Ghasa'kame 11 - NTSHOB NSI

Yéfté tù' mfen ba Israél

¹ Yéfté ze Galad na' mb'a neta sa'nde'e. A na' mb'a nshum mo' kattù mènnzwi. Galad na' mbèn mbwe Yéfté.

² Nzwi Galad lo bwe bon bandum yi, bo ku', ntù' dùbdùb, nta' Yéfté, ntshob yi ndù: B'o ke zi njù ntsi' ntùm ndà tà yag, nummb'o b'a mén mènnzwi ghua.

³ Yéfté kù fèt tse nèn ngùanesà, nke ntswe ntùm ngô Tob. Ba kelo' ngù ju yi kùmte mbaṅ Yéfté, boa bo nke ntsha' dù'.

⁴ A be be mo' ngelaṅ bon Ammon kam Israél ntsho.

⁵ Mba bon Ammon ke nde' Israél ntsho là, kamkam Galad nèn diag Yéfté ntùm ngô Tob.

⁶ Bo tshob Yéfté ndù: Se' mbe yag mfen bag bin nèn nde' bon Ammon ntsho.

⁷ Yéfté bùnte kamkam Galad ndù: Bin lo ke ghù nkembàn num àm, ta' àm ntùm ndà tàa ké? Bin se' diag àm ndonni ze bin be ntùm nge' l'a numke?

⁸ Kamkam Galad tshob Yéfté ndù: A ndùlala bèn ngù kà bag nse' tèl o ndù bag à bin le' bon Ammon ntsho, o be mfen yag, bo ze njoṅ ba Galad fa.

⁹ Yéfté bùnte kamkam Galad ndù: A be ze bin lo' àm mbèn yi ndù bag bin le' bon Ammon ntsho, Tshùaben swèn yub mbwe àm nà, mba me nsi be mfen zin.

¹⁰ Kamkam Galad tshob Yéfté ndù: A bwô ndù Tshùaben ju' ntsho'te yage; a be ze bag ke' ghù ju z'o tshob bag là.

¹¹ Yéfté nèn boa kamkam Galad. Ngô te i mbwe, ndo' i ngù ze mfen yi. Yéfté bèn ntshob ntshob a na' ntshob Mitspa là.

Ba nu tse Yéfté tshob bon Ammon nà

¹² Yéfté tum ntum mfen bon Ammon, ntshob yi ndù: Ke z'a netèt me bag wù k'o nke nse' nema' yàm ngô ntsho à?

¹³ Mfen bon Ammon bùnte ntum Yéfté ndù: A b'a nummbe Israél lo lo' ngô àm ndùs'a ko' mà Egipto là, neto' Arnon nkum Yabok mba Yordan. A bwô ndù o ba' yen ngô là me ndonni ntùm yu nekô.

¹⁴ Yéfté bèn ntum ntum mbaṅ mfen Ammon,

¹⁵ ndù bo tshob yi ndù: Yéfté tshob mbe Israél lo ke lo' tse ngô Moab ke ngô bon Ammon no.

¹⁶ Nummb'a lo be ndùse Israél ko' Egipto là, a zin à num kônkwa tà nèn nkum dibantse meba, nkum mba Kadèsh.

¹⁷ Ndùlala Israél tum ntum mfen Edom ntshob yi ndù: Faṅ me tshùa ntùm ngô o. Là mfen Edom ke bam yen nu là. A tum ntum mba mfen Moab, mba yi gha. Israél tswe Kadèsh.

¹⁸ Bo lo bwe ntshùa kônkwa, ndiaṅ mbaṅ ngô Edom bo Moab, ntum num bag Moab z'a be ntumnyam nà. Bo te mbàn yoṅ Arnon, ke tsho tshob ntùm tsha' Moab, nummbe Arnon b'a num ndùnsi Moab.

¹⁹ Israél tum ntum Sion mfen Amor, mfen Hesbon, ntshob yi ndù: Faṅ bag tshùa ntùm ngô o nèn dù' ze bag nèn nà.

²⁰ Là Sion ke bam ndù Israél tshùa ntùm ze ngô; a kùmte tse ben, nte mbàn Yahats, nde' Israél ntsho.

²¹ Tshùaben Nsi Israél fà Sion bo ze ngô mum mbu Israél, a lab yube. Israél lo' njoṅ ngô Amor fa, nte ntùm njoṅ yen bag ngô là fa.

²² Bo lo' njoṅ ngô Amor fa, nelo Arnon nèn nkum Yabok, nelo kônkwa nèn nkum Yordan.

²³ Ndonni ze Tshùaben Nsi Israél ta' ba Amor mbwe Israél ze nzwit mèn nà, a b'a wù bèn ghù ngô yub ké?

²⁴ Ju ze yu nsi, Kemosh fà wù là, o ke bèn ghù i ké? Ju ze Tshùaben Nsi yag fà bag, njab kua' mbwe bag là, bag ke bèn ghù i ké?

²⁵ O tshùa Balak nshum Tsipor, mfen Moab ké? A lo ghù ntanta bo Israél ké k'a lo le' i ntsho à?

²⁶ A b'a ngu'njù nkù tat li mba Israél tshwèt ntswe Hesbon mba ntùm ntusô mi a ghebte bwe, nke ntswe Aroer mba ntùm ntusô mi a ghebte bwe, boa ntusô mi a ghebte mbaṅ Arnon nà. Numk'o na' mbe ke kwé tshen dù' là yi num yen ngelaṅ n'à?

²⁷ Me ke' kamt'o, là o ghù kebwô me mb'o ma' àm ntsho là. A bwô ndù Tshùaben ngasa'kam be ngasa'kam sènni netèt bon Israél boa bon Ammon.

²⁸ Mfen bon Ammon ke kô neju' ntshob mi Yéfté tshob bo tshob yi là.

Ju ze Yéfté kô là

²⁹ Ywèt Tshùaben tsho num Yéfté. A tshùa Galad mba Manasé, ntôg Mitspa z'a Galad là; ndo Mitspa z'a Galad là nde' bon Ammon ntsho.

³⁰ Yéfté ghù nka'ni Tshùaben ntshob ndù: A be z'o fà bon Ammon mum mbu màm nà,

³¹ mba mba we lo z'a nsi tum ndà se' mbwe àm, ndùse me nsi be fe ju bon Ammon ke ṅwate là, me nsi fà i Tshùaben, ton i Tshùaben à kua' fafa.

³² Yéfté le' bon Ammon ntsho, Tshùaben fà yub mum mbu mi.

³³ Bo vù ntsho kua' kebwô neshu, nelo Aroer nèn nkum nze Minit, laṅ dù' z'a ghù ntusô ṅam mbàa là tà nèn nkum Abél-Kéramim. Bon Ammon vù ntsho mbwe bon Israél.

³⁴ Yéfté bèn njam ntùm ndà i Mitspa. Ngon i tum nse' mbwe i bo lammbé, nke nyiaṅe. A na' mb'a nkwi mén i ntshù'. A lo ke ghù mén mandum, ke bèn ngù mo' mén mènnzwi.

³⁵ Ndùs'a yen i là, a fag nzwe tse ntshob ndù: Ngon àm, o ma' àm ntùm ngùtni. O num netèt ben tse bo tshwèt ntshu ntù àm nà. Me lo ghù nka'ni Tshùaben, mbe ndù be me ke sô ju bwe.

³⁶ A tshob tàab ndù: Tàa, a be z'o ghù nka'ni Tshùaben nà, o ghù num àm kua' mb'a tum ntshu o là. Ndonni Tshùaben yagte mba' ghakeban tsho bon Ammon.

³⁷ A tshob tàab ndù: Faṅ àm yàm tu num ṅwù bàa, me nèn num ba mbat ndàn wul àm bwe mba me ke' à ngon nà bag à shun tshàm.

³⁸ A bùnte yi ndù: Nène, a faṅ i ze tu num ṅwù bàa. A nèn boa shun tse num ba mbale, a tsho bwe ndàn wul i mb'a ke' à ngon nà.

³⁹ Ṅwù bàa lo be tôg ngon Yéfté bèn njam mbaṅ i, a zwiagte nka'ni a na' ngù là num i. A lo be ndù a ke' yoṅ ndèn mén mandum.

⁴⁰ Fe num yen ngelaṅ nà ngonngon Israél be nèn kwimte ngon Yéfté njoṅ ngu'njù kuà. Yen nà tù' à matnu ndùlala.