Héber 6 - NTSHOB NSI

Neghua' bamntù num ngua' mènntùn

¹ A ndùlala, be faṅ mbwe nu ntshob Kristô, nèn mbwe ntùm netswite z'a bwô miagte là, ke bèn nte tseba' nekaṅ ntù num mfa' nekwù, bamntù num Nsi,

² netswite ba nu kwéntse, neyab mbu, nelo num vù, mba netsho'te ntsha yoṅ ntshù'.

³ Yen nà b'a ju ze be nsi ghù, a be ze Nsi bam nà.

⁴ Nummbe, ben tse Nsi lànte miag mub mo' ngelaṅ, bo zwi'te kondèn z'a fe kamànyam, ngù yub bag i num Ywèt Nelàne,

⁵ nzwi'te ntshob Nsi mi mebwô mba neta njù z'a nsi se'e,

⁶ là ngwù njam njù là, ke' ku'ni nebèn ngom wut tshob num nekaṅ ntù, bo tse mba bo tshwèt nkwimte Mén Nsi num fanta'tù, nte i mbwe tshabte njù là.

⁷ Nummbe tsha' z'a nu mbaṅ z'a lo num i yoṅ yàme, njam ntàm mebwô ben tse bo dù' i là, yen tsha' là num nkwé mbotni Nsi,

⁸ là tsha' z'a yam nka' mba ngumndot là vù laṅte, neso ndon tu i ghebte, a nsi be miagte, bo ma' i mbwôge.

Nenywinte benkristô

⁹ Fètfèt tse nkôni, mba mba bag tshob ndùlala là, bag tshwèt nywinte num bin, ndù bin nsi ghù bag i ze mebwô z'a fà yôg bin nà.

¹⁰ Nummbe Nsi ke' b'a mèn ketsin, a ke nsi lagte mfa' mine, mba nkôni ze bin tswite num lén se, bin tse bin na' mfa' ben nelàne, mbèn nke mfa' bo là.

¹¹ Là bag kô ndù mba we lo netèt bin tswite yen nkôni là, ndù a tshùb nenywinte z'a dun nà tà nèn miagte,

¹² ndùlala ndù kà bin be ghalèt wut, là ghafi'te ben tse bo nsi tshùa njam bamntù mba fènntù, jù ntsi' nka'ni là.

¹³ Ngelaṅ Nsi ghù nka'ni Abraham nà, a ke ghù mèn ndùb z'a tshob nu nsaṅlaṅ bwe num i là, ndùlala a tshob nu nsaṅlaṅ bwe num tu wul i,

¹⁴ ntshob ndù: Kua' nenùne, me nsi naṅ mbotni num o yàme, me nsi ghù o yàm nga' mbu.

¹⁵ Ndùlala mba Abraham fèn ntù là, a kwé nka'ni.

¹⁶ Nummbe benntùn be nkàn mfe à num mèn ndùb, mfe ze bo kàn nà be lèn ndù bo miagte ntsha.

¹⁷ A ndùlala, Nsi lo be kô nela'te jùndà nka'ni ndaṅndaṅ ndù nekô i ke' bate, ntshob nu nsaṅlaṅ bwe,

¹⁸ ndùlala ndù a tshùa njam tshu bàa ts'a ke' be bate, ts'a ke' ku'ni netatte num bwe là, mfà kua' ko' nefitentù be tse be na' nkù nde, nke ndiag netshùb nenywinte z'a be mbwe be là.

¹⁹ Yen nenywinte là be be mba hanga yôg be là, hanga nenùn mba ze neta z'a tsho njam nzwe ndà Nsi,

²⁰ dù' ze Yésu ngakwé mbwe be na' ntsho bwe, yi z'a tù' ngale'te Nsi ze ndùb yoṅ ntshù' ntùm ntshufa' Mèlkisédék là.