Héber 1 - NTSHOB NSI

Yésu Kristô tshùa ba Angél

¹ A lo be mo' ngelaṅ, Nsi tshùa njam ghatshob ntshob Nsi, ntshob nu ba tà yoṅ yàme, mba ntùm mat nzenze;

² ntùm tshen lé'njù li tse mànjam, a tshùa njam Mén, ntshob nu be: Mén z'a na' njab i njùndà njoṅ tshu fa là, Mén z'a na' ntshùa num i, nabte njù là;

³ a b'a nkô nkuni Nsi mba mfuni tu wut Nsi, a num nket njoṅ tshu fa ntshob mi mi neta; a lo be miagte nelànte nukebwô, ntswe num bag bu Nsi ze zwim mfe tù;

⁴ a tù' mèn ndùb ntshùa ba Angél, lén s'a kwé ntùm ntsi' là kwé mbwe ndèn ba Angél.

⁵ Nummbe, a zit Angél ze Nsi to' tshob yi ndù: O b'a Mén àm, me bwe o sènni, mba ndù: Me nsi b'a tàab, a nsi b'a mén àm à?

⁶ A tshob ntùm mo' dù', ngelaṅ z'a ke mbèn nso tuswe i ntùm njù là ndù: A bwô ndù njoṅ Angél Nsi fa vù nsi mbwe i.

⁷ A tshob num ba Angél ndù: A ghù Angél tse tù' ba fetmbaṅ, ngù ghafa' tse tù' ngwat mbwôge,

⁸ là ntshob num Mén ndù: Nsi, ko'fen so b'a ngu'ngu', mba ndù: Kôg nunetsin b'a kôg nufen se;

⁹ o lo kô nunetsin, mbàn nukebwô, a ndùlala, Nsi, Nsi o lo yo' o mfèt neṅwate ntshùa shunku tsho,

¹⁰ mba ndù: Wù Tshùaben, fe neto'te a b'a wù na' nabte tsha'a, kamànyam b'a mfa' mbu mo.

¹¹ Bo nsi bi, là tu wul o, o ghô; njoṅ yub fa nsi ywèn mba nzwe là,

¹² o nsi bote yub mba kummbaṅ nà, bo nsi bate, là tu wul o, o b'a be ze mbile, ngu'njù tsho ke nsi mi.

¹³ A zit Angél z'a to' tshob yi ndù: Tswe num bag bu àm ze zwim tà nkum ngelaṅ me nsi ma' ghakeban tsho nsi, bo tù' nko'nku mu l'à?

¹⁴ Njoṅ yub fa ke b'a ywèt tse bo num mfa'a, tse bo tum yub num fa' ben tse bo nsi kwé yôg mba ntsi' là ké?