Galatia 3 - NTSHOB NSI

Ntshù' mba bamntù

¹ Bin kagni ba Galatia, we z'a zwiaṅte zin bin tse bo na' njab Yésu Kristô num miag mine, Yésu Kristô ze bo kwimt'é num fanta'tù l'à?

² Me kô nebètte zin nda' ju ntshù': Bin na' nkwé Ywèt Nelàn à njam mfa' ntshù' ké, ke njam bamntù z'a fà ntshob mi bin na' nju' l'à?

³ Bin be kua' kagni à ndùlala ké? Bin tse bin to' njam ywèt là, bin nsi miagt'a njam mbàb wut ké?

⁴ Bin na' nke ngùtni wut tsin ndùlal'à banban ké? A b'a kua' banban ké?

⁵ Mèn z'a fà Ywèt bin, mbèn nke ngù mfa' neta netèt bin nà, a ke ngù à njam mfa' ntshù' ké, ke njam bamntù z'a fe ntshob mi bin na' nju' l'à?

⁶ A ndùlala Abraham lo bam Nsi, bo siaṅte yen nà yi mba nunetsin nà.

⁷ Ndùlala, bin lèn ndù ghabamntù bèn mbe bon Abraham.

⁸ Ṅwa'ni Nsi lo bwôgmbwe njen ndù Nsi ghù ghakelèn Nsi tù' ben netsin ntùm bamntù, a ndùlala, a lo bwôgmbwe ntshob yen nkùn mebwô là Abraham: Njoṅ ngô njù fa nsi ghù mbotni à num o.

⁹ Ndùlala, njoṅ ghabamntù fa ghù mbotni boa Abraham ngabamntù.

¹⁰ Là ben tse yub nenywinte b'a num mfa' ntshù' là, b'a tun ndon, nummbe bo kite ndù: Ndon tu mèn z'a ke' be ghô ntùm njoṅ tshu fa tse bo kite ntùm ṅwa'ni ntshù', ndù a ze yub là.

¹¹ Be lèn mebwô ndù sàm mèn ke nsi tù' mèn netsin mbwe Nsi ntùm ntshù', mba ndù mèn netsin nsi yôg à njam bamntù.

¹² Ntshù' ke' be lôte bamntù, nummbe ntshù' num ntshob ndù: Mèn z'a ze yub là nsi yôg num bo.

¹³ Kristô lo tshu' be num ndon ntshù', tu wul i lo tù' ndon num tu be, nummbe bo lo kite ndù: Ndon tu mèn ze bo taṅ i tù là,

¹⁴ ndùlala ndù mbotni Abraham se' num ghakelèn Nsi njam Yésu Kristô, mba ndù bag à bin kwé nka'ni Ywèt njam bamntù.

¹⁵ Fèt tshàm, me tshob à num ze mat mènntùn. Be lo' mfi' num kàn se mèn wat là: Sàm mèn ke' ghù neséb ju bwe, ke bèn nkwi'te ju bwe.

¹⁶ Là Nsi na' ngù nka'ni à Abraham mba nzwil i, a ke' tshob ndù: Mba nzwit tse, mb'a b'a tse yàm nà, là, a b'a nda' ta' i ntshù': Mba nzwil o, yen nà b'a ndù Kristô.

¹⁷ Ndùlala me tshob ndù: Ntshù' ke' ku'ni nebiagte kàn se Nsi wat là, mbagte nka'ni Nsi. Nummbe nka'ni lo bwôg be ntswe ngu'njù bon tat nkù kuà kà ntshù' ntume.

¹⁸ Nummbe, a be ze ntsi' b'a num ntshù' là, mb'a ke bèn mb'a nka'ni, là Nsi na' mfà ju kondèn Abraham à njam nka'ni.

¹⁹ Ndùlala ntshù' b'a numke? Bo na' mfà ntshù' à num nu mfànnu, ndù a tswe tà nkum ngelaṅ nzwit ze bo ghù nka'ni yi nsi se' là; ntshù' tshùa njam ba Angél, nkum ntùm mbu nganze,

²⁰ nganze ke b'a nganze ta' mèn, là Nsi b'a nda' ntshù'.

²¹ Ndùlala, ntshù' b'a ngakeban nka'ni Nsi ké? A ke b'a ndùlala! Nummbe a lo mbe ndù bo fà ntshù' z'a ku'ni nefà yôg là, mb'a be nunetsin tum num ntshù'.

²² Là ṅwa'ni Nsi lo fùn njoṅ i fa tun nukebwô, ndùlala ndù nka'ni njam bamntù num Yésu Kristô be mi ben tse bo bam nà.

²³ Bamntù lo be se'e, ndù bo fùn be tun ntshù' ndù a ke mbéb be tà bamntù se' nda'te wul i.

²⁴ Ndùlala ntshù' na' mbe à mba nzemèn nà, ndù a soṅte be mfà num Kristô, ndùlala ndù njam bamntù be tù' ben netsine.

²⁵ Mba bamntù se' là, bag à bin ke' bèn mb'a tun yen nzemèn nà,

²⁶ nummbe njoṅ zin fa b'a bon Nsi njam bamntù num Kristô Yésu.

²⁷ Nummbe njoṅ zin fa tse bo na' nyu' zin ntse num Kristô là, bin lo ma' Kristô num bin.

²⁸ Ze Yuda ke' bèn mbe, ze Grikia ke bèn mbe, nkuan ke bèn mbe, ménla' ke bèn mbe, mandum ke bèn mbe, mènnzwi ke bèn mbe; nummbe njoṅ zin fa b'a ntshù' num Kristô Yésu.

²⁹ Là, a be ze bin b'a tse ben Kristô là, mba bin b'a nzwit Abraham, ba jùndà num nu nka'ni.