Héber 4 - NTSHOB NSI

Ghabamntù nsi tsho ntùm fite Nsi

¹ Ndùlala, mba nka'ni netsho ntùm fit'é ke' là, bag à bin bwôge, nzete ndù kà sàm mèn netèt bin kwate ndù a fàn manze.

² Nummbe bo lo tshob nkùn mebwô mba be, ndaṅndaṅ mba tshen ben nà là. Là, ntshob mi bo na' nju' là, lo ke ywimte ben tse bo ju' là, nummbe bo lo ke kwé men ntshob là ntùm bamntù.

³ Nummbe be tse bag à bin bam nà, tsho ntùm fite, ndaṅndaṅ mb'a na' ntshob ndù: Ndùlala me tshob nsaṅlaṅ bwe ntùm yantù àm, bo ke nsi tsho ntùm yàm fite, mba mba Nsi miagte mfa' mi fe ngelaṅ nenabte njù là,

⁴ nummbe a tshob mo' dù' num mbatte lé'njù sammbàa ndù: Nsi fite wul i num njoṅ mfa' mi fa num mbatte lé'njù sammbàa.

⁵ Là, a bèn ntshob ndù: Bo ke nsi tsho ntùm yàm fite.

⁶ Ndùlala, nka'ni mi a tshob ndù tsemo' ben nsi tsho bwe là ke'e, là ben tse bo bwôgmbwe nju' nkùn mebwô là ke' tsho bwe, nummbe bo ke' bam,

⁷ Nsi bèn njab mo' lé'njù, sènni z'a ntùm David là, ntshob ngelaṅ ngu'njù yàm tôg, mba be lo neju' là ndù: Sènni, a be ze bin ju' nz'é là, kà bin sag ntù tsine.

⁸ A be ze Yoshua ghù bo fite là, mb'a be a ke bèn ntshob mo' lé'njù, ngelaṅ yen nà tôg là.

⁹ Ndùlala fite Sabbat num bwe num nzwit ben Nsi.

¹⁰ Nummbe mèn z'a tsho ntùm fite Nsi là, fite num mfa' mi ndaṅndaṅ mba Nsi na' mfite num mi là.

Neta ntshob Nsi

¹¹ Bag à bin nànte ntùm yen fite là, mbwôg ndù kà sàm mèn fi'te nebe ke bam, ngwù nsi.

¹² Nummbe ntshob Nsi b'a ntùn, mba neta, nke ntshùag ntshùa njoṅ ṅwi njam bàa fa, nke ntsho tà nkum ntùm ntù mba ywèle, ntùm nga mba nzit vôge, nke ntsho'te ntenu mba nkwatenu ntù.

¹³ Sàm mèn ke' lemte mbwe i, njoṅ tshu fa b'a tunntôg mba nge num miag mi, yi ze be nsi siaṅte mbwe i là.

Yésu Kristô ngale'te Nsi ze ndùb ntùm kàn nswe

¹⁴ Ndùlala, mba bag à bin ghù ngale'te Nsi ze ndùb z'a na' ntshùa mfe kamànyam, Yésu, Mén Nsi là, bag à bin tshùb ju ze be bam nà kua' mebwô.

¹⁵ Nummbe ngale'te Nsi ze ndùb ze bag à bin ghù là ku'ni neyen nge' bag à bin ntùm ze be nebole; bo lo laṅt'é num njoṅ tshu fa, nummbe a lo b'a mba be là kà ntag nda' nukebwô.

¹⁶ Ndùlala, bag à bin fèn ntù nèn mbaṅ ko'fen kondèn, ndùlala ndù bag à bin kwé nkôni, njen kondèn z'a nsi ywimte be ngelaṅ z'a ku' là.