Kolosé 1 - NTSHOB NSI

Tsha'te

¹ Me Paulo, ngantum Kristô Yésu, njam ze nekô Nsi, mba mfèt be Timôtio,

² kite yen ṅwa'ni li à ben nelàn mba fètfèt tse bo be Kolosé, tse bo bam Kristô là. Kondèn mba fite z'a fe Nsi Tà be là be bin.

Neghamte Nsi mba nele'te Nsi

³ Bag num ngamte Nsi, Tà Tshùaben Yésu Kristô njoṅ ngelaṅ fa, nke nde'te Nsi num bin.

⁴ Nummbe bag lo ju' nu num bamntù zin num Yésu Kristô, mbèn nju' nu num nkôni ze bin ghù num njoṅ ben nelàn fa,

⁵ njam nenywinte ze bo lé' bin mfe kamànyam nà. Bin lo à ju' nu num yen nenywinte là, ngelaṅ bo tshob nkùn mebwô,

⁶ z'a se' la' bin ndaṅndaṅ mb'a be netèt bin fe lé'njù ze bin na' nju'u, ndèn kondèn Nsi ntùm nenùn nà.

⁷ Epafra, nshun fa' yag ze nkôni na' mbèn ntswite zin njoṅ yen nà fa, a b'a kua' ngafa' Kristô bin,

⁸ a yi bèn nsoṅ yag nkôni zin ntùm Ywèle.

⁹ A *gi*ndùlala, fe lé'njù ze bag ju' là, mba bag yag ke' tsin nele'te Nsi num bin, nke nde't'é ndù bin dun nelèn ze nekô ntùm njoṅ zenu fa mba ntùm nelèn Ywèle,

¹⁰ ndù bin zin num mat z'a ku'ni num Tshùaben nà, ndùlala ndù bin bwô i miagte, nke njam ntàm ntùm nzenze mfa' mebwô, nke nku' nèn mbwe ntùm nelèn Nsi,

¹¹ nke nta ntùm njoṅ neta fa njam ngù' nkuni mi, ndùlala ndù bin ke nju' ntshu, nke mfèn ntù njoṅ ndù fa ntùm tsiaṅte.

¹² Bin fà ghamte Tà z'a ghù bin ku'ni neghù zin bag i ntùm ntsi' ben nelàn ntùm nka' là.

¹³ A lo kwé be bu ngù' njame, nket be nte ntùm nufen Mén nkôni i,

¹⁴ ze bag à bin ghù netshu'u, nelagte nukebwô num i là.

Kristô mba fa' se

¹⁵ A b'a mfuni Nsi ze miag ke' ku'ni neyen i là, mbe tuswe num njoṅ tshu fa tse Nsi nabte là,

¹⁶ nummbe Nsi na' nabte njoṅ tshu fa num i, tshu ts'a be mfe kamànyam mba num nsitsha' là, tshu tse miag ku'ni neyen nà mba ts'a ke' ku'ni neyen nà, k'a fenfen, k'a ba tshùaben, k'a ba netô, k'a ba ngù' lo; Nsi na' nabte njoṅ tshu fa à njam i, mba num tu i.

¹⁷ A lo bwôg be kà njoṅ tshu fa mbe; njoṅ tshu fa tsin à num i.

¹⁸ A b'a tu wut ntse'te benkristô; a b'a neto'te, mbe tuswe netèt fe ben, ndùlala ndù a be mbwe mèn ntùm njoṅ i fa,

¹⁹ nummbe Nsi lo kô ndù njoṅ nedun fa tswe num i,

²⁰ ntshùa njam i mba njam lem fanta'tù i, mfà fite tshu ts'a num nsitsha' là, mba ts'a be mfe kamànyam nà.

²¹ Mba bin tse bin na' mb'a mfàm mba ghakeban ntùm nkwatenu min mba ntùm mfa' min mi kebwô là,

²² a lo tshùa njam vù se, ntamte zin ndonni num wut mbàb wul i, ndù bin be tsin mbwe i, mbe nelàne, kelo', ke nukebwô lo,

²³ a be ze bin ghô ntùm bamntù, ntaṅ nga, ke magte, ke nyi'te mbaṅ nenywinte nkùn mebwô ze bin na' nju'u, ze bo na' ntshob njoṅ njù fa tun kamànyam, nkùn mebwô ze tu wul àm Paulo tù' ngafa' i là.

Fa' mba nge' Paulo

²⁴ Ndonni me tshwèt ntsiaṅte ntùm nge' tshàm num tu bin, nke nzwiagte tshu ts'a tsi num nge' Kristô ntùm mbàb wul àm nà num wul i z'a be ntse'te benkristô,

²⁵ ze me tù' ngafa' i ntùm fa' se Nsi fà me ndù ntshob Nsi bumte num bin nà.

²⁶ A b'a tsham s'a na' ndem fe ndùke lo ntùm njoṅ zwiaṅ benntùn fa, là ntswite wul i ndonni ben Nsi tse nelàne,

²⁷ tse Nsi kô nela'te nkuni ndùb mi a ntùm sen tsham nà bo netèt ghakelèn Nsi là. A b'a Kristô netèt bin, nenywinte nkuni!

²⁸ A b'a yi ze bag num ntshobe, nke ntagte njoṅ benntùn fa, nke ntswite njoṅ benntùn fa ntùm njoṅ zenu fa, ndùlala ndù bag be te mba we lo num Kristô ndù a bwô miagte.

²⁹ A b'a ju ze me num mfa' bwe, nke nde' ntsho njam neta i z'a num mfa' num àm neta là.