Héber 7 - NTSHOB NSI

Mèlkisédék

¹ Nummbe, yen Mèlkisédék là, mfen Salém, ngale'te Nsi, Nsi z'a mfe tù là, z'a bumte bo Abraham, naṅ mbotni num Abraham z'a ke mbèn njam ngelaṅ fenfen vù ntsho là.

² Abraham lo ghabte njoṅ tshu fa nze gham, mfà ta' bag i yi. Mbwe tun lén Mèlkisédék bagt'a ndù: Mfen nunetsine, mbatte ndù: Mfen Salém, yen nà b'a ndù: Mfen fite.

³ A ke' ghù tà, ke ghù mà, ke ghù tunndà i, ke ghù neto'te lé'njù, ke ghù nemiagte yôg; a b'a mfuni Mén Nsi, a b'a ngale'te Nsi yoṅ ntshù'.

⁴ Bin yen ndù yen mèn nà ze tà be Abraham ghabte njoṅ ntsha' ntsho fa nze gham, mfà ta' bag i yi là, b'a mèn ndùb.

⁵ Bon Lévi tse bo kwé fa' nele'te Nsi là ku'ni, mb'a be ntùm ntshù' là, nekwé ta' bag ju num tse nze gham ngô, yen nà b'a ndù fèt tshobe, mba mba bo tum à num Abraham nà.

⁶ Là mèn z'a ke' tum à ntùm tunndà yub là lo kwé ta' bag ju num tse nze gham Abraham, naṅ mbotni num mèn z'a ghù nka'ni là.

⁷ Mo' tantshu ke bwe, mèn ndùb na' mbèn naṅ mbotni num mèn nke'e.

⁸ Ben nekwù bèn nke nkwé ta' bag ju num tse nze gham nsen ni, là nsen nà, a b'a mèn ze bo kwé nta mi ndù a b'a ntùn nà bèn nkwé ta' bag ju num tse nze gham.

⁹ Yen nà b'a ndù Lévi z'a tshwèt nkwé ta' bag ju num tse nze gham nà lo tshùa njam Abraham, mfà ta' bag ju num tse nze gham;

¹⁰ nummbe Lévi lo ke' à zwe' tàab, ngelaṅ Mèlkisédék bumte bo Abraham nà.

Aron ngale'te Nsi

¹¹ A *gi*lo mbe ndù nebwô miagte be njam se fa' nele'te Nsi Lévi, z'a kut benntùn njam ntshù' là, mba bo bèn njab mo' ngale'te Nsi ntùm ntshufa' Mèlkisédék, ke tsiaṅ i ntùm ntshufa' Aron ké?

¹² Ndùlala, a be ze fa' nele'te Nsi bate là, mb'a bwô ndù mba ntshù' bate.

¹³ Nummbe mèn ze bo tshob yen nu li num i là tum à ntùm tunndà ghua ze sàm mèn netèt bo ke' to' fa' fa' tômbwôg là.

¹⁴ Nummbe njoṅ benntùn fa lèn ndù Tshùaben be tum à num Yuda, tunndà ze Mosé ke' tshob sàm nu bwe num nu nele'te Nsi là,

¹⁵ a bèn mb'a ndaṅndaṅ ndù bo yab mo' ngale'te Nsi z'a be mfuni Mèlkisédék là,

¹⁶ a ke' be ngale'te Nsi à ntùm ze mat mbàb wut, là ntùm neta yôg s'a ke' be bagte là.

¹⁷ Nummbe bo kwé nta mi ndù: O b'a ngale'te Nsi yoṅ ntshù' ntùm ntshufa' Mèlkisédék.

¹⁸ Ndùlala, bo ma' mbwe ntshù' njam, nummbe neta i bot, a ke bèn njwimte,

¹⁹ nummbe ntshù' ke' ghù ndù sàm ju bwô miagte; là nenywinte ze mebwô se' ndù be tshùa njam i, ngebte mbaṅ Nsi.

²⁰ Yen nà b'a kua' nenùne, nummbe Nsi lo ke tag ke tshob nu nsaṅlaṅ bwe. Ba Lévi lo be ghale'te Nsi, Nsi ke tshob nu nsaṅlaṅ bwe,

²¹ là Yésu lo be be ngale'te Nsi, Nsi tshob nu nsaṅlaṅ bwe, ntshob yi ndù: Tshùaben tshob nsaṅlaṅ bwe, a ke nsi tshàme; o b'a ngale'te Nsi yoṅ ntshù'.

²² Ndùlala, Yésu b'a nganze kàn s'a bwô ntshùate là.

²³ Ghale'te Nsi lo yàme, nummbe vù lo ke ntshètte yub netswe yàme,

²⁴ là tu wul i ghù fa' nele'te Nsi se sàm mèn ke' tsho ntùm bwe là, a tswe yoṅ ntshù'.

²⁵ A ndùlala, a ku'ni neyôg ben tse bo tshùa num i, nke nèn mbaṅ Nsi là njoṅ ndù fa, nummbe tu wul i b'a ntùn njoṅ ngelaṅ fa ndù a bu' mbu num tu bo.

²⁶ Yen ni b'a lèn ngale'te Nsi ze ndùb ze be ke nkô là, mèn nelàne, ke lèn nukebwô, kelo'; mèn ze bo fagt'é num ghaghù nukebwô, a nèn tù ntshùa kamànyam nà;

²⁷ se fa' ke' b'a neke mfà jule'te Nsi njoṅ lé'njù fa num ko' tse nukebwô mba tse benntùn, mba ghale'te Nsi tse ndùbndùb num ngù là, nummbe a lo ghù yen nà yoṅ ntshù' num njoṅ yoṅ tse fa, mba ko' tu wul i.

²⁸ Nummbe ntshù' lo yab ben nebot mba ghale'te Nsi tse ndùbndùb là, là ntshob nekàn mfe mi a tum njam ntshù' là lo yab mèn z'a bwô miagte là yoṅ ntshù'.