Ghasa'kame 12 - NTSHOB NSI

Ntsha ben Efraim bo Yéfté

¹ Ben Efraim tse'te nko' nèn tu, ntshob Yéfté ndù: Numk'o na' nèn ma' bon Ammon ntsho ke tsiaṅ yag bag bin nèn à? Bag a' ton ba' o, nton mba tu wul o ntùm bwe.

² Yéfté tshob bo ndù: Bag ngô àm lo ta ntshu neshu, bag à bon Ammon; ndùlala me tsiaṅ zine, bin ke se' nkwé àm bu bo.

³ Mba me na' njen o ke kô nese' njwimt'àm nà, me lo' yôg sàm nte tshwèt yi, nde' bon Ammon ntsho. Tshùaben lo fà yub mum mbu màm. Sènni bin ko' nse' le' àm ntsho à numke?

⁴ Yéfté tse'te njoṅ ba Galad fa, nde' Efraim ntsho. Ba Galad lab ben Efraim, nummbe bo lo ke ntshob ndù: Bin b'a ben Efraim tse bin na' nkù là. Galad b'a netèt Efraim bo Manasé.

⁵ Galad lo' dù' ntse Yordan ts'a be bag Efraim ndù bo ghù nedut nku là. Ndùse mèn tum Efraim nke nkù ntshob ndù bo faṅ a tshùa là, ben Galad bètt'é ndù: O b'a ze mèn Efraim ké? Mb'a' bùnte ndù nga!

⁶ Bo nke ntshob yi ndù: Mb'a bwô, tshob ndù Shibbolét, a nke ntshob ndù Sibbolét, nummb'a lo ke ku'ni netshob kua' mebwô. A tshùa ndùlala ba Galad ghom i mbaṅ Yordan. Bo zwite ben Efraim yen ngelaṅ nà ntu ntsha' ntshob bàa ṅam nkuà.

⁷ Yéfté be ngasa'kam Israél num ngu'njù ntôge. Yéfté ze Galad kwù, bo tshoṅ i ntùm mo' tusô Galad.

Ibtsan, Elon, Abdon

⁸ A be tôg ze Ibtsan ze Bétléhém be ngasa'kam Israél.

⁹ A lo ghù bon bandum ntu ṅam ntat, a lo so ngonngon ntshundà ntu ṅam ntat, mbèn ngù ngonngon ṅam ntat fe njù nse' num bon tse. A be ngasa'kam Israél num ngu'njù sammbàa.

¹⁰ Ibtsan kwù, bo tshoṅ i Bétléhém.

¹¹ Ze nu Ibtsan be mi Elon ze Zabulon be ngasa'kam Israél. A be ngasa'kam Israél num ngu'njù gham.

¹² Elon ze Zabulon kwù, bo tshoṅ i Ajalon ntùm ngô Zabulon.

¹³ Ze nu Elon lo mi, Abdon nshum Hilléd, ze Piraton be ngasa'kam Israél.

¹⁴ A lo ghù bon bandum ntu ṅam nkuà, ngù bonnkat mi tse bandum ntu ṅam ntat, tse bo ke nko' num nkekwèn ṅam sammbàa là. Abdon be ngasa'kam Israél num ngu'njù fome.

¹⁵ Abdon nshum Hilléd ze Piraton kwù, bo tshoṅ i Piraton, ntùm ngô Efraim, num mbat Amalék.