Kolosé 4 - NTSHOB NSI

¹ Ba tà, bin ghù nu z'a tsin mbèn nku'ni là kuan tsine, ndèn ndù mba bin zin ghù Tà mfe kamànyam.

Ntage

² Bin kagtùn ntùm le'te Nsi, nzi tshùalo ntùm bwe num neghamte Nsi.

³ Bin bèn nde'te Nsi mba num bag, ndùlala ndù Nsi gha' nzendà ntshob bag num netshob tsham Kristô, se me be ntùm nkù num bwe là,

⁴ mba ndù me tshob i mb'a bwô ndù me tshob là.

⁵ Bin zin à ntùm zenu mbwe ba njù, mbèn ntshu' ngelaṅ.

⁶ A bwô ndù ntshob min dun kondèn, ndùmte ngwa njoṅ ngelaṅ fa; bin lèn nebùnte mba we lo mb'a ku'ni là.

Netum Tikikô mba Ônésimô

⁷ Tikikô mfèt be ze nkôni, ngafa' ze nenùne, nshum fa' num Tshùaben, nsi soṅ zin njoṅ i fa, mba me be là.

⁸ Me tum i bin à num bwe, ndù bin lèn mba bag be là, mba ndù a fite ntù tsine.

⁹ Me tum i bin à bo Ônésimô mèn nenùne, mba mfèt ze nkôni; z'a b'a ze la' bin nà. Bo nsi soṅ zin njoṅ tshu fa ts'a nsen ni là.

Tsha'te

¹⁰ Aristarkô nshun tsha àm tsha'te zine, mba Marko, mekat Barnaba (ze me na' ntagte zin ndù a nse' la' bin, bin lo' i mebwô là),

¹¹ mba Yésu ze mo' lén se be Yustô là, tsha'te zine. Netèt ben tse bo si ket là, nda' bo bèn mbe shun fa' tshàm num fa' nufen Nsi, bo b'a yàm fitentù.

¹² Epafra ze la' bin tsha'te zine; a b'a nkuan Kristô Yésu; a num nde' ntsho ntùm le'te Nsi njoṅ ngelaṅ fa, ndù bin tsin mba ben tse bo bwô miagte, ngô ntùm njoṅ ze nekô Nsi fa là.

¹³ Ṅ, me kwé nta mi ndù a num ndab wul i num bin, mba num ben tse bo Laôdikia, mba num ben tse bo Hiérôpôli là.

¹⁴ Lukas, ngaghù fu, ze nkôni, tsha'te zine, mba Démas tsha'te zine.

¹⁵ Bin tsha'te fètfèt tse bo be Laôdikia là, bin tsha'te Nimfas mba benkristô tse bo be ntse'te ndà i là.

¹⁶ Ngelaṅ ze bin nsi miagte nesiaṅ yen ṅwa'ni li là, bin ghù ntse'te benkristô Laôdikia siaṅ, bin bèn nsiaṅ z'a fe Laôdikia là.

¹⁷ Bin tshob Arkipô ndù: Zete num fa' s'o kwé num Tshùaben nà, ndù o ghù a bumte.

¹⁸ Tu wul àm Paulo kite tsha't'a kua' ko' bu àm. Bin kwimte ndù me b'a ntùm nkù! Kondèn be bin.