Lévitiko 10 - NTSHOB NSI

Ntshù' ts'a num vù là

¹ Tse nshum Aron Nadab bo Abiu, mba we lo netèt bo lo' ta' kab neton labinda yi, nte mbwôg bwe; bo lo' mbwôg z'a fe dù' ghua là nse' yi mbwe Tshùaben, ke be ju ze bo bètte ndù bo ghù là.

² Ndùlala mbwôg tum mbwe Tshùaben nkù yube, bo kwù num miag Tshùaben.

³ Mosé tshob Aron ndù: Yen ni b'a ju ze Tshùaben na' ntshob là, nummb'a lo tshob ndù: Ben tse bo tshwèt ngebte num àm nà nsi tù' ben nelàne, a tshùa ndùlala me be neghamte mbwe ngô fa. Aron tswe ntshu mi'i.

⁴ Mosé tsiaṅ Mikaél bo Eltsafan, tse nshum Uziél, mo' tà Aron, ntshob bo ndù: Bin ghebte nket fèt tsin nèn yi ngùanesà mbaṅ dù' nelàne, njam mbàn.

⁵ Bo ghebte, nket yub ntùm nkum mub ntum yi njam mbàn mba Mosé tshob là.

⁶ Mosé tshob Aron, Eléazar bo Itamar tse nshum Aron ndù: Bin ke nsi faṅ tu tsin nge, ke fagte nzwe tsine, mbwôg ndù kà bin kwù, mba ndù kà Tshùaben ya ntù num njoṅ ntse'te fa. Bin faṅ fèt tsin, njoṅ tunndà Israél fa làn num benntùn tse Tshùaben lo' mbwôg nsate yub yi là.

⁷ Bin ke nsi tum ntshundà ndà mbumte, mbwôg ndù kà bin kwù; nummbe mfèt yo' num num bin.

Ntshù' num neta ndu'

⁸ Tshùaben tshob Aron ndù:

⁹ O ke nsi nu ndu' ke neta ndu' lo, wù bin a tsho nshum, ndùse bin tsho ntùm ndà mbumte là, mbwôg ndù kà bin kwù. Yen nà nsi b'a ta' ntshù' netèt bin mba bon tsho fa,

¹⁰ ndùlala ndù bin ku'ni nelèn ju z'a làn nà bo ju banban, ndèn ju z'a sagte là bo z'a ke' sagte là;

¹¹ mbèn ntswite bon Israél njoṅ ntshù' fa mi Tshùaben na' mfà Mosé là.

¹² Mosé tshob Aron, Eléazar bo Itamar tse nshum Aron bàa tse bo tù' yi là ndù: Bin lo' ju z'a tù' num ju bwôntù netèt tshule'te tse bo ton mbwôg mbwe Tshùaben nà, njù ke ntsha' bwe mbaṅ tômbwôge: Nummb'a b'a ju z'a làn neshu là.

¹³ Bin nsi jù i à num ta' dù' nelàne. Yen nà b'a yu ju, mbe ze tsho nshum num njoṅ tshu bwôntù fa tse bo ton mbwôg mbwe Tshùaben nà; nummb'a b'a ju ze Tshùaben na' ntshob me là.

¹⁴ Bin à tsho nshum, tsho ngon nsi tamte fèt nônsi nyàm ze bo na' nshùte bag bag nyi'te là bo bu nyàm ze bo tshag tù kà mfà là. Bin nsi fèt tshen tshu l'a dù' nelàne. Nummbe bo fà tshen tshu là bin, a b'a yu ju mba ze tsho nshum, num tshule'te ts'a num nda'te ndù mèn tamte bo Tshùaben nà tse bon Israél se' yi là.

¹⁵ Bo nsi lo' ba nzit mi bo nsi ton mbwôg là se' yi, lo' bu nyàm ze bo tshag tù kà fà là se' yi bo nônsi nyàm ze bo nsi shùte bag bag, nyi'te mbwe Tshùaben nà. Tshen tshu là nsi b'a tsho mba tsho nshum. Ta' ntshù' z'a tswe matmat ze Tshùaben bèn mfà là bèn ntshob ndùlala.

¹⁶ Mosé diag fot mbwe s'a tamte fa yi là; mbe yen ndù bo yà tone. Ndùlala a ya ntù num Eléazar bo Itamar, tse nshum Aron tse bo tù' là, ntshob ndù:

¹⁷ Numke bin lo mbe ke fèt nyàm netamte fa num ta' dù' nelàn à? A b'a ju z'a làn neshu là; Tshùaben lo fà i bin, ndùlala ndù bin ket mfànnu mbumte, mba ndù bin tamte fa num tu i mbwe Tshùaben.

¹⁸ Bin yen mbe bo lo ke lo' lem nyàm nèn yi ntùm dù' nelàne; a lo mbwô ndù bin fèt nyàm à bwe, kua' mba Tshùaben na' ntshob me là.

¹⁹ Ndùlala Aron tshob Mosé ndù: Tshù, sènni bo fà yub jule'te ze netamte fa bo yub nyàm neton mbwe Tshùaben. Ju z'a tum me sènni là, me lo mfèt nyàm netamte fa yi sènni, mba yen nu là lo mbe mebwô num miag Tshùaben ké?

²⁰ Mosé ju' men ntshob là mbame.