Ghasa'kame 4 - NTSHOB NSI

Débora bo Barak

¹ Ehud lo kwù, ba Israél bèn nto' neghù nukebwô num miag Tshùaben.

² Tshùaben swèn yub mum mbu Yabin mfen Kanaan z'a ke ntô Hatsor là. Tàndà ntsho i na' mb'a Sisera, nke ntswe Haroshet-Goim.

³ Bon Israél kua' ntsiaṅ Tshùaben, nummbe Yabin lo ghù nkalig ntùn nkù bwe'e, nke ma'ni kua' kebwô num ngu'njù ṅam mbàa.

⁴ A lo be be num yen ngelaṅ nà, Débora ngatshob ntshob Nsi, nzwi Lappidot, be ngasa'kam Israél.

⁵ Débora lo ke ntswe bam ten netèt Rama bo Bétél, num mbat Efraim; bon Israél ke nko' nèn a bwe k'a nsa' kam sob bo bwe.

⁶ Débora tum bo tsiaṅ Barak nshum Abinoam, ze Kédesh-Néftali, a tshob yi ndù: Tshù ju ze Tshùaben Nsi Israél tshob li: Nèn nko' num mbat Tabor, ndo' benntùn netèt bon Néftali boa tse Zabulon ntsha' gham;

⁷ me nsi tènte Sisera tàndà ntsho Yabin boa nkalig mi, boa soyé tse tshag wù ntùm fub Kison, fà yub mum mbu mu.

⁸ Barak tshob yi ndù: A be ze bag wù bèn nèn nà, mba m'a' nèn; l'a be ze bag wù ke' bèn nèn nà, mba me ke nsi nène.

⁹ Débora bùnte ndù: Bag wù nsi nène; là o ke nsi ghù ghamte num nze z'o zin bwe là, nummbe mba Tshùaben a' fà Sisera à mum mbu ta' mènnzwi. Débora lo nsi, nèn bo Barak Kédesh.

¹⁰ Barak tsiaṅ Zabulon bo Néftali Kédesh; benntùn ntsha' gham zin njam i. Débora nèn bo yi.

¹¹ Héber ze Kén nèn nte ze ntàb Kédesh, mbaṅ tshalon s'a Tsaannaïm nà. A lo sô wul i num tsemo' ba Kén, nzwit Hobab, z'a be ntse Mosé là.

¹² Bo soṅ Sisera ndù Barak nshum Abinoam lo nèn num mbat Tabor.

¹³ Nelo fe Haroshet-Goim, Sisera tse'te njoṅ mi nkalig fa, nkalig tùn nkù bwe'e boa benntùn tse bo be njam i là ntùm fub Kison.

¹⁴ Ndùlala Débora tshob Barak ndù: Lo nsi, nummb'a b'a lé'njù se Tshùaben nsi fà Sisera mum mbu mu là. Tshùaben ke l'a tshwèt nzin mbwe o ké? Barak swe' num mbat Tabor ndù a ghù benntùn ntsha' gham njam i.

¹⁵ Tshùaben ma' Sisera boa nkalig mi mba ben tse mum mbu Barak. Sisera swe' num kalig se nkù nku.

¹⁶ Barak yab njam nkalig bo ntshu ntsho tà nèn nkum Haroshet-Goim. Njoṅ ze ntshu ntsho Sisera fa vù num ntshùag ṅwi, sàm ta' mèn mba ntshù' ke tum.

¹⁷ Sisera kù nku, ndem ntùm ntàb Yaél nzwi Héber, ze Kén, nummbe fite lo be netèt Yabin mfen Hatsor bo tunndà Héber ze Kén.

¹⁸ Yaél tum mbumte bo Sisera ntshob yi ndù: tshùaben àm, tsho ndà àm, kà bwôg. A tsho ntùm ntàb i, Yaél lem i bam belangé.

¹⁹ Sisera tshob yi ndù: Netsho'o, fà metsit ntse me nu, ntù àm kù neshu. A tsho' ntu' ngub, ze mbùn mfà yi a nu, a bèn nkabt'é.

²⁰ Sisera bèn ntshob Yaél ndù: Tum ntsin ntshu ntàb, a be ze mèn bètt'o mbe mènntùn ndà kedi là, o bùnte ndù nga.

²¹ Yaél nzwi Héber tshùb saṅ ntàb, ndo' hama nya'te nèn mbaṅ i, ndo' saṅ nsob mbaṅ tu i yi k'a tsho ntùm tsha'a. A lo be be ndù a zi neshu nummb'a lo bole; ndùlal'a kwù.

²² Mba Barak ke mbwe Sisera là, Yaél tum mbumte bo yi, ntshob ndù: Se' me la'te mèn z'o tshwèt ndiag là wù. Barak tsho ndà Yaél, ntèt Sisera ndù a nyit tètndà, nkwù, saṅ bo sob mbaṅ tu i là ke' bwe.

²³ Tshùaben kag tuswe tu Yabin mfen Kanaan sen lé'njù là mbwe bon Israél.

²⁴ Bu bon Israél lèt num Yabin mfen Kanaan be neshu, tà nkum ndùse bon Israél biagt'é fa là.