Lévitiko 16 - NTSHOB NSI

Lé'njù ndùb nelagte nukebwô

¹ Tshùaben tshob Mosé ndùse nshumnshum Aron bàa kwù mba bo na' nse' mbwe Tshùaben nà ndù:

² Tshùaben tshob Mosé ndù: Tshob mfèl o Aron ndù k'a ke ntsho dù'ntswe njoṅ ndù fa nèn njam nzwe, nkum num kabte Koṅ z'a num Koṅ Kàn nà, mbwôg ndù k'a kwù. Nummbe m'a' ke ntum ntùm ndot nse' num kabte Koṅ.

³ Tshù mat Aron nsi ke tsho yi ntùm dù'ntswe li: A nsi ke lo' metshab fot mfô num jule'te netamte fa yi, lo' komnjù, a be nyàm z'a ton nà.

⁴ A nsi ket kum fa' s'a b'a silik là, so kut mba z'a b'a silik là tun i; kob s'a be tun i là nsi b'a silik a bèn nkut a be silik tu i. Tshen nzwe là b'a tse fa' Tshùaben. A nsi bèn ket nzwe a ndùs'a sôg wul i là.

⁵ Ntse'te bon Israél nsi fà mfot mbwe yi mbàa num jule'te num mfànnu, ngù ta' komnjù a be nyàm z'a ton nà.

⁶ Tu wut Aron nsi fà ta' fot mfô num jule'te netamte fa yi Nsi, tamte fa num ze tu wut mba num ze tunndà.

⁷ A nsi lo' mfot mbwe mbàa, nèn bo mbwe Tshùaben, ntshundà ndà mbumte.

⁸ Aron nsi ma' mbùm tô nsi num mfot mbwe mbàa. Mo' bùm tô nsi b'a num ze tu Tshùaben, mo' be num ze Azazél.

⁹ Aron nsi soṅ fot se bùm tô Tshùaben ghom i là, fà jule'te ze tamte fa yi.

¹⁰ Fot mbwe se bùm tô Azazél ghom i là, bo nsi nèn yi mbwe Tshùaben ntùn, num neke ntamte fa yi mbèn nkag i kônkwa num lén Azazél.

¹¹ Aron nsi fà ze mfô tamte fa, tamte fa yi num tu wul i mba tunndà i. A nsi wat se fot mfô tamte fa.

¹² A nsi lo' nge'mbwôg ts'a tshwèt nke' nge' mbwôg là, sô à num tômbwôg s'a mbwe Tshùaben nà, lo' mbe' mbab labinda mbu mbàa kua' ze nelamte; a' lo' tshen tshu là nèn yi tà njam kam nzwe;

¹³ Aron nsi yab labinda num mbwôg mbwe Tshùaben, ndùlala ndù nzembwôg ndot labinda bomte kabte Koṅ z'a be num Koṅ Kàn nà. Yen nà nsi tshètt'é ndù k'a kwù.

¹⁴ A nsi so ntu bu i ntùm lem fot mfô, miagte num kabte Koṅ, mbwe bwe, num bag i z'a shù ntumnyam nà. A nsi lo' lem num ntu bu i miagte mbwe kabte Koṅ yoṅ tse sammbàa.

¹⁵ A nsi wat fot mbwe tamte fa num mfànnu ngô, lo' lem tse tsho nèn yi tà njam kam nzwe. A nsi ghù lem fot mbwe à kua' mb'a ghù lem fot mfô là. A nsi miagte lem tse num kabte Koṅ mba mbwe bwe.

¹⁶ Tshù mb'a nsi ke tamte fa num dù'ntswe num sagte bon Israél boa njoṅ mfànnu mub fa mi bo num ntshùa bwe ngù nukebwô là. A nsi ke ghù à be ndaṅndaṅ num ndà mbumte ze bo te netèt bo, netèt sagte tshob là.

¹⁷ Sàm mèn ke nsi be ntùm ndà mbumte, ndùs'a nsi tsho bwe tamte fa num dù'ntswe là tà nkum ndùs'a tum bwe là. A nsi tamte fa num ze tu wut bo tunndà mba num mbumte bon Israél.

¹⁸ Ndùs'a nsi tum nà, a nsi nèn mbaṅ tômbwôg s'a mbwe Tshùaben nà, tamte fa num sen tômbwôg là. A nsi lo' lem fot mfô bo tse fot mbwe yab num ndô tômbwôge, lo' diaṅ i yi bume.

¹⁹ A nsi lo' ntu bu i miagte lem yi yoṅ sammbàa num tômbwôge, lànt'é, ghù a bèn mbe nelàn mba sagte bon Israél na' nsagt'é là.

²⁰ Ndùse netamte num dù'ntswe, ndà mbumte mba tômbwôg mi là, mba Aron a' ghù fot mbwe s'a be ntùnntùn nà ghebte.

²¹ Yen ngelaṅ nà, a yab mbu mi mbàa tu i, mbam njoṅ mfànnu bon Israél fa, njoṅ tatu yub fa, njoṅ nukebwô tshob fa, ndùs'a yab tshen kebwô li tu fot mbwe là, mb'a' fà i mèn ze bo tsho' i num yen nu là là, a tshag i kônkwa.

²² Fot mbwe nsi ket njoṅ mfànnu mub fa nèn yi num dù' tsha' banban; bo nsi ta' fot là tshag kônkwa.

²³ Aron nsi tsho ndà mbumte, sô ba nzwe silik ts'a lo nket ndùs'a lo nke ntsho dù'ntswe là, yab bwe.

²⁴ A nsi sôg wul i ntùm dù' nelàne, bèn lo' nzwe tse tum nèn miagte neton ze nyàm mba ze ngô, tamte fa num ze tu wut mba ze tu ngô.

²⁵ A nsi ton nzit jule'te ze mfànnu num tômbwôge.

²⁶ Mèn z'a nsi nèn fot mbwe Azazél num kônkwa là nsi sôg nzwe tse, sôg wul i; yen nà nsi be tôg k'a ku'ni netsho mbàn.

²⁷ Bo nsi sô fot mfô bo fot mbwe mi bo fà num jule'te mfànnu, ndo' lem tshob nèn yi dù'ntswe num netamte fa yi bwe là nèn yi njam mbàn; bo nsi ton ngub yub, mbàb yub mba tshu bam tshobe.

²⁸ Mèn z'a nsi ton tshen tshu là là, nsi sôg nzwe tse bèn sôg wul i ntùm ntse, yen nà be tshùa, a bèn njam ntùm mbàn.

²⁹ Yen ni nsi b'a ntshù' z'a ghô matmat là: Bin a' ghù ntswe nziku' num mbatte ṅwù sammbàa num lé'njù gham ntùm ṅwù. Bin ke nsi fa' sàm ju sen lé'njù là, bin ke ngùn z'a be netèt bin no;

³⁰ nummb'a sen lé'njù là se bo nsi tamte fa num bin, lànte zine, ghù bin tum ntshu ntsha num nukebwô tsin mbwe Tshùaben nà.

³¹ Sen lé'njù là nsi b'a lé'njù Sabbat bin, lé'njù nefite, lé'njù se bin nsi tswe nziku' bwe là. A ntshù' z'a ghô matmat là.

³² Mba ngale'te ze bo yo' i, a jù ndà tàab ntùm fa' Tshùaben nà nsi tamte fa. A nsi ket ba nzwe silik ts'a be tse fa' là.

³³ A nsi tamte fa num dù'ntswe nelàne, num ndà mbumte, num tômbwôge, num ghale'te mba num njoṅ mbumte bon Israél fa.

³⁴ Yen ni be bin mb'a ntshù' z'a tswe matmat là: Bo nsi ke tamte fa num tu bon Israél mba zit ngu'njù lo num nukebwô tshobe. Bo ghù mba ke lo ze Tshùaben na' ntshob Mosé ndù a ghù là.