Lévitiko 14 - NTSHOB NSI

Nelànte ngankine

¹ Tshùaben tshob Mosé ndù:

² Tshù mb'a bwô neghù ndùse bo tshwèt ndànte ngankin ni: Bo nsi lo' i nèn yi mbwe ngale'te,

³ a lo' i ntum yi njam mbàn kà ntsha' i. A be ze keko' nkin yate là,

⁴ mba ngale'te nsi ghù bo kwé nsaṅ ntùnntùn mèn bo lànt'é là mbàa, ntshwèn sédra, bù bo nzenyi.

⁵ Ngale'te nsi ghù bo wat mo' ta' saṅ num kab tsha'a, ze ntse bo tu' tumnsi ntse dun bwe là.

⁶ Yen nà nsi be tôg ngale'te lo' saṅ s'a be ntùn nà, ntshwèn sédra, bù bo nzenyi nyu' njoṅ i fa ntùm lem saṅ se bo ngwale, ntamte ntùm ntse mi bo tu' tumnsi ntse là.

⁷ A nsi lo' miagte num mèn ze bo nsi lànt'é num nkin nà yoṅ tse sammbàa, tshob ndù ng'é làn, kag saṅ s'a be ntùn nà tshwèt.

⁸ Mèn z'a lànte wul i là nsi sôg nzwe tse, kom nyiaṅ fa num i, sôg wul i, ntùm ntse, be nelàne. Yen ngelaṅ nà ng'é ghù nebèn mbèn ntùm mbàn; là, a bwô ndù a tswe njam ntàb num lé'njù sammbàa.

⁹ A be mbatte lé'njù sammbàa a kom nyiaṅ fa num i, nyiaṅtu, nyiaṅ ntshu, nyiaṅ miag, njoṅ nyiaṅ fa num i; a nsi sôg nzwe tse, sôg wul i, ntùm ntse, be nelàne.

¹⁰ A mbe kum mbatte lé'njù fom a lo' njùmbwe bàa, mén mbwe tamngu' z'a ke' ghù lo' là, ndo' kesoṅ mbab bàn ngabte nze gham ndo' tse nze tat, ndo' mfèt ntébte yi. Tshen tshu li b'a tse bwôntù. Mfèt mi a be mbaṅ bwe là b'a nguan ta' kam ntshaṅ mfèt.

¹¹ Ngale'te z'a lànte mèn nà nsi te mèn z'a nsi lànte là boa njoṅ tshen tshu bwôntù là fa mbwe Tshùaben, nzendà ndà mbumte.

¹² Ngale'te nsi lo' mo' ta' njùmbwe fà jule'te yi bo kam ntshaṅ mfèt num mfànnu; a bwô ndù a tshag tshen tshu là tù mbwe Tshùaben.

¹³ A nsi wat njùmbwe dù' bo ke ngwat nyàm netamte fa yi boa tse neton bwe là, ntùm dù' nelàne; nummbe jule'te ze mfànnu, mba ze netamte fa là, nyàm bo zwi là b'a ju ngale'te. Yen ju là b'a z'a làn neshu là.

¹⁴ Ngale'te nsi lo' lem nyàm mfànnu, yab num tun mbàb ntoṅ mèn z'a lànt'é là, num toṅ i ze zwim, num ntu madu' bu i ze zwim, mba num ntu madu' ku i ze zwim.

¹⁵ Ngale'te nsi lo' kam ntshaṅ mfèt naṅ ntùm tôbu i ze kwéb.

¹⁶ A nsi tshù' ntubu i ze zwim ntùm mfèt mi a tôbu i ze kwéb là, miagte men mfèt là mbwe Tshùaben yoṅ tse sammbàa.

¹⁷ Ngale'te nsi naṅ tshé' mfèt mi a tù' bu i là tun bàb toṅ mèn z'a tshwèt ndànte wul i là. A bwô a b'a num toṅ i ze zwim. A yab mfèt mba num ntu madu' bu i ze zwim bo ntu madu' ku i ze zwim, num dù' z'a na' njab lem nyàm mfànnu là.

¹⁸ Ngale'te nsi naṅ tshé' mfèt mi a tù' tô bu i là tu mèn z'a tshwèt ndànte wul i là; ngale'te nsi tamte fa num tu i mbwe Tshùaben.

¹⁹ Yen nà mbe tôg ngale'te fà jule'te ze netamte fa yi; a tamte fa num mèn z'a tshwèt ndànte wul i num sagt'é là. A wat nyàm z'a ton nà ndùse yen nu là tôg là.

²⁰ Ngale'te nsi fà ju bwôntù num tômbwôg nyàm netone. A tamte fa num tu yen mèn nà, ng'é làn.

Nelànte ngankin z'a b'a mbwoṅ nà

²¹ A be ze ng'é bwoṅe, mbu mi ke ku'ni là, mb'a ghù nda' ta' njùmbwe, ze bo nsi fà num jule'te mfànnu, ndù bo yà bwôg ntshag tù, bèn lo' tamte fa yi num tu i là. A nsi ghabte ta' kesoṅ mbab bàn nze gham lo' nda' ta' nze, tébte ntùm mfèt num ju bwôntù, bèn lo' ta' kam ntshaṅ mfèt.

²² A ghù neghù bwoṅ saṅ bàa ke bon bwoṅtambia' bàa lo, mb'a fà bu yi là. Mo' ta' saṅ num tamte fa, mo' num netone.

²³ A mbe kum mbatte lé'njù fom a lo' tshen tshu là fa nèn mfà ngale'te num ze lànte wut. A nsi fà ngale't'a ntshundà ndà mbumte, mbwe Tshùaben.

²⁴ Ngale'te nsi lo' njùmbwe jule'te mfànnu bo kam ntshaṅ mfèt tshag tù mbwe Tshùaben.

²⁵ Ngale'te nsi wat jule'te mfànnu; a' lo' lem nyàm mfànnu là, njab num tun bàb toṅ mèn z'a tshwèt ndànte wul i là. Yen nà b'a num toṅ i ze zwim. A yab lem nà mba num ntu madu' bu ng'é ze zwim mba num ntu madu' ku i ze zwim.

²⁶ Ngale'te nsi naṅ mfèt ntùm tôbu se se kwéb.

²⁷ A nsi lo' ntubu i ze zwim lo' mfèt yi tôbu i ze kwéb, miagte nsi yoṅ sammbàa mbwe Tshùaben.

²⁸ Ngale'te nsi yab mfèt mi a bu i là tun bàb toṅ mèn z'a tshwèt ndànte wul i là. Yen nà b'a num toṅ i ze zwim. A yab mba num ntu madu' bu i ze zwim bo ntu madu' ku i ze zwim, dù' z'a na' njab lem nyàm mfànnu là.

²⁹ Ngale'te nsi naṅ tshé' mfèt mi a tù' bu i là num tu mèn z'a tshwèt ndànte wul i là, ndùlala tamte fa num ze tu mbwe Tshùaben.

³⁰ A bwô ndù a fà mo' ta' bwoṅ saṅ ke ta' bwoṅtambia' lo ze bu i lo nku' bwe là. Mo' ta' i num jule'te mfànnu,

³¹ mo' num netone, bo ju bwôntù; ngale'te nsi tamte fa yi num ze tu mèn z'a tshwèt ndànte wul i là mbwe Tshùaben.

³² Tshù ntshù' z'a kwag nelànte ngankin ze mbu mi ke' ku'ni là.

Ṅu' nkin num sagba'

³³ Tshùaben tshob Mosé bo Aron ndù:

³⁴ Ndùse bin nsi tsho ntùm ngô Kanaan ze me fà bin nà, a be ze me kag nkin num ta' tunndà ntùm ngô ze bin ghù là,

³⁵ mb'a bwô ndù nga ndà nèn ntshob ngale'te, ntshob yi ndù: Me yen mo' to' num ndà àm, a fute to' nkine.

³⁶ Ngale'te be tsho bwe tsha' ndà, ndù bo bwôg sô tshu fa ts'a ndà, ndù kà tshen tshu là sagte. Yen nà nsi be tôg a tsho ndà ntsha' i.

³⁷ A nsi tsha' to' là. A be ze to' z'a be num nkum ba' tsho, mbe nzwe'nzwe' nenàfi ke mba lo là, ntsho nèn tà ntùm kum ba' là,

³⁸ mba ngale'te a' tum ndà, yoṅ be dut nkù'ndà tam ndà là tu num lé'njù sammbàa.

³⁹ A bwô ndù a bèn bwe num mbatte lé'njù sammbàa. A be z'a yen ndù to' là ṅab num nkum ba' fa là,

⁴⁰ mb'a' ghù bo tsho' men ndoṅ nà mi to' be bwe là, ma' yub njam tusô num dù' z'a sagte là.

⁴¹ A nsi ghù bo kôte ntùm ba' fa ma' njam tusô, ma' mbab mi bo kôte ntùm ba' là dù' z'a sagte là.

⁴² Bo bèn ndo' memo' ndoṅ mbate mbwe ndoṅ yi, mbèn ndo' memo' netob ntamte ba' yi.

⁴³ A be ze to' là bèn nko' ntùm ndà, ndùse bo tsho' ndoṅ, nkôte dù' mbèn ntamte ba' là,

⁴⁴ mb'a bwô ndù ngale'te bèn mbèn ndà là. A be z'a yen ndù to' là tshwèt nga't'a be negha'te num ba' là, mb'a b'a nkin bèn nkab mbu num yen ndà là, a tù' ndà z'a sagte là.

⁴⁵ Bo a' tsham yen ba' là, ndoṅ, ntù boa tsha' tse fa, ndo' tshen tshu là fa nèn ngua' njam tusô, num dù' z'a sagte là.

⁴⁶ Mèn z'a tsho ntùm yen ndà là ndùse bo tam i tu là, mb'a sagte wul i, ghô nesagte tà nkum mfetnjù.

⁴⁷ Mèn z'a nô num yen ndà là là, nsi sôg nzwe tse. Mba mèn a jù ju ntùm yen ndà là là a' sôg nzwe tse.

⁴⁸ A be ze ngale'te bèn mbèn ndà là, njen ndù to' ke tshwèt nga'te là, ndùse bo bèn ntamte ba' là, mb'a' tshob ndù ba' làn, nummbe mfaṅ z'a nsi là tùne.

⁴⁹ A nsi lo' nsaṅ mbàa, ntshwèn sédra, bù bo nzenyi kà lànte ndà yi;

⁵⁰ a nsi wat mo' ta' saṅ num kab tsha' ze ntse bo tu' tumnsi ntse dun bwe là.

⁵¹ A nsi lo' ntshwèn sédra, nzenyi, bù bo saṅ s'a ke' ntùn nà, so njoṅ i fa ntùm lem saṅ bo wat ntamte boa ntse bo tu' tumnsi ntse là, lo' miagte num ba' là yoṅ tse sammbàa.

⁵² Ndùs'a nsi lànte ba' là ndùlala boa tshen tshu là là,

⁵³ a nsi kag saṅ ntùn njam tusô mà tshwèt. Tshù mb'a nsi tamte fa num ba', a tù' ze nelàn nà.

⁵⁴ Tshù ntshù' z'a kwag nzenze nkin bo mbàn nà.

⁵⁵ Yen ntshù' li b'a mba num nkin ba nzwe boa mba'.

⁵⁶ Yen ntshù' li kwag mba tshu nemole, nkôglag boa nto'.

⁵⁷ Ntshù' là be nda'te ndùse ju sagte là mba ndùs'a làn nà. Tshù mba ntshù' z'a kwag nkin be là.