Lévitiko 1 - NTSHOB NSI

Nefà tshule'te

¹ Tshùaben tsin ntùm ndà mbumte ntsiaṅ Mosé ntshob yi ndù:

² Tshob bon Israél ndù: Ndùse ta' mènntùn netèt bin ke mfà ju bwôntù Tshùaben nà, mb'a bwô ndù a fà nyàm, nyàm ndùb ke nyàm nke' lo.

³ A be ze ju bwôntù b'a nyàm ze bo tone, mbe nyàm ndùb là, mb'a bwô ndù a b'a ndu i, mbe z'a ke' ghù lo' là. A bwô ndù a fà i ntshundà ndà mbumte mbwe Tshùaben. Yen nà b'a ndù Tshùaben bam ze nu.

⁴ A nsi yab bu i num tu nyàm ze bo wat là, Tshùaben bam yen nyàm nà num netamte fa yi num tu i.

⁵ Bo nsi wat metshab fot mfô mbwe Tshùaben, ghafà tshule'te tse nshum Aron fà lem tse. Bo nsi fètte lem nà lo' diaṅ tômbwôg yi bume; sen tômbwôg là b'a ntshundà ndà mbumte.

⁶ Bo nsi fét nyàm, kebt'é nkam nkam.

⁷ Tse nshum ngafà tshule'te, Aron nsi yab ntshwèn tômbwôge, te mbwôg num bwe.

⁸ Ghafà tshule'te, tse nshum Aron nsi yab nkam nkam nyàm tse bo kebte là, tu i boa nzit mi num ntshwèn z'a tômbwôg là.

⁹ A nsi lo' ntse sôg tshu bam nyàm yi boa mbwe tun mi; ngafà tshule'te nsi ton njoṅ i fa num tômbwôge. Yen nà b'a nyàm netone, mbe jule'te ze bo ton mbwôg là, ze njwèt mi lamte Tshùaben kua' mebwô là.

¹⁰ A be ze ju bwôntù i b'a nyàm nke'e, njùmbwe ke mbwe lo là, mb'a bwô ndù a b'a ndu i, mbe z'a ke' ghù lo' là.

¹¹ A bwô ndù a wal i num bag tômbwôg z'a shù tu là, mbwe Tshùaben; ghafà tshule'te tse nshum Aron nsi fètte lem tse lo' diaṅ tômbwôg yi bume.

¹² A nsi kebt'é nkam nkam: Ghafà tshule'te nsi yab nkam nkam nyàm bo kebte là, tu i boa nzit mi num ntshwèn z'a tômbwôg là.

¹³ A nsi lo' ntse sôg tshu bam nyàm yi boa mbwe tun mi; ngafà tshule'te nsi fà njoṅ i fa, ton i num tômbwôge. Yen nà b'a nyàm netone, mbe jule'te ze bo ton mbwôg là, ze njwèt mi lamte Tshùaben kua' mebwô là.

¹⁴ A be ze ju bwôntù i b'a nsaṅ nà, mb'a bwô ndù a fà ba bwoṅtambia' ke ba bwoṅ saṅ no.

¹⁵ Ngafà tshule'te nsi fà saṅ num tômbwôge. A nsi tsho' tu i, naṅ lem tse num mbaṅ tômbwôge, ton fe saṅ num tômbwôge.

¹⁶ A nsi sô nkin i, tsho' mfe mi, tamte ma' mbaṅ tômbwôge, num bag i z'a shù ntumnyam nà, num dù' ze bo num naṅ ba bwembwôg bwe là.

¹⁷ A nsi fagte mbàb mi, là ke sôte yub num saṅe; ngafà tshule'te nsi ton saṅ num tômbwôge, num ntshwèn z'a mbwôg là. A b'a saṅ netone, mbe jule'te ze bo ton mbwôg là, ze njwèt mi lamte Tshùaben kua' mebwô là.