Ghasa'kame 17 - NTSHOB NSI

Dù' nele'te Nsi Mika

¹ Mo' mandum lo be num mbat Efraim lén se Mika.

² A tshob màab mo' lé'njù ndù: Ndô nkàb ntshob nkù ntsha' mbùm tse bo na' ndo' wù, o fi njom num nu tse kua' num ntoṅ màm nà, me na' mbèn njé. Màab bùnte ndù: A bwô ndù Tshùaben tam ntse mén àm.

³ Mandum nà ba' nkàb ndô nkàb ntshob nkù ntsha' mbùm màab. Ndùlala màab tshob yi ndù: Me fà yen nkàb li Tshùaben kua' yàm tu wut num tu mén àm. Bo nsi na, a yage, bo lo' nabte neto tùn yi, me bèn mfà yub wù.

⁴ Ndùlal'a fà nkàb màab a lo' nkàb bwe ndô nkàb nkù bàa mfà ngana tùne. Yen mèn ni lo' na, a yag, a lo' nabte neto tùn yi. Bo te neto là ntùm ndà Mika.

⁵ Mika là lo ghù ndà Nsi. A nabte ta' éfod boa ba térafim, ndo' mo' nshum i njab bwe, a nke mfa' mba ngafà tshule'te là.

⁶ Mfen lo ke be ntùm ngô Israél yen ngelaṅ nà. Mba we lo na' nke ngù à mb'a kô là.

⁷ Mo' ménnshum lo tum ntùm tunndà Yuda, ndo Bétléhém mà Yuda, nse' nke ntswe bwe. A na' mb'a mo' mèn Lévi.

⁸ Yen mèn ni na' ntum à tusô Bétléhém mà Yuda, nke ndiag dù'ntswe z'a bwô num i là. A be zinte nèn nkum num mbat Efraim, tà nèn ntsho ndà Mika.

⁹ Mika tshob yi ndù: O fe à yà? A bùnte Mika ndù: Me b'a mo' mèn Lévi Bétléhém mà Yuda. Me ke nzinte ndiag à dù'ntswe z'a bwô num àm nà.

¹⁰ Mika tshob yi ndù: A bwô bag wù tswe. O nsi be tàa, be ngale'te me, me ke mfà nkàb wù tamngu' ndô nkàb gham, mfà nzwe ts'o bètte là wù, bèn ke tomte so yôg. Mèn Lévi là tsho ndà i.

¹¹ Mika bam netswe bo yen mandum ni, nke ndo' i mba mo' nshum i là.

¹² Mika yo' yen ménnshum ni, ndo' i ngù ngale'te yi, a nke mfa' fa' le'te yi, nke ntswe ntùm ndà i.

¹³ Mika tshob ndù: Me lèn ndonni ndù Tshùaben nsi ghù mebwô me, mba yen mèn Lévi li bèn mbe ngale'te me là.