn ndù Tshùaben bam jule'te zin z'a tshwèt nda'te ndù mèn tamte bo Tshùaben nà ndùse bin fà yi là.

³⁰ Bin fèt yen nyàm nà be kua' lé' se, ke bam ndù tshé' i zi ndà tà nkum nkebnjù. Me b'a Tshùaben.

³¹ Bin ke ntshùb ntshù' màm, nke nze njoṅ i fa. Me b'a Tshùaben.

³² Bin ke nsi lo' lén sàm se nelàn mba ju banban nà, ndùlala ndù lén sàm be nelàn netèt bon Israél. Me b'a Tshùaben,

³³ ndù me bèn nke ndànte zine. Me Tshùaben na' mbèn nsô zin ntùm ngô Egipto num nebe Nsi zin. Me, b'a Tshùaben.