Lévitiko 18 - NTSHOB NSI

Mb'a bwô neghamte nandà là

¹ Tshùaben tshob Mosé ndù:

² Tshob bon Israél ndù me Tshùaben Nsi yub tshob bo ndù:

³ Bin ke nsi ke ghù ju z'a be ntôg Egipto dù' ze bin na' ntswe là, ke z'a be ntôg dù' me tshwèt ntshag zin no. Kà bin tsho ntùm tshob matnu.

⁴ Bin tshùb ntag màm, nke nze ntshù' màm, nke nju' ntshu num njoṅ i fa. Tu wul àm, me b'a Tshùaben Nsi zin.

⁵ Bin ke nze ntag màm boa ntshù' màm. Mèn z'a ke nze men ntag màm boa ntshù' màm nà nsi tshùa njam bwe yôge. Me b'a Tshùaben.

⁶ Kà sàm mèn netèt bin yen tunntôg mfèl i ze mènnzwi. Me b'a Tshùaben.

⁷ Zete neyen tàan tunntôg, ke màan no tunntôg. A b'a màan. O ke nsi yen i tunntôg.

⁸ A ke' bwô ndù o yen nzwi tàan tunntôg. A be ndùlala mb'o yen à tàan tunntôg.

⁹ A ke' bwô ndù o yen ngon tàan tunntôg, ke ngon màan no, ke ze bo bwe i ntùm tunndà ke ze bo nkel i kà nse' yi lo.

¹⁰ A ke' bwô ndù o yen ngon nshum o ke ngon ngon o lo tunntôg. Nummb'a b'a kua' lem tsho.

¹¹ Kà yen ngon tàan ze kua' tàan bèn mbwe i là tunntôg, nummb'a b'a mfèl o ze mènnzwi.

¹² Kà yen mfèt tàan ze mènnzwi tunntôg, nummb'a b'a lem ntshù' bo tàan.

¹³ Kà yen mfèt màan ze mènnzwi tunntôg, nummb'a b'a lem ntshù' bo màan.

¹⁴ Kà yen nzwi mfèt tàan tunntôg. O ghù ndùlala mb'o biagte nku'ni z'a bwô ndù o ghù yi là. Lèn ndù nzwi i b'a mo' màan.

¹⁵ Kà yen nzwi mén o tunntôg. A b'a nzwi nshum o, ke bètte mb'o yen i tunntôg.

¹⁶ Kà yen nzwi mfèl o tunntôg, mbwôg ndù k'o biagte nku'ni z'a bwô ndù o ghù mfèl o là.

¹⁷ A ke' bwô o lo' mènnzwi mbèn ndo' ngon i. Kà lo' ngon ngon o ke ngon nshum o lo. Lèn ndù bo b'a lem tsho; o ghù ndùlala mb'o zwi mèn.

¹⁸ Kà so mfèt nzwi o njab mbaṅ i. Nummb'a be ndùlala mb'o te maṅ ntùm ndà o.

¹⁹ A ke' bwô ndù o nô mènnzwi ngelaṅ z'a tshwèt njen ṅwù là.

²⁰ A ke' bwô ndù o nô nzwi mèn mbaṅ ndà, nummb'o nsi tshùa njam i sagte wul o.

²¹ O ke nsi fà mo' mén o ndù bo ton i mbwôg ngamte Molok yi, ke bèn ndo' lén Nsi o mba ju banban nà. Me b'a Tshùaben.

²² A ke' bwô o nô mandum mba bo num nô mènnzwi là. Yen nà b'a tshùaya'nu.

²³ A ke' bwô ndù o nô nyàm nsagte wul o bin yi. A ke' bwô ndù mènnzwi nô bo nyàm, nkat bo yi. Yen nà b'a nu tuswe.

²⁴ Kà bin sagte wut tsin njam tshen tshu, nummbe ngô tse me nsi ta' yub mbwe bin nà na' nsagte wut tshob à ntùm lèn tshen tshu là.

²⁵ Tshen tshu là lo sagte ngô; me nsi so ntsha tu i num mfànnu mi, ngô ywi' ba la' tse.

²⁶ Ndùlala bin nsi ze ntshù' màm boa nkàn màm, ke bagte wut tsin ntùm sàm ta' lèn tshen tshùaya'nu là, ke bin bon la' ke ngùn z'a be netèt bin no.

²⁷ Nummbe tshen tshùaya'nu là b'a tse ben bo bwôg tswe bin ntùm ngô na' ngù là; a lo tshùa njam bwe ngô sagte.

²⁸ Bin zete ndù kà ngô ywi' zine, a be ze bin sagt'é là. A lo ywi' ben bo bwôg tswe bin nà be ndaṅndaṅ.

²⁹ Nummbe njoṅ benntùn fa tse bo nsi bagte wut tshob ntùm mo' ta' tshen tshùaya'nu là là, bo nsi sô yub netèt nzwit yub mèn.

³⁰ Bin nsi ze ntshù' màm, be ke ghù tshùaya'nu num ts'a ke ntôg ndùse bin na' mbe ke yoṅ mbe ntùm ngô là. Kà bin sagte wut tsin bwe. Me b'a Tshùaben Nsi zin.