Lévitiko 19 - NTSHOB NSI

Mba Nsi kô bo fa' yi là

¹ Tshùaben tshob Mosé ndù:

² Tshob njoṅ mbumte bon Israél fa ndù: Bin be nelàne, nummbe Tshùaben Nsi zin b'a nelàne.

³ Mba we lo netèt bin nsi ghù nku'ni màab bo tàab, ke ze Sabbat tshàm. Me b'a Tshùaben Nsi zin.

⁴ Bin ke nsi kaṅ wut tsin ke ndôte nsi neto, ke bèn nke ndo' ba nsi tse bo lo' à tùn nabte yi là ngù zin nsi yi. Me b'a Tshùaben Nsi zin.

⁵ Ndùs'o tshwèt mfà jule'te z'a tshwèt nda'te ndù mèn tamte bo Tshùaben nà, o fà à num mat z'a bam nà.

⁶ A bwô nefèt yen nyàm nà z'o fà là be lé' se, ke ndamnjù lo. A be ze ju tù' bwe, nkum mbatte lé'njù tat là, mb'a bwô neton mbwôge.

⁷ A be ze bo bèn mfèt num mbatte lé'njù tat là, mb'a b'a ju z'a bagte là, ntshùa ndùlala jule'te be ndù Tshùaben ke' bam.

⁸ Mèn z'a fèt lèn i là nsi ket lèt nukebwô i, nummb'a lo' ju ze bo fà Tshùaben nà mba ju banban nà. Bo nsi sô yen mèn nà netèt ze nzwit mèn.

⁹ Ndùse bin nsi tsho' tshu ntùm ngô zin nà, o nsi faṅ mo' taṅ nà, ke tsho' tshu bwe, ke bèn ntswitte ntsha tshu ts'a bwô bo lag là.

¹⁰ A ke' bèn mbwô ndù o kàb ba tsha ntàm ntù ndu' ts'a be bén o là; ke tswitte ntàm mi mi a vùte nsi là. O nsi ghua' yen nà ndù mbwoṅ bo ngùn tswitte. Me b'a Tshùaben Nsi zin.

¹¹ Bin ke nsi yi, ke ke ntshob tatte ke mfùm no netèt bin, bin bin.

¹² Kà bin lo' lén sàm nsa' kam tatte yi, nummb'a be ndùlala mb'o lo' lén Nsi o mba ju banban nà. Me b'a Tshùaben.

¹³ O ke nsi fétte mèn a ghebte mbaṅ o là, ke lo' ntanta kwé ju mèn yi. Kà tshùb nkàbfa' ngafa' a zi bàm o.

¹⁴ O ke nsi so ndon tu mbu'ntoṅ, ke yab sàm ju mbwe mfùmiag z'a b'a fa'te bwe ngwù nsi là; nummb'a bwô ndù o bwôg Nsi o. Me b'a Tshùaben.

¹⁵ O ke nsi fàn nu ntùm tsho nesa' kame. Kà lôte mba mbwoṅ be yi là, ke kabte mèn ndùb, là o nsi sa' kam mèn a ghebte mbaṅ o l'a ntùm netsine.

¹⁶ O ke nsi ke sa ndàm netèt yu nzwit mèn. O ke nsi nya' tu mèn z'a ghebte mbaṅ o là. Me b'a Tshùaben.

¹⁷ Kà ke mbàn mfèl o ntù o. A bwô ndù o ke ntagte mèn z'a ghebte mbaṅ o là, là nzete netshùa njam i ntsho ntùm nukebwô.

¹⁸ Kà yagte mba'a, ke ke ngù nkwate kebwô num bon yu nzwit mèn. O nsi kô mèn z'a ghebte mbaṅ o là mba yu tu wut là. Me b'a Tshùaben.

¹⁹ Bin nsi ke ze ntshù' màm. O ke nsi bam ndù nyàm ko' mo' nyàm z'a ke' b'a be lèn yen nà là. O ke nsi ywit nzwit tshu nze bàa ntùm nà o. O ke nsi ket nzwe ze bo lo' ndeb tshaṅ bàa mba' yi là.

²⁰ A be ze ta' mandum nô num kunndà se bo mènnzwi z'a b'a nkuan ndù mo' mèn yà ka i, là ke yoṅ njun i ke netshu' i lo là, mba bo ke zwi yube, là mba mandum a' fà ju num bwe, nummbe bo ke' tshu' nkuan ze mènnzwi là.

²¹ Mandum nà nsi lo' ta' komnjù se' fà Tshùaben num nukebwô i mbwe ndà mbumte, num netamte fa yi num mfànnu mi.

²² Ngale'te nsi tamte fa num tu i mbwe Tshùaben, num nukebwô z'a ghù là. Ngale'te nsi lo' sen komnjù là fà jule'te mfànnu yi, a tshùa ndùlala Tshùaben lagte nukebwô z'a ghù là yi.

²³ Ndùse bin nsi tsho ntùm ngô bwe nzenze ntù neyam ntàm fa là, bin nsi lo' mbwe ntàm mi à mba tshoṅ nà. Bin ke nsi kab men ntàm tù là num njù ngu' tat, ke jù men ntàm tù là.

²⁴ A nsi be num mbatte ngu'njù kuà bin fà njoṅ ntàm tù fà Tshùaben mba jule'te z'a tshwèt nda'te ndù mèn tamte bo Tshùaben nà.

²⁵ A nsi be kum mbatte ngu'njù tàn bin jù ntàm tù, ndùlala ndù tù bèn nke njam ntàm mi bin. Me b'a Tshùaben Nsi zin.

²⁶ Kà bin jù sàm ju dù' ze lem fètte bwe là. Kà bin fà wut tsin num ngàme, ke num ka lo.

²⁷ A ke' bwô ndù bin tsinte tu zin ndiaṅ mbume; kà kom mbaṅ nyiaṅ ntshu tsho.

²⁸ Bin ke nsi tshebte mfaṅ num bin num lén mèn z'a kwù là; bin ke nsi vèn tshu num bin. Me b'a Tshùaben.

²⁹ Kà lo' ngon o mba ju banban nà, mfà i ntùm kat, mbwôg ndù kà ngô tsho ntùm kat ke ntùm yôg kebwô lo.

³⁰ Bin ke nze Sabbat tshàm, nke ngù nku'ni num dù'ntswe àm. Me b'a Tshùaben.

³¹ Kà bin te lag num ben tse bo be ntshobte boa ywèt là, ke ghatshaṅ ngàm no; kà bin ke ndiag yube, mbwôg ndù kà bin tshùa njam bo nsagte wut tsine. Me b'a Tshùaben Nsi zin.

³² O nsi ke lo nsi mbwe nyiaṅtu fôgtab, ke ghù nku'ni njwèn mèn. O nsi ke bwôg Nsi o. Me b'a Tshùaben.

³³ A be ze ta' ngùn se' nke ntswe bin à bo ntùm zin ngô là, mba bin ke nsi fétt'é.

³⁴ Bin lo' ngùn z'a be netèt bin nà mba ménla' là; bin nsi kô i mba tu wut tsin nà. Tu wut tsin lo be ghùn ntùm ngô Egipto. Me b'a Tshùaben Nsi zin.

³⁵ A ke' bwô ndù bin fàn nu ntùm tsin nesa' kame, ntùm nelo' mfi' nefi' ju yi, ntùm nelo' kilô mfi' ju yi ke ntùm nelo' ntu' mfi' ju yi lo.

³⁶ A bwô nkilô min tsine, ndoṅ mi tsine, nkesoṅ min boa ntu' tsin be mi netsine. Me b'a Tshùaben Nsi zin, z'a na' nsô zin ntùm ngô Egipto là.

³⁷ Bin nsi ze njoṅ ntshù' màm fa boa njoṅ nkàn màm fa, ketshùb njoṅ i fa kua' mebwô. Me b'a Tshùaben.