Ghasa'kame 14 - NTSHOB NSI

Nandà Samson

¹ Samson swe' nèn Timna, njen mo' mènnzwi bwe netèt ngonngon Filistia.

² Ndùs'a ko' bwe, mbèn mbaṅ tàab bo màab là, a soṅ yube, ntshob ndù: Me yen mo' mènnzwi Timna, netèt ngonngon Filistia; bin nèn mbètt'é me, a be nzwi àm.

³ Tàab bo màab tshob yi ndù: Mènnzwi ke netèt bon fèt tsho ke ntùm ze be ngô lo ké k'o nèn so mènnzwi netèt ba Filistia tse bo b'a ba kesikel à? Samson tshob tàab ndù: Bètt'é me nummbe nu tse bwô àm.

⁴ Tàab bo màab lo ke lèn ndù Tshùaben bèn mbe yen nu là. Nummbe Samson ke ndiag nze ze ntanta nsi tum bwe num ze njam ba Filistia là. Ba Filistia na' mbèn nke ntô Israél yen ngelaṅ nà.

⁵ Samson swe' nèn Timna bo tàab mba màab. Ndùse bo kum ntùm nkùa z'a be Timna là, mo' metshab ngwayit tshu', nse' mbumte bo yi.

⁶ Ywèt Tshùaben ghom Samson, a ghom ngwayit là mfagt'é mba bo be mfagte nzwe là, ke be ndù sàm ju bu i. A ke soṅ tàab ke màab lo ju z'a ghù là.

⁷ A swe' ntshob yen nu là mènnzwi là, nu tse bwô i.

⁸ Mo' mén ngelaṅ lo be tôge, a bèn nèn Timna num nelo' nzwi i, ndiaṅ nelôte fe ngwayit. A be se' njen tswe' ṅwa' num fe ngwayit bo ṅwa'a.

⁹ A lo' ṅwa' ntùm mbu mi njù num manze; ndùs'a kum mbaṅ tàab bo màab là, a fà yub ṅwa'a, bo jù. L'a ke soṅ yub ndù a tag ṅwa' à num fe ngwayit.

Samson ta ta' nkùt bon Filistia

¹⁰ Tà Samson swe' nèn la' mènnzwi là. Samson tsho bwe ngù jùa, nummb'a na' mb'a matnu netèt nguanmèn ndùlala.

¹¹ Ndùse bo yoṅ njen i là, bo tsiaṅ bonnshum ntu ṅam ntat ndù bo be shun ndungon.

¹² Samson tshob bo ndù: M'a' tshob mo' tànkùt bin. A be z'a be kum lé'njù sammbàa, njoṅ ze jùa nsi tswe, bin bagte me, ngom ntun mi là, mba me nsi fà nkum bin ṅam ntat boa nzwe nebate yi.

¹³ Là, a be ze bin ke' ku'ni nebagte ntun mi me là, mb'a b'a bin bèn fà nkum me ṅam ntat boa nzwe nebate yi. Bo tshob yi ndù: Tshob tànkùl o bag, bag ju'u.

¹⁴ A tshob bo ndù: Ju nejù tum num ngajù ju, ju nedùmte tum num nganeta. Bo tswe lé'njù tat ke ku'ni nebagte ntun mi.

¹⁵ A be kum mbatte lé'njù sammbàa bo tshob nzwi Samson ndù: Batte ndu o, a bagte ntun tànkùt bag; ntag ndùlala mba bag a' ton o mba tunndà tàan. Bin lo netsiaṅ yag nsen ni ghom yag kwé tshu tshag ké?

¹⁶ Nzwi Samson nke nkua' mbaṅ i, nke ntshob ndù: O ke' ghù nkôni num àm, o ke mbàn àm à nebàne. O tshob tànkùt bon ngô àm, ke bagte ntun mi me. Samson bùnte yi ndù: Me ke' bagte yen tànkùt là tàa ke màa lo, ndù a b'a wù ze me nsi bagte wù là ké?

¹⁷ A nke nkua' mbaṅ i num lé'njù sammbàa, njoṅ ze jùa tswe là; a be mbatte lé'njù sammbàa a bagte ntun mi yi, nummb'a lo tshu ntù i neshu. Mènnzwi là fà mbagte ntun tànkùt bon ngô i.

¹⁸ Ba tusô tshob Samson num mbatte lé'njù sammbàa kà lagnyam mbi ndù: Ke z'a dùmte ntshùa ṅwa' à? Ke z'a ta ntshùa ngwayil à? A tshob bo ndù: Bin lo mbe ke lo' à yàm metshab nzwi mfô mfa' yi, mba bin ke' ghù nelèn tun tànkùl àm.

¹⁹ Ywèt Tshùaben ghom i, a swe' nèn Askalon. A zwite bandum bwe ṅam ntat, ndo' nzwe tshobe, mfà nzwe nebate nzwe yi ben tse bo bagte ntun tànkùt là. Mo' neta yantù ko' ntù i, a ko' nèn ntùm ndà tàab.

²⁰ Bo fà nzwi i mo' nshun i ze bo yi ke ntshob nju' là.