Lévitiko 11 - NTSHOB NSI

Nyàm nelàn boa tse kelàn

¹ Tshùaben tshob Mosé bo Aron ndù:

² Bin tshob bon Israél ndù: Tshù nyàm tse bin ghù mfèt netèt njoṅ nyàm fa tse bo be num nsitsha' li.

³ Bin nsi fèt njoṅ nyàm fa tse ku i ghù neta' i bwe là, z'a be mfèt nenà nke ndé' ntshu i là.

⁴ Là, bin ke nsi fèt tse bo num mfèt nda' nenà ndé' ntshu bo là, ke tse bo ghù nda' ku bo neta' i lo là. A ndùlala bin ke nsi fèt kamél z'a num mfèt nenà ndé' ntshu i, là, ke be ndù ku i ghù neta' i bwe là. Bin nsi lo' i à mba nyàm nesagte là.

⁵ Bin ke nsi fèt shut mbàb z'a num mfèt nenà ndé' ntshu i, là, ke ghù ku i bo neta' i là. Bin nsi lo' i mba nyàm z'a sagte là.

⁶ Bin ke nsi fèt kwinyàm z'a num fèt nenà ndé' ntshu i, là, ke ghù ku i bo neta' i là. Bin nsi lo' i mba nyàm z'a sagte là.

⁷ Bin ke nsi fèt ngùnyàm ze nkib i bo ku i ghù neta' i, là, a ke be fèt nenà ndé' ntshu i là. Bin nsi lo' i mba nyàm z'a sagte là.

⁸ Bin ke nsi fèt mbàb yub, ke kwag fe tshobe. Bin nsi lo' yub mba nyàm ts'a sagte là.

⁹ Tshù nyàm tse bin nsi fèt netèt nyàm ts'a ntùm ntse li: Bin nsi fèt njoṅ tshen nà fa tse bo ghù ju neke' mèn yi, ngù nga' num bo, mbe ntùm ba ntse, ke ntùm ba dibantse, ke ntùm ba nta'ntse lo là.

¹⁰ Là, a bwô ndù tshen nà tse bo ke' ghù ju neke' mèn yi boa nga' là b'a tshùaya'nu bin. Me tshob à njoṅ tshen nà fa tse bo num njôg ntùm ba ntse, ke ntùm ba dibantse, ke ntùm ba nta'ntse lo là.

¹¹ Bo ke mb'a tshùaya'nu num miag mine. Kà bin fèt mbàb yub, fe tshob be be tshùaya'nu bin.

¹² A bwô ndù bin lo' nyàm tshen nà bo be ntùm ntse ke ghù ju neke' mèn yi boa nga' l'a mba tshùaya'nu là.

¹³ Tshù nsaṅ mi bin nsi lo' yub mba tshùaya'nu, be ke fèt mbàb yub li: Ghammàtat, bebabsa' bo ghammàtat dibantse;

¹⁴ sa'mbu'u, fôgtab mbu'u, mba saṅ s'a fut'é là;

¹⁵ mala boa njoṅ mfuni mi fa;

¹⁶ saṅ mbwe, bwe'e, saṅ na', sa'mbu' bo s'a be mfuni mi là,

¹⁷ ntshum, saṅ s'a ke ntsho' nde ndù ntshu i béte là, ṅa saṅ bo tutu;

¹⁸ mo' saṅ nà s'a be mfute ngab ntse, ndù kekol i sag là, mo' saṅ s'a be ngù mo' bàm num ntshu i, nke ndem ngontse bon tse mum bwe là, mo' saṅ nà s'a ke ntswe kaṅntse ndù a fute mala là;

¹⁹ saṅ nyàmna', nkendoṅ boa njoṅ mfuni mi fa; manywin mbù bo neleme.

²⁰ Bin nsi lo' nyàm tse bo num nsoṅ bam sob nsi, nke mfùle, nke nzinte nku nkuà là mba tshùaya'nu là.

²¹ Là, bin nsi fèt ts'a ghù ntammbwe num nku mub neke ndo' njwèt mfe yi num tsha' là. Tshen ni nsi tum à netèt nyàm tse bo num nsoṅ bam sob nsi, nke mfùle, nke nzinte nku nkuà là.

²² Tshù tse bin fèt li: Ngamntàn, solam, Hargol bo Hagab, kua' mba yub tshaṅ i be là.

²³ Bin lo' njoṅ tsemo' nyàm tse nesoṅ bam sob nsi, tse bo num mfùle, nke nzinte nku nkuà là mba tshùaya'nu là.

Tshu ts'a num ngù mèn be nesagte là

²⁴ Tshen nà nsi sagte zine. Mèn z'a kwag fe tshob là mba ng'é be nesagte tà nkum mfetnjù;

²⁵ mèn z'a ket fe tshob là mb'a' sôg nzwe tse, mbe nesagte tà nkum mfetnjù.

²⁶ Bin lo' mba zit nyàm no ze ku i neta' i ke bwe, a ke bèn nke mfèt nenà ndé' ntshu i là mba ze nesagte là; mba we lo z'a kwag i là sagte.

²⁷ Bin lo' njoṅ nyàm fa ts'a num nzin nku nkuà là mba tse nesagte là; mba we lo z'a kwag fe tshob là nsi be nesagte tà kum mfetnjù,

²⁸ mèn z'a ket fe tshob là mb'a' sôg nzwe tse, mbe nesagte tà nkum mfetnjù.

²⁹ Tshù nyàm tse bin nsi lo' yub mba tse nesagte netèt nyàm bo num nsoṅ bam sob nsi li: Kib; tshetku bo nsémnsém, mba tshaṅ yub lo' mbe yi là;

³⁰ bu'nyàm, metu', tswemànko'; ta'ntshoṅ bo kù'menkaṅ.

³¹ Bin nsi ke lo' yub mba nyàm nesagte là netèt nyàm bo num nsoṅ bam sob nsi là. Mèn z'a kwag fe tshob là mba ng'é sagte wul i tà nèn nkum mfetnjù.

³² Mba zit ju lo ze fe tshen nyàm nà ke mo' dù' fe yub lo kwag là sagte. Me tshob à: Ju ndà ze bo kom à nekom nà, nzwe, ngub, bàm, mba zit ju lo ze bo num ndo' mfa' yi là; a bwô nema' yen ju là ntse, a be be nesagte tà nèn nkum mfetnjù; yen nà nsi be tôg a be nelàne.

³³ Mba zit ju lo z'a be ntùm kab tsha' dù' ju lo num tshen fe nyàm nà ngwù bwe là, mb'a sagte, mbètte ndù bin tsit yen kab là.

³⁴ Mba zit jujù lo ze ntse tum ntùm kab là ntshùm bwe là sagte, mba ntse nenu fa mi a be kab là sagte fa, ke kab z'a tum bwe là b'a be ndùke lo.

³⁵ Mba ke lo ze fe tshen nyàm nà kwag là sagte; a bwô nesate ntômbwôge, ndo' men ntômbwôg là mba mi a sagte yoṅ ntshù' là.

³⁶ Mba tà ndùlala, ba tumnsi ntse boa ntôntse mi ntse be nkùmte bwe là nsi b'a nelàne. Là, mba we lo z'a kwag fe nyàm z'a vù bwe là sagte wul i.

³⁷ A be ze mo' ta' fe tshen nyàm nà vù num mba zit nzwit ju lo là, mba nzwit ju là b'a nelàne.

³⁸ Là, a be ze bo naṅ ntse num nzwit ju là, mo' ta' fe tshen nyàm nà vù bwe là, mb'a bwô ndù bin lo' nzwit ju là mba ze nesagte là.

³⁹ A be ze mo' nyàm netèt tse bo num mfèt kwù, mèn kwag fe i là, mba ng'é sagte tà nèn nkum mfetnjù.

⁴⁰ Mèn z'a fèt mbàb yen fe nyàm nà là, mb'a bwô ndù a sôg nzwe tse, mbe nesagte tà nèn nkum mfetnjù. Mèn z'a ket fe nyàm nà nèn yi là nsi sôg nzwe tse be nesagte tà nèn nkum mfetnjù.

⁴¹ Mba zit nyàm no z'a num nsoṅ bam se nsi là b'a ndù a bag neshu; a ke' bwô tse nefèt yen nyàm nà.

⁴² Bin ke nsi fèt sàm nyàm z'a num nsoṅ bam se nsi, ke z'a num nkùa bam se nsi lo là, ke fèt tse bo num nzin num nku mub nkuà ke ntôg ndùlala lo là; bin nsi lo' yub mba nyàm ts'a bag neshu là.

⁴³ A ke' bwô nefèt tshen nyàm nesoṅ bam nsi là, ntù' bag zin, ntù' tshùaya' benntùn. A ke' bwô bin sagte wut tsin num bo, nummbe bin kwag yub mba bin sagte.

⁴⁴ Tshù, me b'a Tshùaben Nsi zin. Bin lànte wut tsin ntù' ben nelàne, nummbe tu wul àm b'a nelàne; a ke' bwô bin sagte wut tsin num tshen nyàm nà bo num nsoṅ bam sob nsi là.

⁴⁵ Nummbe me b'a Tshùaben z'a na' ngù bin ko' ngô Egipto, ndù me be Nsi zin, bin be nelàn nà. Tshù, tu wul àm b'a nelàne.

⁴⁶ Tshù ntshù' z'a lôte nu mfà num ba nyàm, nsaṅe, nyàm tse bo be ntswe ntse, nyàm tse bo be nzinte num tsha'a là.

⁴⁷ Yen ntshù' li nsi ke ghù bin lèn ju z'a sagte là bo z'a làn nà. Ghù bin lèn nyàm z'a be mèn fèt, bo z'a be mèn ke fèt là.