Ghasa'kame 13 - NTSHOB NSI

Mba bo bwe Samson nà

¹ Bon Israél ghù nu z'a bag là Tshùaben, a fà yub mum mbu ba Filistia num ngu'njù ṅam nkuà.

² Mo' mandum lo be Tsoréa, mèn ntùm tunndà Dan lén se Manoak. Nzwi i na' mb'a kebwe, ndù a ke' to' bwe mén.

³ Mo' Angél Tshùaben ṅwag mènnzwi là, ntshob yi ndù: O b'a kebwe, mbe ndù o ke' bwe mén. O nsi be jùm, bwe mén mandum.

⁴ A bwô ndù o zete ndonni, ke nu ndu', ke neta ndu' lo, ke bèn njù sàm ju z'a ke' làn nà.

⁵ Tshù, o nsi be jùm bwe mén mandum. Kà mèn te shua' tu i, nummbe yen mén nà b'a ju Nsi fe tà bam màab. A yi nsi bèn to' netshu' Israél bu ba Filistia.

⁶ Mènnzwi là nèn nsoṅ ndu i ntshob ndù: Mo' mèn Nsi se' mbaṅ àm, ndù a ghù ntshù Angél Nsi, ntshù mi a kuni là. Me lo ke bètt'é dù' z'a fe là; a ke bèn nsoṅ àm ze lén se.

⁷ L'a tshob me ndù: O nsi be jùm bwe mén mandum. Ndonni kà nu ndu' ke neta ndu' lo, ke bèn njù sàm ju z'a ke' làn nà; nummbe yen mén nà z'o nsi bwe là nsi b'a ju Nsi fe bam màab tà nkum lé'njù a kwù là.

⁸ Manoak ma' mbu Tshùaben, ntshob yi ntùm ze le'te ndù: Tshùaben àm, a bwô ndù mèn Nsi z'o lo ntum i là bèn nse' mbaṅ bag, ntswite yag mba bag nsi ghù num mén nà ze bo nsi bwe i là.

⁹ Nsi ju' le'te Manoak, Angél Nsi bèn nse' mbaṅ mènnzwi là. Mènnzwi là na' tswe nsi ntùm mo' nà, ndu i Manoak ke be mbaṅ i.

¹⁰ Mènnzwi là nànte nèn nsoṅ ndu i yen tshô là, ntshob ndù: mandum z'a na' nse' mbaṅ àm yun nà bèn nse'e.

¹¹ Manoak lo nsi ntam njam nzwi i, nèn mbaṅ mandum nà, ntshob yi ndù: A b'a wù na' ntshob nu mènnzwi li ké?

¹² A bùnte ndù ṅ, a b'a yi. Manoak tshob ndù: Ndonni, a be ze ntshob mu bumte là, mba bag nsi ghù à ndùke num mén à? Mb'a bwô a ghù à ndùke?

¹³ Angél Tshùaben bùnte Manoak ndù: Mènnzwi tshùb wul i num tshu tse me na' ntshob yi là.

¹⁴ K'a kwag ntshu i num ju z'a tum ntùm nkùa là; k'a nu ndu' ke neta ndu' lo, ke bèn njù sàm ju z'a ke' làn nà. A bwô a ze bon tshu tse me na' ntshob yi là.

¹⁵ Manoak tshob Angél Tshùaben ndù: Bam ndù bag bin ghubte, bag nabte mén mbwe mfà wù.

¹⁶ Angél Tshùaben bùnte Manoak ndù: A be z'o ghù be ghubte mba neghubte là, mba me ke jù tshàm tshaṅ so. Là, a be z'o kô neton nyàm nà, o ton i Tshùaben. Manoak lo ke lèn ndù a b'a Angél Tshùaben.

¹⁷ Ndùlala Manoak tshob Angél Tshùaben ndù: Lén so b'a we, bag ghù nyàmt'o ndùse ntshob mu nsi bumte l'à?

¹⁸ Angél Tshùaben bùnte yi ndù: O bètte lén sàm à numke? A kuni neshu.

¹⁹ Manoak lo' mén mbwe ngù ju bwôntù yi, mfà jule'te yi Tshùaben num gho. Mo' kuni nu tum ndùse Manoak bo nzwi i ke ndôte là.

²⁰ Mba Angél Tshùaben ko' ntùm lambwôg nèn ndùse lambwôg ke ndo tômbwôg nko' nèn mfe kamànyam nà. Manoak bo nzwi i be yen ndùlala ngwù nsi kabkab.

²¹ Angél Tshùaben ke bèn ṅwag Manoak bo nzwi i. Manoak yôg ndèn ndù a b'a Angél Tshùaben,

²² ntshob nzwi i ndù: Be a' kwù, nummbe be yen Nsi.

²³ Nzwi i bùnte yi ndù: A lo mbe ndù Nsi kô neghù be kwù, mb'a ke' bam nyàm ze be ton yi là bo jule'te be, mb'a ke' ghù be yen ju z'a la'te be là, ke bèn ngù ntoṅ be ju' lèn tshen nu li.

²⁴ Nzwi i bwe mén mandum, bo yab lén se ndù Samson. Mén ku', Tshùaben tam ntse yi.

²⁵ Ywèt Tshùaben to' nenyi't'é Mahané-Dan, netèt Tsoréa bo Eshtaol.