Héber 13 - NTSHOB NSI

Ntag nzenze. Tsha'te

¹ A bwô ndù nkôni fètfèt ghô.

² Kà bin lagte nelo' ghùn, nummbe tsemo' ben lo tshùa njam nelo' ghùn, ndo' ba Angél ke lèn.

³ Bin kwimte ghandàtsha, ndaṅndaṅ mba bin à bo bèn mbe ntùm nkù là; bin kwimte ben tse bo ghùtni yub là, ndaṅndaṅ mba bin zin b'a ntùm ta' wut là.

⁴ A bwô ndù nandà be ju neghamte netèt njoṅ benntùn fa, kunndà nandà be kelo', nummbe Nsi nsi tsho'te ba kattù mba ghaghù màndà.

⁵ Kà nkôni nkàb tô nkwate zin, là bin tsiaṅte num ju ze bin ghù là, nummbe tu wut Nsi tshob ndù: Me ke nsi faṅ o, me ke nsi ghua' o.

⁶ A ndùlala, be ghù nefèn ntù ntshob ndù: Tshùaben b'a ngaywimt'àm, me ke nsi bwôge. Mènntùn ku'ni neghù ke m'à?

⁷ Bin kwimte ghatshagte zin tse bo na' ntshob ntshob Nsi bin nà, ndôte mba yôg sub na' miagte là, ndo' fi'te num bamntù yube.

⁸ Yésu Kristô z'a lo mbe nkôg là, b'a be yi sènni kà nèn miagte.

⁹ Kà bin bam ndù bo soṅte zin ntùm netswite nzenze ts'a b'a tse ghùn nà, nummbe a bwô nefà neta ntù njam kondèn Nsi, ke b'a njam tshujù ts'a ke' be ywimte ben tse bo fà wut tshob num bwe là.

¹⁰ Bag à bin ghù tômbwôg se ghafa' ntùm ntàb ke' ghù ngù' bwe là.

¹¹ Nummbe tshen nyàm nà tse ngale'te Nsi ze ndùb ke ndo' lem tshob, ntsho yi dù' nelàn num nukebwô là, bo ke nton wut tshob à njam ntàb.

¹² A ndùlala, mba Yésu z'a fà ko' lem tse num nelànte ngô là lo yen nge' yàm nzendà ngô.

¹³ Ndùlala be tum ntùm ntab, nèn ntèl i, nket tuswe z'a be ze là.

¹⁴ Nummbe bag à bin ke' ghù ngô z'a tswe yoṅ ntshù' là ntùm njù mànsi, là be ke ndiag à z'a nsi se' là.

¹⁵ Ndùlala be fà jule'te Nsi ghamte Nsi njam i njoṅ ndù fa, yen nà b'a tàm nkub ntshu mi a num mbam lén se là.

¹⁶ Kà bin lagte neghù numebwô mba ywimte, nummbe lèn tshen tshule'te Nsi là num mbwô Nsi.

¹⁷ Bin ju' ntshu ghatshagte zin ntùm nefà wut nsi. Nummbe bo num nzi tshùalo num ntù tsine, nummbe bo nsi bètte zin bo; a bwô bin ghù ndùlala, ndù bo fa' ntùm tsiaṅte, ke ke mféme: Nummbe mba yen nà ke nsi ywimte zine.

¹⁸ Bin le'te Nsi num tu bag; bag nywinte ndù bag ghù nze ntù mebwô, nke nkô nezin mebwô ntùm njoṅ tshu fa.

¹⁹ Njôg mbe me tshwèt ntsiaṅ zin ndù bin ghù ndùlala, ndù bo ba' àm bin ndende.

²⁰ A bwô ndù Nsi fite, z'a sô ngabéb mbwe ze ndùb netèt fe ben njam lem kàn s'a tswe yoṅ ntshù', Tshùaben be Yésu là,

²¹ ghù bin ku'ni ntùm njoṅ mfa' mebwô fa ndù bin ghù ze nekô, ngù ju z'a bwô i là num bin, njam Yésu Kristô, ze ghamte ngu'ngu' b'a ze là. Amén.

²² Fèt tshàm, me tsiaṅ zin ndù bin fènte men ntshob ntag li, nummbe me ke' kite bin yàme.

²³ Bin lèn ndù bo kag mfèt be Timôtio, a be z'a se' ndende là, mba bag yi nsi se' lôte zine.

²⁴ Bin tsha'te njoṅ ghatshagte zin fa mba njoṅ ben nelàn fa. Tse bo Italia là tsha'te zine.

²⁵ Kondèn be njoṅ zin fa! Amén.