Ghasa'kame 16 - NTSHOB NSI

Samson boa nzendà Gaza

¹ Samson nèn Gaza, ntsho bwe njen mo' kattù mènnzwi bwe, nèn ndà i.

² Bo soṅte yen nu là netèt njoṅ ba Gaza fa nke ntshob ndù: Samson b'a nsen ni. Bo diaṅ dù' i mbume, nzi béb dù' njoṅ tèttswe' fa, nke mbéb nze tusô. Bo tsinte nze ngô njoṅ tèttswe' fa nke ntshob ndù: Njù nsi làn be zwi i.

³ Samson nô nsi tà nkum tshaṅ tèttswe'. A lo nsi nguan tshaṅ tèttswe', ntshùb ghabndà boa mbatndà ntsho' yub boa fùn njab nkembe' i ndo' nèn yi num ntshùa mbat z'a be se Hébron nà.

Dalila swèn Samson

⁴ Yen nà be tshùa a bèn nkô mo' mènnzwi ntùm tômbo' Sorék. Lén mènnzwi là b'a Dalila.

⁵ Kamkam Filistia ko' nèn ntèl i, ntshob yi ndù: Batt'é ndèn dù' ze mà neta i ze ndùb ke mfe là, ndèn mb'a be be kab mbu num i là. A nsi tshùa ndùlala be kul i mbèn nke ntshagt'é. O batt'é kà ndèn mba mba we lo netèt bag nsi fà nkàb wù ndô nkàb ntshob nkù ntsha' mbùm.

⁶ Dalila tshob Samson ndù: Netsho'o, soṅ dù' ze yu neta be mfe là mba ju z'a be bo kul o yi kà nku'ni netshagt'o là.

⁷ Samson tshob yi ndù: A be ze bo lo' mvèt nswe sammbàa ts'a ke' mfite nkul àm yi là, mba m'a' bot, mbe mba mba zit mèn no là.

⁸ Kamkam Filistia fà mvèt nswe sammbàa ts'a ke' mfite là Dalila; tshen mvèt là lo ke yoṅ njume; Dalila kut Samson tshen mvèt là.

⁹ A lo be be ndù benntùn lem ntùm mo' to'ndà nke mbébe. Dalila tshob Samson ndù: Samson, tshù ba Filistia là num o. A kebte mvèt num i mba nkù kelo be nkebte ndùs'a ju' mbwôg là. Mèn ke lèn dù' ze ze neta be mfe bwe là.

¹⁰ Dalila tshob Samson ndù: O fùt'àm, ntshob tatte me. Me le't'o ndù o soṅ àm ndonni ju ze be bo kul o yi là.

¹¹ A bùnte ndù: A be ze bo lo' mvèt nswe ze bo ke' to' ghù ju yi là, mba m'a' be mba mba zit mèn no là.

¹² Dalila lo' mvèt nswe nkul i yi, nkua' ntshob ndù: Samson, tshù ba Filistia là num o. A lo be be ndù benntùn lem ntùm to'ndà. A keb mvèt z'a ke nshù mbu mi là mba ntàn ndeb là.

¹³ Dalila tshob Samson ndù: Tà nkum mba ndonni o tshwèt nke' ntut'àm, mbe ndù o tatt'àm. Soṅ àm ju ze be bo lo' nkul o yi là ndonni. Samson tshob yi ndù: O ghù neba' ntsho' sammbàa mi a be tu àm bo mvèt nzwe.

¹⁴ Dalila taṅ i num kam tùn neto ntshob yi ndù: Samson, ba Filistia là num o. A bam num miaglo, ntsho' kam tùn neto, mfag mvèt nzwe.

¹⁵ Ndùlala Dalila tshob Samson ndù: B'o tshob mb'o tshwèt nkô àm ndù ke, ndùse ntù o ke' yab num àm n'à? O fùt'àm ndonni yoṅ tat, ke soṅ àm dù' ze yu neta ze ndùb ke mfe là.

¹⁶ A nke ntshu ntù i njoṅ lé'njù fa, nke mbètt'é nu neshu. Tu i tshu' a ke bèn nku'ni nefènte nze.

¹⁷ A be miagte nto sen tsham nà yi, ntshob ndù: Shua' ke' to' kwag tu àm, nummbe me b'a ju Nsi fe tà bam màa. Bo kom tu àm mba neta àm nsi tum num àm, me bot mba mba zit mèn no là.

¹⁸ Dalila lèn yen yoṅ i li ndù a gha' ntù i yi. Ndùlala a tum bo tshob kamkam Filistia ndù: Bin ko' ndonni nse'e, nummb'a gha' ntù i me. Kamkam Filistia ko' nse' ntèl i boa nkàb ntùm mbu mube.

¹⁹ Dalila batte ndu i, a zi num nku mi; a tsiaṅ mo' mandum a se' nkom ntsho' sammbàa mi a be tu i là. A to' netshagt'é. Samson to' nebi ze neta.

²⁰ Ndùlal'a tshob Samson ndù: Ba Filistia là num o. A bam num miaglo ntshob ndù: Me nsi tum bwe mba tsemo' yoṅ tse là. A lo ke lèn ndù Tshùaben yà ghua' i.

²¹ Ba Filistia ghom i, nto miag mi. Bo lo' i nswe' nèn yi Gaza, ndo' tshan ntùn ndo' nkul i yi. A nke nkaṅ bu masin negho' ju yi ntùm ndàtsha.

²² Mba ndùlala nyiaṅtu tse tse bo kom nà to' neko'o.

²³ Tshù, kamkam Filistia tse'te nke mfà jule'te ze ndùb Dagon nsi yub, mba num netsiaṅte. Bo nke ntshob ndù: nsi be fà ngakeban be Samson mum mbu be.

²⁴ Ndùse ngô yen i là bo nyàmte nsi yub ntshob ndù: nsi yag fà ngakeban yag z'a ke mbagte ngô yag là bag. A lo ke ngù benntùn nke nkwùt'a be nekwùte.

²⁵ Tsiaṅte z'a dun ntù bo là ghù bo tshob ndù: A bwô netsiaṅ Samson a se' nkom zwi, wut be ṅwate. Bo sô Samson ndàtsha, a se' ngù sa mbwe bo. Bo te i netèt ntom.

²⁶ Samson tshob ménnshum z'a ke nsoṅte bu i là ndù: Faṅ àm me kwag ntom tse ba' be num bwe là, njé'te num bo.

²⁷ Bandum boa bènnzwi lo dun ntùm ndà. Kamkam Filistia be bwe, nguan benntùn ntsha' tat, bandum boa bènnzwi be num ba' nke njen mba Samson ghù sa là.

²⁸ Ndùlala Samson tsiaṅ lén Tshùaben ntshob ndù: Tshùaben Nsi, kwimt'àm me Nsi àm, me le't'o neshu. Fà neta me nda' num yen yoṅ i li, me lam wul àm num ba Filistia num miag màm mi mbàa.

²⁹ A momte ntom bàa tse netèt tse ba' be num bwe là, ndo' bu zwim ntshùb mo' yi, ndo' bu kwéb ntshùb mo' yi.

³⁰ Ngù ndùlala nkua' ntshob ndù: A bwô bag à ba Filistia kwùte! Ntshob ndùlala nkôg ba' ma' num kamkam Filistia boa ngô fa tse bo tse'te ndà là. A be zwi tu wul i sen lé'njù là nzwite benntùn yàm ntshùa mb'a na' nzwite ndùs'a ke' ntùn nà.

³¹ Fèt tse bo tunndà tàab swe' nèn Gaza nkel i. Ndùse bo bèn njam nà, bo tshoṅ fe i ntùm fi tàab Manoak, netèt Tsoréa bo Eshtaol. Samson lo be ngasa'kam Israél num ngu'njù ṅam mbàa.