Ghasa'kame 7 - NTSHOB NSI

¹ Yérubbaal z'a b'a Gédéon nà lo nsi boa ngô fa nkebnjù nèn nte mbàn mbaṅ Harod. Ze mbàn ba Madian na' mb'a tu ze Gédéon, nze kônga Moré, ntùm tômbo'o.

² Tshùaben tshob Gédéon ndù: Benntùn tse bin à bo be là yàm neshu mb'a be me fà ba Madian mum mbu mub là. Mb'a be bo lo' ka'te bwe nke ntshob ndù: A b'a mbu mag bèn ntshu' yage.

³ Ndùlala tshob ngô ndù mèn z'a tshwèt mbwôg là bèn njam, nèn num mbat Galad. Benntùn ntsha' ntshob bàa ṅam mbàa tum mbène, a tù' benntùn ntsha' gham.

⁴ Tshùaben tshob Gédéon ndù: Benntùn bèn njàm mba ndonni neshu. Ghù bo swe' nèn mà ntse, m'a' tswitte yub wù bwe; mèn ze me nsi tshob ndù bin yi nèn nà bin yi nsi nène; mèn ze me nsi tshob ndù kà bin yi nèn nà, kà bin yi nèn.

⁵ Gédéon ghù ngô swe' nèn mà ntse, Tshùaben tshob yi ndù: Njoṅ benntùn fa tse bo nsi lo' lém sob latte ntse yi mba mbù là mb'o nsi yab yub njam, ben tse bo te nkekwi' mub nsi là o sô yube.

⁶ Benntùn tse bo latte ntse, nke ndo' bu yub ma' ntse yi ntshu bo là be ntu nkù tat. Mo' tshé' benntùn te nkekwi' mub nsi kà nu ntse.

⁷ Tshùaben tshob Gédéon ndù: me nsi tshùa mum mbu benntùn nkù tse bo latte ntse là kà yôg zine, fà ba Madian mum mbu mu. Mba zit mèn no netèt tshé' benntùn bèn ndà i.

⁸ Bo kwé jujù ngô boa tshob nta. Yen nà be tôg Gédéon lé'te njoṅ ba Israél fa, mba we lo bèn ntùm ze ntàb; a tù' à boa nda' benntùn nkù tat. Mbàn Madian na' mb'a mà tômbo'o, tun ze mbàn.

Nkwate netshùa ntsho

⁹ Tshùaben tshob Gédéon tèttswe' ndù: Lo nsi, nswe' nèn mà ntùm mbàn, nummbe me fà i mum mbu mu.

¹⁰ A be z'o bwôg neswe' nèn bwe là, o lo' ngafa' o Pura bin yi nèn.

¹¹ O nsi ju' ju ze bo nsi tshob là, a tshùa ndùlala neta tsho mum mbu mu. Ndùlal'a bwô ndù o swe' nèn mbàn. A swe' nèn bo Pura ngafa' i, tà nkum tà neghebte ntshu mbàn.

¹² Ba Madian, ba Amalék boa bon ntumnyam lo sa mà tômbo' mba ngamntàn z'a yàm neshu là, kamél tshob be njoṅ ke siaṅ nze mba nkwango' mi a dibantse là.

¹³ Gédéon se' nju' mo' mèn nke nsoṅ nshun i mo' njem, nke ntshob ndù: Me yen ta' tu' bàn nsa bwoṅte nse' ntùm mbàn ba Madian, nse' ntsham num ntàb, ngù a vù nsi, ngwù kà mbùnte njamnjam. Nshun i bùnte ndù:

¹⁴ Mb'a b'a ṅwi Gédéon nshum Yoas, ze Israél kà ke tag. Nsi fà Madian bo njoṅ ze mbàn fa mum mbu mi.

Gédéon ghabte ben nkù tat nze tat kà nsate ba Madian

¹⁵ Ndùse Gédéon ju' yen njem nà mba ntote ntun mi là, a vù nsi kabkab. A bèn njam ntùm mbàn ba Israél, ntshob ndù: Njoṅ benntùn fa tsin tù! Tshùaben fà mbàn ba Madian mum mbu mine.

¹⁶ A ghabte benntùn nkù tat nkam ntat, mfà nta boa nkab mi tswe'nka' be ntùm bwe là njoṅ yub fa.

¹⁷ A tshob bo ndù: Bin lôte mba me nsi ghù là, ngù zin mba me là. Ndùse me nsi kum mbaṅ mbàn nà, bin nsi ghù ju ze tu wul àm nsi ghù là.

¹⁸ Bag à tshàm ben nsi tô nta, tu wut tsin bin bèn ntô zin nta ndiaṅ mbàn yi mbume, nkua' ntshob ndù: Num Tshùaben mba num Gédéon.

¹⁹ Gédéon boa tse ben kum mbaṅ mbàn num nguan tshaṅ tèttswe', ndù bo njôg nelo nelo' ghabéb ntshu mbàn. Bo tô nta, ntsit nkab mi a be bu bo là.

²⁰ Ndùlala njoṅ nkam benntùn ntat fa tô nta, ntsit nkab. Bo tshùb nka' bu yub ze kwéb, ntshùb nta bu yub ze zwim num neke ntô, nke nkua' ntshob ndù: Ṅwi b'a num Tshùaben mba num Gédéon.

²¹ Njoṅ yub fa tsinte tù ndiaṅ mbàn mbume, mba we lo num ze dù'; là njoṅ benntùn fa to' nekù, nke ndeme, nke nkua'a.

²² Benntùn ntu nkù tat nke nke' ntô be nta; Tshùaben ghù bo zwite wut tshob ṅwi ntùm mbàn bo bo. Njoṅ benntùn fa ntùm mbàn kù tà nèn nkum Bét-Shitta nze Tserera, nkum tà mbaṅ Abél-Mehola z'a mbaṅ Tabbat là.

²³ Ba Israél kùmte, ben Néftali, tse Aser boa ben Manasé yab njam ba Madian, nta' yube.

²⁴ Gédéon tum ntum mfe num mbat Efraim ntshob ndù bo swe' mbumte boa ba Madian, nkeb nze bo mà ntse tà nkum Bét-Bara bo nze Yordan. Njoṅ tse ben Efraim fa kùmte, ndo' nze mà ntse tà nkum Bét-Bara bo nze Yordan.

²⁵ Bo ghom fenfen Madian bàa, Oréb bo Zéeb. Bo zwi Oréb num gho Oréb, nzwi Zéeb loṅ tshab Zéeb. Bo yab njam ba Madian, ndo' tu Oréb bo ze Zéeb nse' mfà Gédéon mo' yoṅ Yordan.