Ghasa'kame 1 - NTSHOB NSI

Ba Israél lo' la' Kanaan

¹ Ngelaṅ ze Yoshua kwù là, bon Israél bètte Tshùaben ndù: We netèt bag bèn bwôgmbwe ko' nèn kam ba Kanania ntsho à?

² Tshùaben bùnte bo ndù: Yuda nsi ko'o; yene, me fà ngô num mbu mi.

³ Yuda tshob mfèl i Siméon ndù: Be ko' nèn mum ngô ze bo fà me là, ma' bon Kanania ntsho. Yen nà tôge, bag wù nèn mum yu ngô. Ntshob ndùlala bo Siméon nèn.

⁴ Yuda ko', Tshùaben faṅ ba Kanaan mba ba Pérézia mum mbu mube.

⁵ Bo yen Adonibézék Bézék, nkam i ntsha mbèn ma' ba Kanania boa ba Pérézia ntsho, ntshùa yube.

⁶ Adonibézék kù nène; là bo ta' i, ngom i, nkeb ntu màdu' mbu mub mba ntu màdu' nku mube.

⁷ Adonibézék tshob ndù: Tshù fenfen ntu ṅam sammbàa là màdu' mbu mub boa nku mub kebte, bo nke ntswitte tshu bam téblé sàm nà. Nsi ke mba' à ju ze me ghù là me. Bo lo' i nèn yi Yérusalém, a tsho bwe nkwù.

⁸ Bon Yuda le' Yérusalém ntsho, ndo' i, ṅwa i ntshùag ṅwi mbèn ndo' mbwôg nton tusô yi.

⁹ Bon Yuda bèn nswe' ngelaṅ yen nà tôg là, nèn ma' ba Kanania tse bo ke ntswe num kônga là ntsho mba tse bo ke ntswe tun ntèn boa tômbo' là.

¹⁰ Yuda zin num ba Kanania tse bo be Hébron ndù bo na' ke ntsiaṅ yub mba ndù Kiriat-Arba là. A ma' ntshùa Shéshaï, Ahiman mba Taïmaï.

¹¹ A na' be mo' ngelaṅ bo nke ntsiaṅ Débir ndù Kiriat-Séfer.

¹² Kaléb tshob ndù: Me nsi fà ngon àm Aksa mèn z'a ma' ntsho tshùa Kiriat-Séfer là, a lo' i ngù nzwi i yi.

¹³ Ndùlala, Otniél mén Kenaz ze mandum, ntù'njam Kéléb, ma' nkwé yen ngô là, Kaléb fà ngon i Aksa yi, a be nzwi i.

¹⁴ Ngelaṅ Aksa na' ntsho ju Otniél là, Otniél tagt'é ndù a lon ta' dù' nà tàab. A swe' num kekwèn a be bwe là, Kaléb tshob yi ndù: Ke z'o ghù à? A bùnte yi ndù:

¹⁵ Fà ta' nda' me, nummbe o fà ta' dù' tsha' me mà ntèn, a bwô o fà mba dù' ntôntse me. Ndùlala, Kaléb fà ntôntse mi a be mfe tu mba mi a be mà ntèn nà yi.

¹⁶ Nshumnshum Kénién ntse Mosé lo tusô ntene, nko' boa nshumnshum Yuda nèn num kônkwa tun ntèn ngô Arad nete yub bwe netèt benntùn.

¹⁷ Yuda bo mfèl i Siméon nèn, ma' ba Kanania tse bo ke ntswe Tséfat là ntsho, ntshùa yube. Ntam ntshù' num sen tusô là, ntswi lén se ndù Horma.

¹⁸ Yuda bèn nkwé Gaza boa tsemo' tsha' tse, Askalon boa tsemo' tsha' tse, mba Ekron boa tsemo' tsha' tse.

¹⁹ Tshùaben be bo Yuda, a tshùate ndùlala, a ma' nkwé dù' mbale, nda' ndù ke ku'ni neta' benntùn tse bo ke ntswe tômbo' là, nummbe nkalig ntsho mi bo ghù là na' mb'a mi ntùne.

²⁰ Bo fà Hébron Kaléb, ndaṅndaṅ mba Mosé na' ntshob là, a ta' nshumnshum Anak tat tse bo be bwe là.

Tsemo' ba Israél kebte memo' nkam tsha'a nda' ndù ke ta' ba Kanania bwe fa

²¹ Nshumnshum Benjamin na' ke ta' ba Yébusia tse bo ke ntswe Yérusalém nà. Ba Yébusia boa tse ben Benjamin ke ntswe à be Yérusalém tà nkum ndonni.

²² Mba ze nzwit Yosèf bèn nko' ze nèn kam Bétél ntsha. Tshùaben be bo à bo.

²³ Nzwit Yosèf ghù bo ton Bétél, ze bo na' nke ntsiaṅ ndù Luz là.

²⁴ Ba ghatom dù' yen mo' mandum a nke ntum ntùm tusô là, bo tshob yi ndù: La'te yag dù' ze be bag tshùa bwe ntsho tusô là, bag nsi ko ndèn mu.

²⁵ A la'te dù' ze be bo tshùa bwe ntsho tusô là bo. Bo ma' tusô là ntshùag ṅwi, nzwite benntùn, là mfaṅ mandum nà a nèn boa ze tunndà fa.

²⁶ Yen mandum nà na' nèn ntùm ngô ba Hétia, nkut ta' tusô bwe, ntswi lén se ndù Luz. Bo ke ntsiaṅ i a sen lén nà tà nkum sènni.

²⁷ Manasé ke ta' benntùn bo ke ntswe Bét-Shéan mba ntùm ntusô mi a be Tanak, mi a be Dor, mi a be Jibléam boa mi a be Megiddo là. Mbèn mbe, ba Kanania na' ke nkô netswe ntùm yen ngô là.

²⁸ Ngelaṅ Israél ta là, a fét ba Kanania nsi, ndo' yub ngù kuan mo' tunndà yi, nda' ndù, a ke ku'ni neta' yube.

²⁹ Efraim ke bèn neta' ba Kanania tse bo ke ntswe Guézer là, ba Kanania nke ntswe Guézer netèt Efraim.

³⁰ Zabulon ke bèn neta' benntùn bo na' nke ntswe Kitron nà, ke bèn neta' mba tse bo ke ntswe Nahalol là. Ba Kanania nke ntswe netèt Zabulon, ndù mo' tunndà ke ntô yube.

³¹ Aser ke bèn neta' benntùn tse bo ke ntswe Ako là, ke bèn neta' mba tse Sidon, mba tse Ashal, tse Aézin, tse Hélba, tse Afik mba tse Réhob.

³² Bon Asérita nke ntswe netèt bon Kanania tse bo ke ntswe ntùm ngô yub là, nummbe bo na' ke bèn neta' yube.

³³ Néftali ke bèn neta' benntùn tse bo ke ntswe Bét-Shemesh là, ke bèn neta' mba benntùn tse bo ke ntswe Bét-Anat là. Ndùlala, a nke ntswe netèt ba Kanania, bon ntùm ngô, nda' ndù bon Bét-Anat tù' nte' mo' tunndà.

³⁴ Ben Amor yoṅ tse ben Dan ntshag kônga ke bèn mbam ndù bo swe' nse' tômbo'.

³⁵ Ba Amor na' ke nkô netswe à Harhérès, mà Ajalon mba Shaalbim. Là, ngelaṅ ze tunndà Yosèf ta ntshùa yub là, bo tù' nte' ta' tunndà.

³⁶ Tsha' ba Amor na' ke nto' num mbat Akraphim, nsa nkum Séla mba tun bwe.