Ghasa'kame 2 - NTSHOB NSI

Tshùaben ya ntù ben tse

¹ Angél Tshùaben lo mà Guilgal nko' nkum Bokim, ntshob ndù: Me na' nsô zin ntum yi Egipto à ndù bin se' ntsho ntùm ngô ze me na' nsaṅlaṅ bwe tà tsin mbe me nsi fà bin nà. Me na' tshob ndù: Mba lé' ntshù' me ke nsi bagte kàn se bag bin wat là.

² Ndùlala, bin ke nsi bèn wat zin kàn bin à ben tse bo be ntùm yen ngô li là, bin nsi sate ba mbwe' tshobe. Là, bin na' ke ju' ntshu àm. Ke bèn ngù bin ghù ndùlal'à?

³ Ndonni me tshob ndù: Me ke nsi bèn ta' yub mbwe bin, là, bo nsi ke b'a be mbaṅ bin, ba nsi tshob be ywi' mbwe bin.

⁴ Ngelaṅ ze ngantum Tshùaben na' miagte netshob tshen tshu là bon Israél là, ba la' fà nze tshob tù, nkua'a.

⁵ Bo yab lén dù' là ndù Bokim, nke mfà tshu nele'te Nsi yi bwe.

Vù Yoshua

⁶ Yoshua ta' benntùn, mba zit mén Israél lo nèn ntùm ko' ze dù', ntshùate ndùlala nkwé ngô yube.

⁷ Bo na' ke mfa' Nsi njoṅ ngelaṅ fa ze Yoshua be ntùn nà, mba njoṅ ngelaṅ fa ze ba dùbdùb tse bo na' njôg ngelaṅ Yoshua, njen njoṅ tshu mebwô fa tse Tshùaben na' ngù num Israél là.

⁸ Yoshua, nshum Nun, ngafa' Tshùaben na' be kwù ndù a ghù ngu' mén bùm nkù.

⁹ Bo tshoṅ i num dù' tsha' ze bo na' ngabte mfà yi mà Timnat-Hérès, num mbat Efraim mbaṅ mbat Gaash là.

¹⁰ Yen nà be tôge, njoṅ tshen zwiaṅ benntùn nà fa tam njam ba tà tshobe, yub zwiaṅ na' be tôge, mo' zwiaṅ bèn ndo tù, nda' ndù bo na' ke lèn Tshùaben, ke bèn ndèn mba fa' s'a fa' num Israél là.

Bon Israél ghua' Tshùaben, a naṅ ntsha tu bo

¹¹ Bon Israél ghù ju z'a ke' bwô là num miag Tshùaben, nke mfa' ba nsi Baal.

¹² Bo na' ke mfaṅ Tshùaben, z'a be Nsi ba tà tshobe, Nsi z'a na' nsô yub ntum yi Egipto là, nke mbét njam tsemo' nsi ba ghùn tse bo lam yub mbum nà, nke ngamte yube, yen nà ghù ntù Tshùaben ya num bo.

¹³ Bo ghua' Tshùaben ntù' ke ngamt'a Baal boa Astarté.

¹⁴ Ndùlala, ntù Tshùaben ya num Israél, a faṅ yub mum mbu ba zwi ndo' ntsha', bo ket tshu tshobe a bèn nswèn yub ghakeban tse bo diaṅ yub mbum nà. Bon Israél ke bèn ndèn mba be bo ghù kà ntum mbu ghakeban tshob là.

¹⁵ Njoṅ mba bo ke ntum nà, Tshùaben tù' ke mbe njam bo boa nge' yub, ndaṅndaṅ mb'a na' ntshob bo nsaṅlaṅ bwe là. Yub neyen nge' ya' nka'.

¹⁶ Ndùlala Tshùaben ghù tsemo' ghasa'kam tum, nkeb ntsha yub, nkwé yub bu ben tshen nà tse bo ke ndo' tshu tshob là.

¹⁷ Mba ndùlala, bo ke ke nju' tshob ntshu ghasa'kam tshobe, bo lo ke nke' ngamte tsemo' nsi ghua, nke nke' ngwù nsi mbwe bo. Bo na' ke mfaṅ manze tse tà tshob na' nke nzin bwe là, ke bèn nke nze tshob ntshù' Nsi mba ba tà tshob ke nze là.

¹⁸ Ngelaṅ ze Tshùaben na' mfà ghasa'kam bo là, ze tu wut Tshùaben nke mbe bo ngasa'kame, a nke nkwé yub bu ghakeban tshobe num njoṅ ngelaṅ fa ze ngasa'kam be tù là, nummbe ndèn mub lo ke nko Tshùaben ngelaṅ bo ke nkua' mum mbu ben bo na' nke ma'ni yub mbèn nke ngùtni yub là.

¹⁹ Là, ngelaṅ ze ngasa'kam kwù là, bo bèn nto' neke mbagni ntùm mat yub kà mbèn ntshùa mba ba tà tshobe, nke ndo' tsemo' nsi ghua, nke ngamte yube mbèn nke nkwim ntunkekwi' mub nsi mbwe bo, ntù' tàn tshob be ndùlala, ke ghua' mat yub ntùm tatu.

Nsi laṅte Israél

²⁰ Ntù Tshùaben bèn nja num Israél a tshob ndù: Mba yen nzwit mèn ni bagte kàn sàm se me na' ngwat bag à tà tshobe, ke bèn neju' ntshu àm nà,

²¹ mba yàm tukôwut me ke nsi bèn bam ndù ta' ngô mba ntshù' netèt ba ngô tse Yoshua faṅ nkwù là, vù nsi mbwe bo.

²² Ndùlala, m'a' tshùa njam tshen ngô là, ndaṅte Israél, ndène, a be z'a kô nezin num manze Tshùaben ndaṅndaṅ mba ba tà tshob na' nke nzin nà ke nga lo.

²³ Ndùlala, Tshùaben na' mfaṅ tshen ngô ts'a na' mbe ke swèn yub mum mbu Yoshua là bo na' ntswe fite, a ke bèn nenànte neta' yube.