Héber 5 - NTSHOB NSI

¹ Nummbe mba zit ngale'te Nsi ze ndùb lo ze bo lo' i netèt benntùn nà b'a num benntùn num tshu ts'a be mbwe Nsi là, ndùlala ndù a fà tshu neghamte Nsi mba tshu nele'te Nsi num nukebwô.

² A ku'ni nefènte ba kagni mba ghafàn manze, nummbe mba tu wul i nô ntùm nebole,

³ a ndùlala a bwô ndù a fà tshu nele'te Nsi num ko' tse nukebwô mb'a be ngù num benntùn nà.

⁴ Là, sàm mèn ke' be lo' sen fa' nkuni là mba se là, Nsi ke mbèn ntsiaṅ i ndaṅndaṅ mb'a na' ntsiaṅ Aron nà.

⁵ A b'a be ndaṅndaṅ num Kristô, a lo ke kuni tu wul i ndù a tù' ngale'te Nsi ze ndùb, là, a b'a mèn z'a na' ntshob yi ndù: O b'a Mén àm, sènni tu wul àm bwe o là,

⁶ a tshob ntùm mo' dù' ndù: O b'a ngale'te Nsi yoṅ ntshù' ntùm ntshufa' Mèlkisédék.

⁷ A lo be ntùm lé'njù mbàb wul i, a fà nde'te Nsi mba le'te boa nekua' neta mba ntsenyà mèn z'a ku'ni neyôg i num vù là, Nsi lo ju' le't'é', nsô i ntùm lab wut.

⁸ Mba mb'a na' mb'a Mén nà, a lo zi'te neju' ntshu ntùm nge' ts'a yen nà,

⁹ mbwô miagte, ntù' ntun yôg matmat num njoṅ benntùn fa tse bo num nju' ntshu i là,

¹⁰ nummbe Nsi lo fà lén ngale'te Nsi ze ndùb yi ntùm ntshufa' Mèlkisédék.

Ntag num neju' ntshob Nsi

¹¹ Num yen nu là, bag ghù tshu yàm netshobe, là tshen tshu là ta netote, nummbe bin num ndèt wut neju'u.

¹² A lo bwô ndù bin be ghatswite tà fe ndùke lo, là bin tshwèt mbèn nkô ndù bo tswite zin mbwe nu ntùm ntshob Nsi, bin tshwèt mbèn nkô mbùn, ke b'a jujù neta.

¹³ Mba we lo z'a ke' num mbùn nà ke' be ju' ntshob nunetsine, nummbe a b'a mônke'.

¹⁴ Là jujù neta b'a num benntùn tse bo ku' là, ben tse bo tshùa ntùm matnu, ngù zenu nelèn numebwô, ngù zenu nelèn nukebwô là.