Habakuk 2 - NTSHOB NSI

¹ Me lo be mum yàm dù' fa', ntsin mfe num tuba', ju Tshùaben tshob me là, mb'a ju ze me nsi bùnte yi num yàm lab wut là.

Ngatshob ntshob Nsi

² Tshùaben fà ntshob mi me, ntshob ndù: Kite men ntshob ngatshob ntshob Nsi li, tshebt'é num ntafèt kua' mebwô, ndù bo be siaṅ i a fùage.

³ Nummbe men ntshob ngatshob ntshob Nsi là ke nda't'a ngelaṅ ze bo nabte t'a tù' neku' là. Nu mbit tù' nebumte, be a ke tatte. A be z'a sèn nà, o béb i. Nummb'a nsi bumte, a nsi bumte kà ke tag.

⁴ Tshù, zwiag s'a be nko'te wut là ke' b'a num manze ndaṅndaṅ; là mèn netsin nsi yôg à njam bamntù i.

⁵ Ngako'tewut ke' be tswe ndù kam, a be ndaṅndaṅ à mba mbum ndu' ze ntshu i be mfùag netshob là. A be nga' ntshu i mba ntshu fi là. A ke' be ywèt ndaṅndaṅ mba vùkob, vù là. A be nsoṅte ngôngô nso njam i, nke nkùmte njoṅ nzwit benntùn fa mbaṅ i.

⁶ Là tshen ben ni ke nsi tshob tànkùt num i tshob ntshob ngùm ké? Bo nsi tshob ndù: Nge' tu mèn z'a be ntse'te ju z'a ke' b'a ze là. A nsi be ndùlala tà kum ndùke? Nge' tu mèn z'a be nkwi'te lèt num tse njo là.

Ndon nze tàn

⁷ Tsho ghanjo nsi lo nsi ndende ké? Ghafétt'o, ghanjo nsi lo nsi ndende ké? O nsi tù' ju ze bo kab mbu num bwe là.

⁸ Mb'o na' ndagte ngô yàm nà, tshé' ntumntum nsi lagt'o; nummb'o lo fètte lem benntùn. O lo yab nge' num nu nefètte lem mum ngô, ngù ndùlala mum ngô mba njoṅ ba la' fa.

⁹ Nge' tu mèn z'a be ntse'te nkàbfa' kebwô num tunndà i, ndù a te ze nkàn, dù'ntswe dù' ṅaṅa, ndù kà nge' kab mbu num i là!

¹⁰ Ju z'o kwate là nsi kag tuswe be num yu tunndà; o ghù nukebwô à be num yu wut mb'o sate tunndà yàm nà.

¹¹ Nummbe loṅ nsi tswe num kàbngô kua'a, ta' tù num mi a mum tuba' là bùnte.

¹² Nge' tu mèn z'a be nkut ngô ntùm lem, nke nte ngô ntùm nuketsin nà!

¹³ Yen nà b'a ju ze Tshùaben tàndà ntsho kô, ntumntum ke mfa' fa' à mbwôg, ngôngô ke njen ngùtni à banban.

¹⁴ Nummbe nelèn nkuni Tshùaben nsi dun ntùm njù, ndaṅndaṅ mba ntse be ndun ntùm dibantse là!

¹⁵ Nge' tu mèn z'a ghù mfèl i nu ndu', nke ne' tsheb yi ngù a bum ndu', ndù a yen i tunntôg, nke nze i là!

¹⁶ O a' ghù njwèt tuswe, ke b'a ghamte. A bwô mba wù yu nu, mbe tunntôg, ntswite wul o, nummbe ntu' Tshùaben z'a mum bu i ze zwim nà kaṅ nke ndôt'a wù, tuswe kebwô nsi kabte ghamt'o!

¹⁷ Nummbe nefètte lem z'o ghù Liban nà nsi vù tu o, nezwite nyàm tshob tse nsi kag bwôg num o, num lem benntùn ts'o fètte ntùm ngôngô, netèt ntumntum, lem ba la' là.

¹⁸ Neto nekom ywimt'a ke kà ngafa' nke nkom i à? Neto tùn ywimt'a ke ndùs'a tshwèt nke ntswit'a tatte l'à? Numke ngafa' nke njab ntù i num bwe, ndù a ke nabt'a neto ts'a ke tshob à?

¹⁹ Nge' tu mèn z'a be ntshob ntshwèn ndù lo tù, nke ntshob loṅ s'a ke' be tshob là ndù bam num miaglo là! A ghù netswite mo' nu ké? Tshù, bo lo' gol mba nkàb nabt'é yi, là, lèn zwiag ke num i.

²⁰ Tshùaben b'a ntùm ndà i ze nelàne, a bwô ndù njoṅ njù fa tswe ndù kam mbwe i.