Habakuk 3 - NTSHOB NSI

Le'te Nsi ngatshob ntshob Nsi Habakuk

¹ Le'te Habakuk, ngatshob ntshob Nsi, num mat nsindàvù.

² Tshùaben, me ju' ju z'o tshob là, wul àm fét num fa' so me Tshùaben. Ghù fa' so tswite wul i ntùm ngu'ngu'. Là mba ntùm yantù o, a bwô ndù o kwimte kondèn o.

³ Nsi fe Téman nse'e, Nsi Mèn nelàn fe num mbat Paran nse'e! Nkuni mi kabte kamànyam, nkuni mi dun num nsitsha'a.

⁴ Neziag i b'a mba nelàn nà; nkônyam be ntum bu i; neta i ke ndem à bwe.

⁵ Keya' be nzin mbwe i, keya' b'a num ntshùa mi.

⁶ A be ntsin mfi' tsha'a; a be ndôte dù', ngù ngôngô nke mvètte; mbat ts'a tswe yàm nà tshwèt mbe'te, nkônga mi a tswe neshu là nke nkôgte; ntshagnze ts'a be mbwembwe là te nge mbwe i.

⁷ Me yen ndù tse ntàb nzwe Etiopia b'a ntùm nge', mba ndù tse ntàb ngô Madian b'a ntùm bwôg.

⁸ Tshùaben ya ntù num nta'ntse ké? A b'a num nta'ntse ze yantù o kamte là ké? A b'a num dibantse ze tshùagntù o sa njoṅ dù' fa là ké? Ndù o ko' num tsho nyàmdiaṅ, num mu nkalig ngu' à num bwe ké?

⁹ O taṅ dù' ngoṅkél o. A ywèt nkét ketsheb. O be mbag tsha' nta'ntse tum bwe.

¹⁰ Ba mbat be njen o mvètte, nkoṅntse tèn nène, ghem maṅ bo ju' nz'é, a tshag mbu mi tù.

¹¹ Lagnyam bo maṅwù tsin ntùm dù'ntswe yube, num nelàn nkét mu mi a tshwèt nèn nà, num neziag kô so s'a tshwèt nké' là.

¹² O be nke nzin num tsha' ntùm tshùagntù o, nke ntse' ngôngô nku ntùm yantù o.

¹³ O be nèn mbwe num neywimte yu nzwit mèn, num netshu' ze nzwit mèn yu mèn z'o yo' i là. O be mbe' num tu ngatshùagntù, nsat'é matmat.

¹⁴ O be ndo' nkét mu nto tu kamkam tse yi, kamkam tse bo be ntèn mba fetmbaṅ nse' sat'àm nà. Bo be ntshag nze yub tù ntùm tsiaṅte mba bo a' biagte ghayennge' ntùm ngab yub là.

¹⁵ O be ndo' nyàmdiaṅ tsho mfu' dibantse yi, mfu' netob ntse ndùbndùb yi.

¹⁶ Me lo ju'u, kondèn ko' ntù àm. Nkub ntshu màm be mvètte ndùs'a ju' yen nze là là; mvôg màm be nju, ntunkekwi' màm tiagte: Bin tswe ndù kam me ju' lé'njù nge', lé'njù se nge' nsi kam num nzwit mèn z'a be nkam be là.

¹⁷ Nummbe tù mbatsi ke nsi sàme, nkùa ke bèn netshùme, mba ke bèn nebe tù tene, tsha' ke bèn nefà jujù; mbwe nsi mi ntùm kin, nyàmna' ke nsi bèn be ndà nyàm.

¹⁸ Mba ndùlala me kô netsiaṅte num Tshùaben, me kô netsiaṅte num Nsi ngayôg àm.

¹⁹ Tshùaben Nsi b'a yàm neta. A be ngù nku màm be mba mi nshutnyàm nà, nke ngù me nzin num dù' ṅaṅa. Num ngatshagte yobkwi, Num ndoṅ nse'e.