Kolosé 2 - NTSHOB NSI

¹ Nummbe me kô ndù bin lèn ntsho ze me num nde' num tu bin, num tu ba Laôdikia, mba num tu njoṅ benntùn fa tse bo ke' to' yen tu wul àm nà,

² ndùlala ndù ntù tshob fite, bo tamte ntùm nkôni, ndun fu' zenu, ndù bo lèn tsham Nsi s'a b'a Kristô,

³ ze njoṅ fu' zenu fa mba nelèn lem ntùm bwe là.

Ntag num netswite tatte

⁴ Me tshob yen n'a ndù kà sàm mèn tatte zin ntùm ntshob nkùnkù,

⁵ mba mba tu wul àm ke' be netèt bin nà, mba bin ta ntùm bamntù zin num Kristô là,

⁶ mba bin na' ntshob Kristô Yésu Tshùaben nà, bin zin à num i,

⁷ ntaṅ nga, nke nku' num nu, nke nta njam bamntù mba bo na' ntswite zin nà, bin dun ntshùate ntùm mfa' kondèn.

⁸ Bin zete ndù kà sàm mèn tshùa njam zenu ntùm njù mba fùte banban, z'a b'a nu benntùn mba tshu njù, ke b'a nu Kristô là, ntshùb zine.

⁹ Nummbe ze nebe Nsi z'a dun nà num ntswe num Kristô, num wul i,

¹⁰ bin ghù njoṅ nedun fa num i, yi z'a be tu njoṅ netô fa mba tu njoṅ ba ngù' fa là.

¹¹ A b'a num i ze bin si ket, nesi ket ze bu mènntùn ke' bèn ngù là, nesi ket z'a b'a nesô wut là, tshù ze nesi ket Kristô là:

¹² Bo lo tshoṅ zin bin à bo ntùm kwéntse, mbam zin num i njam bamntù num neta Nsi z'a bam i num vù là.

¹³ Bin tse bin na' mbe ben nekwù ntùm mfànnu mba ntùm nebe ke si ket mbàb wut zin nà, Nsi lo ghù bin yôg bin à Kristô, ndagte njoṅ mfànnu be fa be,

¹⁴ mbwete ṅwa'ni mfànnu be z'a ke ndiag netshùa njam ntshù' ngù be vù ntsha là, a lo sô i, nkwimt'é num fanta'tù,

¹⁵ nsô neta num ba netô mba ba ngù', ma' tuswe tu bo num miag njù, mb'a tshùa yub num i là.

¹⁶ Kà sàm mèn tsho'te zin num ju nejù mba ju nenu, ke num nu lé'njù jùa lo, ke ntshùa ṅwù lo, ke Sabbat lo;

¹⁷ tshen nà b'a netshaṅ tshu ts'a nsi se' là, là ko' i b'a wut Kristô.

¹⁸ Kà sàm mèn yi nda' zin, mb'a kô nefà wut nsi mba neghamte ba Angél, ntsho ntùm tshu ts'a yen nà, nke nko'te wut banban num zenu mbàb wul i là.

¹⁹ A ke' lat num tu z'a num ntshùa njam nga tse, nkéme, mbèn ntamte njoṅ wut fa, ngù a ku' ntùm neku' Nsi là.

²⁰ A be ze bin à Kristô kwù num tshu njù là, mb'a be bin bèn mbam lèn tshen tshu là, mba bin ke njôg à ntùm njù l'a ndùke?

²¹ Kà lo', kà zwi'te, kà kwag,

²² tshen tshu là ts'a nsi bagte ngelaṅ mèn ywimte wul i yi là. Tshen tshu là b'a ntshù' mba netswite benntùn.

²³ Tshen tshu là ghù mfuni zenu ntùm neghamte ze mèn kô là, ntùm nefà wut nsi, ntùm neghùtni wut, ke b'a ntùm nku'ni nekém mbàb wut.