Ghasa'kame 6 - NTSHOB NSI

Madian nô tu Israél

¹ Bon Israél ghù nukebwô num miag Tshùaben; Tshùaben fà yub mum mbu ba Madian num ngu'njù sammbàa.

² Madian lo' à kua' bu neta kà ndab Israél yi. Bon Israél lo ke nkù ba Madian ntsho ntùm mfub mi a be num ba mbat là, ntsho ntùm ngabloṅ boa mfé' ngô mi a nèn tù neshu là.

³ A lo ke mbe ndùse Israél ywit ju là, Madian bo Amalék, boa bon ntumnyam ko' nse' nkam i ntsho.

⁴ Bo nke nte mbàn yub mbwe Israél, mbagte njoṅ tshu fa ts'a yàm ntùm ngô là tà nkum Gaza, ke faṅ sàm ju Israél, ke jujù, ke mbwe, ke nyàmna', ke nkekwèn lo.

⁵ Nummbe bo ke nko' à boa nyàm tshobe, boa ntàb tshobe, ṅwag à mba bwoṅ ngamntàn nà; bo lo yàm nga' mbu, bo boa kamél tshobe. Bo ke nse' ntùm ngô a num nebagt'é.

⁶ Israél b'a neta njennge' num Madian. Ndùlala bon Israél kua' ntsiaṅ Tshùaben.

⁷ Ndùse bon Israél kua' ntsiaṅ Tshùaben, num nu Madian nà,

⁸ Tshùaben tum ta' ngatshob ntshob Nsi bon Israél. A tshob bo ndù: Tshù ju ze Tshùaben Nsi Israél tshob li: Me lo ghù bin tum Egipto, ndù me lo à sô zin ndà kuan.

⁹ Me lo tshu' zin bu ba Egipto, ntshu' zin bu ben tse bo ke ngùtni zin nà; me lo yoṅ yub mbwe bin, mfà ngô yub bin.

¹⁰ Me lo tshob bin ndù me b'a Tshùaben Nsi zin, ntshob ndù kà bin bwôg tse nsi ba Amor tse bin tshwèt ntswe netèt bo là. Là, bin lo ke ju'ntshu àm.

Nsi fà fa' neyôg Israél Gédéon

¹¹ Yen nà be tôge, Angél Tshùaben se' ntswe bam mo' tù mà Ofra. Sen tù là na' mb'a se Yoas, mèn ntùm tunndà Abiézer. Gédéon nshum Yoas na' mb'a loṅ tshab, nke nkù ba Madian nke ntsham nsa.

¹² Angél Tshùaben ṅwag, ntshob yi ndù: Sa'nde' ze neta, bin Tshùaben bèn mbe.

¹³ Gédéon tshob yi ndù: Tshùaben àm, bag à Tshùaben lo mbèn nke mbe, mba be lèn tshen nu li nke ntsho yag à numke? Lèn tshen nsà tse tà tshag be ntshob bag, ndù Tshùaben lo ghù bo ko' mà Egipto là b'a yà? Ndonni Tshùaben ghua' yage, mfà yag mum mbu ba Madian.

¹⁴ Tshùaben kaṅ wul i ndôt'é, ntshob ndù: Lo' yen neta z'o ghù là nèn ntshu' Israél yi bu Madian; a ke me bèn ntum o ké?

¹⁵ Gédéon tshob yi ndù: Tshùaben àm, me nsi lo' à ke tshu' ba Israél yi à? Yen mbe yàm tunndà b'a fenyu' i netèt ben Manasé. Tu wul àm b'a ze nke' ntùm ndà tàa.

¹⁶ Tshùaben tshob yi ndù: Me nsi be bag wù, o lab Madian mba ta' mènntùn ntshù' là.

¹⁷ Gédéon tshob yi ndù: A be ze me be mènfen mbwe o là, o la'te ta' keki me, me tshùa bwe ndèn ndù a b'a wù bèn nke ntshob me.

¹⁸ Gédéon tshob Tshùaben ndù: Kà lo nsen ni tà nkum ndùse me bèn mbaṅ o là; a bwô me lo' yàm ju bwôntù nse' yi mbwe o. Tshùaben tshob ndù: M'a' tswe nsen ni tà nkum ndùs'o bèn nà.

¹⁹ Gédéon tsho ndà, nabte ta' mén mbwe, ta' kesoṅ mbab bàn, na bàn ke te ywibte se yi. A yab mbàb ntùm ntsi, naṅ ntse ntàmtù mi a nyi là ntùm kab, nket nèn nte mbwe i bam tù dù' z'a be là.

²⁰ Angél Nsi tshob yi ndù: Lo' mbàb boa bàn ke te ywibte se njab num sen gho li, naṅ ntse ntàmtù mi o nyi là num bwe. A ghù ndùlala.

²¹ Angél Tshùaben tshag ntshùa kôg s'a be bu i là, nkwag mbàb yi boa bàn ke te ywibte se. Ndùlala mbwôg lo num gho nkù mbàb boa bàn ke te ywibte se. Angél Tshùaben bi num miag mi.

²² Gédéon yen mb'a Angél Tshùaben, ntshob ndù: Tshùaben Nsi, me b'a njennge', nummbe me yen Angél se se.

²³ Tshùaben tshob yi ndù: Tswe fite, kà bwôg, o ke nsi kwù.

²⁴ Gédéon kut tômbwôg Tshùaben, ntswi lén tômbwôg là ndù fite; sen tômbwôg là ke' Ofra tà nkum sènni. Ofra b'a dù' tsha' tunndà Abiézer.

Gédéon sate mbwe' nsi Baal

²⁵ A be tèttswe' Tshùaben tshob Gédéon ndù: Lo' metshab fot mfô tàan, bo mo' fot mfô s'a ghù ngu'njù sammbàa là sate tômbwôg Baal se tàan ghù là, be'te neto tù z'a be num bwe là.

²⁶ Yen nà nsi be tôg o bom tômbwôg Tshùaben Nsi o mfe num ntshùa sen ghô li. O nsi lo' mbatte fot mfô lo' tshwèn neto z'o lo mbe'te là ton i yi mba jule'te là.

²⁷ Gédéon lo' ben gham netèt ghafa' tse, ngù ju ze Tshùaben tshob yi là. A fa' sen fa' l'a tèttswe' nummb'a lo ke mbwôg tunndà tàab boa ba la'. A ju z'a ghù k'a mfa' sen fa' l'a njam nà.

²⁸ Ndùse benntùn bam num miaglo nkebnjù là, bo yen ndù bo sate tômbwôge, mbe'te neto z'a be mbaṅ bwe là, nton mbatte fot mfô num tômbwôg nswe.

²⁹ Bo nke mbètte bo bo ndù: We bèn ngù yen ju li à? Bo to' nediag ng'é, bo tshob bo ndù a b'a Gédéon nshum Yoas.

³⁰ Ndùlala, bo kua' nèn ntshob Yoas ndù: Lo' mén o nse' yi, a' kwù. A sate tômbwôg Baal, mbèn mbe'te neto tù z'a mbaṅ bwe là.

³¹ Yoas bùnte njoṅ ben fa tse bo ke ntsiaṅ i là ndù: A b'a bin bèn tshètte ze njam Baal ké? Bin bèn ywimt'é ké? Mba we lo z'a tshètte ze njam Baal là nsi kwù kà njù ndàne. A be ze Baal b'a ta' nsi là, a tshètte ze njam ze tu, mba bo sate tômbwôg se là.

³² Bo tswi lén Gédéon Yérubbaal sen lé'njù là, ntshob ndù: A bwô ndù Baal tsho't'é mb'a sate tômbwôg se là.

Gédéon bètte ta' keki Nsi

³³ Njoṅ ba Madian fa, ba Amalék fa, boa njoṅ bon ntumnyam fa tamte, ndut Yordan, nte mbàn yub tômbo' Yizréel.

³⁴ Ywèt Tshùaben tsho num Gédéon, a tô nta, ntsiaṅ Abiézer yi ndù a se' ntam njam i.

³⁵ A tum ntum ntùm ngô Manasé, ntsiaṅ i yi ndù mba yi se' ntam njam i. A tum ntum mba ntùm ngô Aser, Zabulon bo Néftali, bo ko' mbumte boa bo.

³⁶ Gédéon tshob Nsi ndù: A be z'o kô netshùa à mum mbu màm kà ntshu' Israél, mb'o na' ntshob là,

³⁷ mba m'a' yab nyiaṅ njùmbwe dù' netsham nsa. A be ze njù be làn meme' b'a nda' num nyiaṅ njùmbwe, njoṅ dù' fa b'a be nejumte là, mba me nsi lèn ndù o nsi tshùa mum mbu màm tshu' Israél mb'o na' ntshob là.

³⁸ A be mb'a na' ntshob là. Njù làn a lo' nyiaṅ njùmbwe nyi, meme' tum bwe, mfà ntse t'a be ta' kob se ntùn.

³⁹ Gédéon tshob Nsi ndù: Kà yantù o lo nsi num àm, m'a' bèn ntshob nu nda' yen yoṅ i li. M'a' bèn ngù mo' keki bag yen nyiaṅ njùmbwe li. A bwô ndù meme' be njoṅ dù' fa kà ntag nda' yen nyiaṅ njùmbwe li z'a be ze nejumte là. Nsi ghù be ndùlala yen tèttswe' là.

⁴⁰ Nda' nyiaṅ njùmbwe bèn mbe nejumte, meme' vù num njoṅ dù' fa.