Ghasa'kame 20 - NTSHOB NSI

Njoṅ bon Israél fa ma' Benjamin ntsho

¹ Njoṅ bon Israél fa tum, neto' Dan nèn nkum Ber-Shéba bo ngô Galad, ntamte ntù' mba ta' mènntùn ntshù' là, nèn mbwe Tshùaben Mitspa.

² Fenfen njoṅ nzwit fa, njoṅ tunndà bon Israél fa nèn netèt mbumte ben Nsi. Benntùn ntu ntsha' nkù kuà be nsi, ndù bo tshùb ṅwi.

³ Bon Benjamin ju' ndù bon Israél ko' nèn Mitspa. Ba Israél tshob ndù: Bin soṅ yag mba yen nukebwô là na' ntôg yi là.

⁴ Ndùlala mén Lévi, ndu mènnzwi ze bo zwi i là tshob ndù: Me lo tsho Guibéa z'a be tsha' Benjamin nà bag nzwi àm num nezi bwe.

⁵ Là, ba Guibéa kam num àm, nse' ndam ba' ze me zi bwe là, nke ndiag nezwi àm, ndùlala nelo' nzwi àm k'a kwù.

⁶ Ndùlala me lo' i, nkebt'é nkam nkam, ngabte ntùm njoṅ tse tsha' Israél ts'a ghù ngô bwe là, nummbe bo là lo ghù nu ke to' yen, ngù tshùaya'nu ntùm ngô Israél.

⁷ Tshù bin bon Israél là tse bin be nsi ndonni là. Bin tshob mba bin yen zin nà, mba mba bo nsi ghù là.

⁸ Ngô lo nsi mba ta' mènntùn ntshù' là ntshob ndù: Sàm mèn ke nsi nèn ntùm ze ntàb, mèn ke bèn njam ndà i.

⁹ Tshù ju ze be nsi ghù Guibéa li: Be tam tô num i, ma' i ntsho.

¹⁰ Ntùm njoṅ nzwit Israél fa, bo nsi lo' ben gham netèt ben nkù, ndo' ben nkù netèt ben ntsha' mbùm, ndo' ben ntsha' mbùm netèt ben ntsha' gham, ndù bo lôte nu num jujù soyé tse bo se' so ntsha tu Guibéa Benjamin num tshùaya'nu z'a ghù ntùm ngô Israél là.

¹¹ Tshù mba njoṅ ba Israél fa tamte mba ta' mènntùn ntshù' ndo nsi num tusô là.

¹² Nzwit ba Israél tum benntùn ntùm njoṅ tse tunndà Benjamin fa, bo nèn ntshob ndù: Yen lèn nukebwô li ze bin ghù netèt bin nà b'a ndùke?

¹³ A bwô bin fà ghaghù nukebwô tse bo be netèt bin Guibéa là bag ndonni, bag zwi yube, nsô nukebwô yi netèt Israél. Là, bon Benjamin ke kô neju' ntshu fèt tshob bon Israél.

¹⁴ Bon Benjamin tum ntùm ntusô mube, ntse'te Guibéa num nele' bon Israél ntsho.

¹⁵ Bo siaṅte bon Benjamin tse bo tum ntùm ntusô là, bo be benntùn ntsha' ntshob ntôg ṅam mbàa, ghatshùb ṅwi, ke siaṅ ba Guibéa tse bo be yub benntùn nkù sammbàa, mb'a ba nduku là.

¹⁶ Netèt njoṅ tshen benntùn nà fa, ba nduku lo be bwe nkù sammbàa ke be lo' bu yub ze zwim mfa' yi. Tshen ben nà lo ghù nelo' shùmte ndaṅ ntàn nyiaṅtu yi kà ke sàm.

¹⁷ Bo siaṅte mba ba Israél, ke kwa bon Benjamin ntùm bwe, bo tum benntùn ntsha' nkù kuà ghatshùb ṅwi, ghama' ntsho.

¹⁸ Bon Israél ko' nèn Bétél, mbètte Nsi nu ntshob ndù: We z'a nsi bwôg ko' ma' bon Benjamin ntsho netèt bag à? Tshùaben bùnte ndù: Yuda bèn bwôg ko' nèn bwe.

¹⁹ Njù yoṅ mbe làne, bon Israél lo ntam manze, nte mbàn mbaṅ Guibéa.

²⁰ Ba Israél kù' nèn nkam ben Benjamin ntsho mbwe Guibéa.

²¹ Bon Benjamin tum ma' ba Israél nsi sen lé'njù là ben ntsha' ntshob bàa ṅam mbàa.

²² Là, bon Israél bèn mfèn ntù, ntsin nka num dù' bo tsin bwe mbwe lé'njù là num nele' ntsho.

²³ Bon Israél nèn mbwe Tshùaben mbètt'é nu tà nkum mfetnjù nke ntshob ndù: Be me bèn nko' nèn ma' bon mfèl àm Benjamin ntsho ké? Tshùaben bùnte ndù: Bin nèn num i.

²⁴ Bon Israél bèn ndo nsi mbatte yoṅ bàa num bon Benjamin.

²⁵ Bon Benjamin tum Guibéa, mbèn ma' ba Israél ghatshùb ṅwi nsi benntùn ntsha' ntshob fom gham.

²⁶ Ndùlala njoṅ ngô Israél fa ko' nèn Bétél, ntswe mbwe Tshùaben bwe nke nkua'a. Bo tswe nziku' sen lé'njù là tà nkum mfetnjù. Bo ton ba nyàm Tshùaben, mfà tshule'te tse nema' mbu.

²⁷ Bon Israél bètte Tshùaben nu; Koṅ Kàn Nsi na' mb'a bwe yen ngelaṅ nà.

²⁸ Finéas, nshum Eléazar, nshum Aron bèn nke ntsin mbwe Nsi yen ngelaṅ nà. Bo tshob ndù: Be me bèn nko' nde' bon mfèl àm Benjamin ntsho ké ke me faṅ n'à? Tshùaben bùnte ndù: Bin ko'o, nummbe m'a' fà yub num mbu min ndamnjù.

²⁹ Ndùlala Israél lemte benntùn mbaṅ Guibéa ndiaṅ mbume.

³⁰ Bon Israél ko' nèn num bon Benjamin num mbatte lé'njù tat, ntsin nka num ntsho mbwe Guibéa mba bo ghù tsemo' yoṅ nà.

³¹ Bon Benjamin tum, ntam njam ngô, mfaṅ bo soṅte yub nèn yi nesà mbaṅ tusô. Bo to' nezwite benntùn netèt ngô mba bo ghù tsemo' yoṅ nà num manze ts'a ke nko'o, mo' nke nèn Bétél, mo' nke ntshùa tshwèt nèn Guibéa là. Bo zwite ba Israél nguan ntu ṅam ntat.

³² Bon Benjamin lo ke ntshob ndù: Tshù bo là be bèn ndab yub mbwe be mba tsemo' yoṅ tse là. Là, bon Israél nke ntshob ndù: Be kù, nsoṅte yub ndo' nèn yi nesà mbaṅ tusô, nèn bo num ba manze.

³³ Njoṅ ba Israél fa faṅ dù' bo lem nà, nèn ntsin nka Baal-Tamar. Ntshu ntsho z'a lem nà tum njab njam bon Benjamin nze Maaré-Guibéa.

³⁴ Benntùn ntsha' gham tse bo tsho' yub là nèn nkum mbwe Guibéa. Ntsho lo ta neshu, kà bon Benjamin ke bèn nke magte nu z'a nsi tsho yub l'a nemagte.

³⁵ Tshùaben lab Benjamin mbwe Israél. Bon Israél zwite bon Benjamin sen lé'njù là ntsha' ntshob tàn ṅam mbàa ngù ben nkù, njoṅ tshen ben ni b'a ghatshùb ṅwi.

³⁶ Bon Benjamin lo ke ndôte bon Israél à mba bo a lab yub là, nummbe bon Israél ke nkag ngô Benjamin, nke nefite dù' ze bo lem bwe mbwe Guibéa là.

³⁷ Ben tse bo lem nà tsho' ngwù num Guibéa be ndende, nzwite njoṅ benntùn fa tusô ṅwi.

³⁸ Bo ghù mba bo na' nabte là, nummbe bo lo tshob ben bo lemte là te mbwôg tusô, mo' tonkèt nzembwôg nke nko' bwe.

³⁹ Ndùlala ba Israél kaṅ njam num ntsho. A lo be be ndù bon Benjamin zwite benntùn nguan ṅam ntat, nke ntshob ndù: Kà ke tag be bèn ndab yub mba mbwe yoṅ i là.

⁴⁰ Mba ndùlala, bo yen mo' tonkèt nzembwôg nke ndo tusô nko' nèn tù. Ben Benjamin lôte njam, njen nzembwôg nke ndo njoṅ dù' fa tusô nko' nèn kamànyam.

⁴¹ Ba Israél kaṅ njam num ntsho, tse ben Benjamin b'a ntùm bwôg ndùse bo yen nge' z'a nsi tsho yub là.

⁴² Ndùlala bo kaṅ wut yub, nkù ntshùa num manze z'a kônkwa là. Là, ba Israél te njam bo, nzwite njoṅ ben fa tse bo tum ntùm ntusô là.

⁴³ Bo lam Benjamin ndiaṅ mbume, nta' yube, ngo' yub à negho' tà nkum mbwe Guibéa nze bag ntumnyam.

⁴⁴ Ben Benjamin tse bo ghô tshwèt ntsho là be ntsha' ntshob fom gham, mb'a ba nduku.

⁴⁵ Ba Israél zwite benntùn ntsha' tàn num manze netèt ben tse bo kaṅ mvèn yub nkù nèn nze kônkwa, num gho Rimmon nà. Bo ta' yub nèn nkum Guidéon, nzwite benntùn ntu ntsha' bàa.

⁴⁶ Ben Benjamin tse ba Israél zwite sen lé'njù là là tamte mbe benntùn ntsha' ntshob tàn ṅam mbàa. Njoṅ yub fa b'a be ghatshùb ṅwi.

⁴⁷ Benntùn nkù ntôg tse bo kaṅ mvèn yub nkù nèn nze kônkwa, num gho Rimmon nà ghô bwe ṅwù kuà.

⁴⁸ Ba Israél bèn njam mbaṅ bon Benjamin, ngwatte yube, neto' num ben bo be ntùm ntusô là kà nkum num ba nyàm, nzwite mba ke lo ze bo tèt là. Bo te mbwôg mba num njoṅ ntusô fa mi a tù' là.