Héber 3 - NTSHOB NSI

Yésu Kristô tshùa Mosé

¹ A ndùlala, fètfèt tse nelàn, bin tse bin kwé netsiaṅ mfe kamànyam nà, bin te miag min num ngantum mba ngale'te Nsi ze bag à bin num mbam nà, Yésu:

² A b'a mèn nenùn z'a yab i là, ndaṅndaṅ mba Mosé na' mbe ntùm ndà i là.

³ Nummbe a kwé nkuni ndùb ntshùa Mosé, ndaṅndaṅ mba ngakut ba' ghù ghamte ntshùa ba' là.

⁴ Mba zit ba' lo ghù ngakul i, là ngakut njoṅ tshu fa b'a Nsi.

⁵ Mosé lo be mèn nenùn ntùm njoṅ ndà i fa mba ngafa' là ndù a kwé nta nu ze bo nsi tshob là,

⁶ là Kristô b'a ngatô ndà i mba mén nà. Ndà i b'a be, a be ze bag à bin tshùb fènntù mba nenywinte, nta'nsoṅ be, kua' mebwô tà nèn miagte là.

Num sagntù

⁷ A ndùlala, ndaṅndaṅ mba Ywèt Nelàn tshob là: Sènni, a be ze bin ju' nz'é là,

⁸ kà bin sag ntù tsin mb'a na' mbe ntùm dù' zwe', ntùm lé'njù laṅte num kônkwa,

⁹ dù' ze tà tsin laṅt'àm, ntsho't'àm, bo tse bo na' njen mfa' màm, num ngu'njù ṅam nkuà là;

¹⁰ ndùlala me lo ya ntù num yen zwiaṅ mèn nà, ntshob ndù: Bo num mfàn manze ntùm ntù tshob njoṅ ndù fa, bo ke' lèn manze tshàm.

¹¹ Ndùlala me tshob nsaṅlaṅ ntùm yantù àm: Bo ke nsi tsho ntùm yàm fite.

¹² Fèt tshàm, bin bàm nà ndù kà sàm mèn netèt bin ghù ntù kebwô z'a ke' bam, nga Nsi z'a be ntùn nà,

¹³ là bin ke ntagte wut tsin bin bin njoṅ ngelaṅ fa ze sènni ke' sènni là, ndù kà sàm mèn netèt bin sag ntù njam tatte nukebwô.

¹⁴ Nummbe bag à bin Kristô tamte, a be ze bag à bin tshùb mbwe bamntù be kua' mebwô tà nèn miagte là.

¹⁵ Bo tshob ndù: Sènni, a be ze bin ju' nz'é là, kà bin sag ntù tsin mb'a na' mbe ntùm dù' zwe' là.

¹⁶ A b'a ba we tse bo na' nju'u, nto' zwentù à? A ke b'a njoṅ benntùn fa tse Mosé sô yub mà Egipto là ké?

¹⁷ A na' nja ntù à we num ngu'njù ṅam nkuà à? A ke b'a ben tse bo na' ngù nukebwô, fe tshob vùte num kônkwa là ké?

¹⁸ A na' ntshob nsaṅlaṅ à bo we ndù bo ke nsi tsho ntùm ze fit'à? A ke b'a ben tse bo ke' bam nà ké?

¹⁹ Ndùlala, bag à bin yen ndù bo lo ke ku'ni netsho bwe, nummbe bo lo ke ghù bamntù.