Kolosé 3 - NTSHOB NSI

Yôg nswe num Kristô

¹ Ndùlala, a be ze bin à Kristô bam num vù là, bin diag tshu mfe tù dù' ze Kristô tswe nsi num bag bu Nsi ze zwim nà.

² Bin yab nkwatenu min num tshu mfe tù, ke b'a num tshu ts'a be tse nsitsha' là.

³ Nummbe bin kwù, yôg sin lem bo Kristô num Nsi.

⁴ Ngelaṅ ze Kristô z'a be yôg be nsi tswite wul i là, mba zin bin à bo nsi tswite wut tsin ntùm nkuni.

⁵ Ndùlala bin ghù nkam wut kwù num tshu ts'a be tse nsitsha' là: Nekale, yôg ṅu'u, ghe'te mbàb wut, ghe'te kebwô, ze'te z'a b'a neghamte nsi neto là;

⁶ tshen tshu là bèn ngù yantù Nsi se'e.

⁷ Mba bin zin lo ke nzin ntùm tshen tshu là mbwembwe, ngelaṅ bin na' nke njôg ntùm bwe là.

⁸ Là ndonni, mba bin zin ghua' njoṅ tshen tshu là fa: Yantù, tshùagntù, nukebwô, netshabte, ntshob kebwô, bin ghua' njoṅ tshen tshu là fa num ntshu bin.

⁹ Kà bin netshob tatte bin zin, nummbe bin sô njwèn mèn bo mfa' mi num bin,

¹⁰ ma' mèn nswe z'a num nke mbe nswe njoṅ ndù fa ntùm nelène, ndù a tù' mfuni mèn z'a nabt'é là,

¹¹ nsen ni, ze Grikia mba ze Yuda, mèn z'a si ket là, mba mèn z'a ke' si ket là, ngùn, ze Skita, nkuan, ke' bèn mbe, là Kristô b'a njoṅ i fa num njoṅ benntùn fa.

¹² Ndùlala, bin Nsi tsho' zine, bin ben nelàn mba tse Nsi kô zin nà, bin ma' kondèn, bwôntù, nefà wut nsi, fite, fènntù num bin,

¹³ nke mfènte wut tsin bin bin, ndagte, a be ze mèn ghù ntsha bo mo' là. Ndaṅndaṅ mba Kristô lagte bin nà, mba bin zin lagte bin bin.

¹⁴ Là num njoṅ tshen tshu là fa, bin ma' nkôni z'a num ntamte ntùm nebwô miagte là.

¹⁵ A bwô ndù fite Kristô ze bo na' ntsiaṅ zin num bwe ntùm ta' wut ntshù' là kwé ntsho'ngu' ntùm ntù tsine. Bin be ghalèn numebwô.

¹⁶ A bwô ndù ntshob Kristô tswe netèt bin mà yàme; bin tswite mbèn ntagte wut tsin ntùm njoṅ zenu fa, ntùm kwi ma'mbu, kwi nenyàmte mba kwi Ywèle, nke njob kwi Nsi ntùm ntù tsin njam kondèn.

¹⁷ Ke mba ke lo ze bin ghù, ke ntùm ntshobe, ke ntùm mfa' lo, bin ghù njoṅ i fa à num lén Tshùaben Yésu, ntshùa njam i, mfà ghamte Nsi Tà.

Ntag tunndà

¹⁸ Bènnzwi, bin ke nju'ni du tsine, mb'a ku'ni là, num Tshùaben.

¹⁹ Bandum, bin ke nkô zwi tsine, ke ke nkag zwentù ntù bo.

²⁰ Bônke', bin ke nju' ntshu tà tsin mba mà tsin num njoṅ tshu fa, nummbe yen nà bwô num Tshùaben.

²¹ Ba tà, kà bin kamte yantù ntù bon tsine, mbwôg ndù kà bo fam.

²² Ba kuan, bin ke nju' ntshu tà tsin tse mbàb wut num njoṅ tshu fa, kà bin fa' à nda' num miag, mba bin ke ndiag nebwô à benntùn nà, là bin fa' à ntùm ntù mebwô, nke mbwôg Tshùaben.

²³ Njoṅ tshu fa tse bin num ngù là, bin fa' njoṅ ntù tsin fa, mba bin fa' à Tshùaben, ke b'a benntùn nà,

²⁴ ndèn ndù bin nsi kwé ntsho'fa' Tshùaben mi a b'a ntsi' là. Bin ke mfa' Tshùaben Kristô!

²⁵ Nummbe mèn z'a ke ngù nuketsin nà nsi kwé ntsho'fa' nuketsin z'a ghù là, netôte ke' be.